ന്യൂഡെല്ഹി: ചെറുതായി ഒന്നു പരിശ്രമിക്കണം എന്നതൊഴിച്ചാല് ഇന്ത്യയില് എലിയെ പിടിക്കുന്നത് ഒരു വലിയ കാര്യമായി ആരും എടുത്തേക്കില്ല. എന്നാല് നോര്ത്തേണ് റെയില്വേയുടെ ലഖ്നൗ ഡിവിഷന് എലിയെ പിടിക്കാന് ചെലവാക്കുന്ന തുക കേട്ടാല് ചിലപ്പോള് ആരുടേയും കണ്ണുതള്ളും. എലി ഒന്നിന് 41,000 രൂപയാണ് ഇവിടെ ചെലവഴിക്കപ്പെടുന്നത്.
എലി ഒന്നിന് 41,000 രൂപ എന്ന കണക്കില് 2020 നും 2022 നും ഇടയില് 168 എലികളെ പിടിക്കാന് ലഖ്നൗ ഡിവിഷന് ചെലവഴിച്ചത് 69.5 ലക്ഷം രൂപയാണ്. എലികളെ പിടിക്കാന് ലഖ്നൗ ആസ്ഥാനമായുള്ള എം/എസ് സെന്ട്രല് വെയര്ഹൗസിംഗ് കോര്പ്പറേഷന് 2019 മുതല് കരാര് നല്കിയിട്ടുണ്ടെന്ന് മറുപടിയില് പറയുന്നു. നീമച്ച് ആസ്ഥാനമായുള്ള മനുഷ്യാവകാശ പ്രവര്ത്തകന് ചന്ദ്രശേഖര് ഗൗര് സമര്പ്പിച്ച വിവരാവകാശ അപേക്ഷയ്ക്കുള്ള മറുപടിയിലാണ് ലഖ്നൗ ഡിവിഷന് ഇക്കാര്യം പറഞ്ഞിരിക്കുന്നത്.
ലഖ്നൗ ഡിവിഷന് ഒഴിവാക്കിയ എലികള് ഉണ്ടാക്കിയ നാശനഷ്ടത്തിന്റെ മൂല്യത്തെക്കുറിച്ച് മറുപടി നല്കിയില്ല. കേടായ സാധനങ്ങളുടെയും ഇനങ്ങളുടെയും വിശദാംശങ്ങള് ലഭ്യമല്ല. നാശനഷ്ടങ്ങള് വിലയിരുത്തിയിട്ടില്ല. എന്നായിരുന്നു നല്കിയ മറുപടി.
ഡല്ഹി, അംബാല, മൊറാദാബാദ്, ലഖ്നൗ, ഫിറോസ്പൂര് എന്നിവയുള്പ്പെടെ അഞ്ച് ഡിവിഷനുകളുള്ള മുഴുവന് നോര്ത്തേണ് റെയില്വേയ്ക്കും എലികളെ പിടിക്കാന് ചെലവഴിച്ച തുകയുടെ വിവരവും ഇയാള് ആവശ്യപ്പെട്ടിരുന്നു. എന്നാല് ലഖ്നൗ ഡിവിഷന് മാത്രമാണ് മറുപടി നല്കിയത്. ഫിറോസ്പൂര്, മൊറാദാബാദ് ഡിവിഷനുകള് ഒരു മറുപടിയും നല്കാന് കൂട്ടാക്കിയില്ല.
എന്നാല് അംബാല, ഡല്ഹി ഡിവിഷനുകള് ചില ചോദ്യങ്ങള്ക്ക് മാത്രം ഉത്തരം നല്കി. 2020 ഏപ്രിലിനും 2023 മാര്ച്ചിനും ഇടയില് കീടങ്ങള്, എലികള്, ഫ്യൂമിഗേഷന് എന്നിവയ്ക്കെതിരായ ചികിത്സയ്ക്കായി 39.3 ലക്ഷം രൂപ ചെലവഴിച്ചതായി അംബാല ഡിവിഷന് മറുപടി നല്കിയെങ്കിലും ഡിവിഷന് പ്രത്യേക ചെലവുകളും പിടിക്കപ്പെട്ട എലികളുടെ എണ്ണവും പരാമര്ശിച്ചിട്ടില്ല.
മറുവശത്ത്, പാസഞ്ചര് ട്രെയിനുകളില് കീടങ്ങളെയും എലികളെയും നിയന്ത്രിക്കുന്നതിനുള്ള കരാര് നല്കിയതായി മാത്രമാണ് ഡല്ഹി ഡിവിഷന് കൂടുതല് വിശദാംശങ്ങള് ഇല്ലാതെ നല്കിയ മറുപടിയില് പറഞ്ഞിരിക്കുന്നത്.
