ജയ്പൂര്: നഗരത്തിന്റെ മേയറാകുക ലക്ഷ്യമിട്ടുള്ള തെരഞ്ഞെടുപ്പ് ചെലവുകള്ക്കായി പണം കണ്ടെത്താന് കുപ്രസിദ്ധ ഗുണ്ടാസംഘത്തെ വാടകയ്ക്ക എടുത്ത് 25 കാരി. പണത്തിന് വേണ്ടി രണ്ടു പ്രമുഖ ഡോക്ടര്മാരെ വിളിച്ച് ഇവര് ഭീഷണിപ്പെടുത്തിയതിനെ തുടര്ന്ന് യുവതി ഉള്പ്പെടെ നാലു പേരെ പോലീസ് അറസ്റ്റ് ചെയ്തു. ഖുശ്ബു ചെലാനി എന്ന യുവതിയാണ് പിടിയിലായിരിക്കുന്നത്. ഇവര് കാര്യം നടക്കാന് വിളിച്ചത് പ്രമുഖ ഗുണ്ടാസംഘമായ ലോറന്സ് ബിഷ്ണോയി ഗ്യാംഗിലെ മൂന്ന് പേരെയാണ്.
എല്ലാവരേയും രാജസ്ഥാന് പോലീസ് അറസ്റ്റ് ചെയ്തു. രണ്ടു ഡോക്ടര്മാരില് നിന്നും 50 ലക്ഷം വീതം വാങ്ങാനായിരുന്നു ഇവര് വിളിച്ചത്. പ്രതാപ് നഗറുകാരിയായ ഖുശ്ബു ഫാഷന് ഡിസൈനറും രാഷ്ട്രീയക്കാരിയുമാണ്. ഇവരുടെ സഹായിയായിരുന്ന രവീന്ദര് സിംഗ് എന്ന കാളിയെ അറസ്റ്റ് ചെയ്ത് പാട്യാല ജയിലില് നിന്നും ജയ്പൂരിലേക്ക് കൊണ്ടുവന്നിട്ടുണ്ട്. സിംഗിനെ ചെലാനി ഇന്സ്റ്റാഗ്രാം വഴിയാണ് കോണ്ടാക്ട് ചെയ്തത്.
നഗരത്തിലെ പ്രമുഖ സമ്പന്നരും ഡോക്ടര്മാരുമായ രണ്ടുപേരുടെ വിവരം ഇന്സ്റ്റാഗ്രാം വഴിയാണ് കൈമാറിയത്. കൗണ്സിലര് സ്ഥാനത്തേക്ക് തെരഞ്ഞെടുപ്പ് പ്രചരണത്തിന് പണം കണ്ടെത്തുകയായിരുന്നു ലക്ഷ്യമെന്നും ചെലാനി പോലീസിനോട് പറഞ്ഞിട്ടുണ്ട്. ചെലാനിക്കും സിംഗിനും പുറമേ ഷൂട്ടര് രാഹുല് എന്ന മിനി പെട്രോളിനെയും സഹായി ഹര്ഷ് ഭാഡുവിനെയൂം പോലീസ് പൊക്കിയിട്ടുണ്ട്.
അമേരിക്കയിലും ബ്രിട്ടനിലുമുള്ള തന്റെ സഹായികള്ക്ക് സിംഗ് ഡോക്ടര്മാരുടെ നമ്പറുകള് നല്കിയിരുന്നതായി പ്രാഥമികാന്വേഷണത്തില് വ്യക്തമായിട്ടുണ്ട്. ഇവര് ആഗസ്റ്റ് 16 നും 24 നും ഡോക്ടര്മാരായ ശ്യാം സുന്ദറിനെയും സുനീത് ഷായേയും വിളിക്കുകയും ചെയ്തിരുന്നു. വിദേശത്ത് നിന്നുള്ള ഇവരുടെ ഫോണ്കോള് വെച്ചാണ് ഇരുവരില് നിന്നും 50 ലക്ഷം വീതം ചോദിച്ചതെന്ന് ബിഷ്ണോയി വ്യക്തമാക്കിയിട്ടുണ്ട്.
ലോറന്സ് ബിഷ്ണോയിയുടെ സംഘത്തിലെ പ്രധാനിയാണ് രവീന്ദര് സിംഗെന്ന് പോലീസ് പറഞ്ഞു. 2015 ല് പോലീസ് കസ്റ്റഡിയില് നിന്നും രക്ഷപ്പെട്ടവരാണ് രവീന്ദര് സിംഗും കാളിയും. ഡല്ഹി, ഹരിയാന, പഞ്ചാബ് എന്നിവിടങ്ങളില് ഇയാള്ക്കെതിരേ ക്രിമിനല് കേസുകള് നിലവിലുണ്ട്.
