സെലിബ്രിറ്റികളോട് ആരാധനയും സ്നേഹവും മനസ്സ് നിറയെ സൂക്ഷിക്കുന്നവരാണ് പ്രേക്ഷകര്. സെലിബ്രിറ്റികളുമായി രൂപസാദൃശ്യമുള്ള പല അപരന്മാരും സോഷ്യല് മീഡിയയില് വൈറല് താരങ്ങളാണ്. അത്തരത്തില് സോഷ്യല് മീഡിയയ്ക്ക് പരിചിതനായൊരു വ്യക്തിയാണ് ബോളിവുഡ് താരം ഷാരൂഖ് ഖാനുമായി അപാരമായ രൂപസാദൃശ്യമുള്ള ഇബ്രാഹിം ഖദ്രി. കിംഗ് ഖാന്റെ പുതിയ ചിത്രം ‘ജവാന്’ തിയേറ്ററുകളിലും പ്രേക്ഷകരുടെ ഇടയിലും തരംഗം സൃഷ്ടിക്കുമ്പോള് ഇപ്പോഴിതാ ഇബ്രാഹിം ഖദ്രി വീണ്ടും ശ്രദ്ധ നേടുകയാണ്. എയര്പോര്ട്ടിലെ സെക്യൂരിറ്റി ഉദ്യോഗസ്ഥനു മുന്നില് ഷാരൂഖിന്റെ മാനറിസങ്ങള് കാണിക്കുന്ന ഇബ്രാഹിമിന്റെ ഒരു വീഡിയോ ആണ് ശ്രദ്ധിക്കപ്പെടുന്നത്. ഷാരൂഖ് അപരന്റെ ഷോ കണ്ട് ചിരിയടക്കുന്ന സെക്യൂരിറ്റി ഉദ്യോഗസ്ഥനെയും വീഡിയോയില് കാണാം.
ഷാരൂഖ് ഖാനുമായുള്ള തന്റെ സാമ്യം ആദ്യം താൻ ഗൗരവമായി എടുത്തിരുന്നില്ലെന്നാണ് ഇബ്രാഹിം പറയുന്നത്. എന്നാല് ഷാരൂഖിന്റെ ‘റയീസ്’ എന്ന സിനിമ റിലീസ് ചെയ്ത ശേഷം ഇബ്രാഹിം തന്റെ ശരീരഘടന, ഹെയര്സ്റ്റൈല്, പെരുമാറ്റരീതികള് എന്നിവ കിംഗ് ഖാനിന്റെ തരത്തിലേക്ക് മാറ്റിയത്. അതോടെ ദുബായ്, മസ്കറ്റ് പോലുള്ള സ്ഥലങ്ങളില് നിന്നുവരെ വിവിധ പരിപാടികള്ക്ക് ഖാദ്രിയെ തേടി ക്ഷണമെത്തിത്തുടങ്ങി. ജവാൻ റിലീസിംഗ് ദിവസം തിയേറ്ററില് എത്തി ഡാൻസ് ചെയ്തുകൊണ്ടാണ് ഇബ്രാഹിം പ്രിയതാരത്തിന്റെ ചിത്രത്തെ വരവേറ്റത്.
