തൃശൂര്: കരുവന്നൂര് സഹകരണ ബാങ്കിലെ ക്രമക്കേടുകളെക്കുറിച്ച് മുന് എം.പി: പി.കെ. ബിജുവിന് അറിയാമായിരുന്നെന്ന് ബാങ്ക് മുന് ഡയറക്ടര് ജോസ് ചക്രാംപിള്ളി. പി.കെ. ബിജുവും കൗണ്സിലര് പി.കെ. ഷാജനുമായിരുന്നു അന്വേഷണ കമ്മിഷനെന്നും അദ്ദേഹം വ്യക്തമാക്കി. സി.പി.എം. നേതാക്കളെ രക്ഷിക്കാന് ഭരണസമിതി അംഗങ്ങളെ ബലിയാടാക്കുകയായിരുന്നെന്നും ജോസ് ആരോപിച്ചു.
തട്ടിപ്പ് ശ്രദ്ധയില്പ്പെട്ടതിനെത്തുടര്ന്ന് സി.പി.എം. ജില്ലാ സെക്രട്ടറി എം.എം. വര്ഗീസിനെ 2019 മേയ് 13 ന് കാര്യങ്ങള് അറിയിച്ചിരുന്നു. അദ്ദേഹം ഇരിങ്ങാലക്കുട ഏരിയാ സെക്രട്ടറിയെ വിളിച്ചന്വേഷിച്ചു. തുടര്ന്ന് പരിഹാരം കാണാന് ഏരിയാ കമ്മിറ്റി ചേര്ന്നിരുന്നു. പിന്നെയുള്ള കാര്യങ്ങള് തനിക്കറിയില്ല. അന്വേഷണ കമ്മിഷനായിരുന്ന ബിജുവിനോടും ഷാജനോടും ജില്ലാ കമ്മിറ്റിയില് നേരിട്ടെത്തിയാണു കാര്യങ്ങള് വിശദീകരിച്ചത്. തുടര്ന്ന് അവര് ജില്ലാക്കമ്മിറ്റിക്കു റിപ്പോര്ട്ട് നല്കിയെന്നും അതില് തട്ടിപ്പ് സംബന്ധിച്ച വിവരങ്ങള് ഉണ്ടായിരുന്നുവെന്നുമാണ് മനസിലാക്കുന്നത്.
പി.കെ. ഷാജനും ജില്ലാ സെകട്ടറി എം.എം. വര്ഗീസുമായും വ്യക്തിപരമായി ബന്ധമുണ്ട്. ഇരുവരെയും കാര്യങ്ങള് ധരിപ്പിച്ചിരുന്നു. അപ്പോഴെല്ലാം ഒരു കുഴപ്പവും നിങ്ങള്ക്കു വരില്ലെന്നാണു ജില്ലാ സെക്രട്ടറി പറഞ്ഞത്.
എന്നാല് 2021 സെപ്റ്റംബര് 13 നു തന്നെ കേസുമായി ബന്ധപ്പെട്ട് അറസ്റ്റ് ചെയ്തു. അതിന്റെ തലേദിവസവും എം.എം. വര്ഗീസിനെ നേരിട്ടുകണ്ട് കാര്യങ്ങള് പറഞ്ഞിരുന്നു. എന്നാല് ജോസിന് ഒരു കുഴപ്പവുമുണ്ടാവില്ലെന്നു പറഞ്ഞ് ആശ്വസിപ്പിച്ചു തിരിച്ചയയ്ക്കുകയായിരുന്നു. മിനിറ്റ്സ് ബുക്കില് ഒപ്പിട്ടെന്നതാണ് തനിക്കെതിരേയുള്ള പരാതി. എന്നാല് തട്ടിപ്പുലോണുകളില് ഒന്നുപോലും തങ്ങളുടെ ഭരണകാലത്തല്ല കൊടുത്തിട്ടുള്ളതെന്നും ജോസ് പറഞ്ഞു.
