കൊച്ചി: വന്തോതില് പണമിടപാട് നടക്കുന്ന സ്ഥാപനങ്ങളിലെ റെയ്ഡുകള് വഴി എന്ഫോഴ്സ്മെന്റ് ഡയറക്ടറേറ്റ് (ഇ.ഡി.) ലക്ഷ്യമിടുന്നതു കേന്ദ്രസര്ക്കാരിന്റെ വരുമാനം വര്ധിപ്പിക്കല്. സംസ്ഥാന സര്ക്കാരിന്റെ കീഴിലുള്ള സ്ഥാപനങ്ങളും സ്വകാര്യ പണമിടപാടു സ്ഥാപനങ്ങളുമാണു പ്രധാനമായും ഇ.ഡി. ലക്ഷ്യമിടുന്നത്. ഇത്തരം സ്ഥാപനങ്ങളില് പണമിടപാടിന്റെ മറവില് വന്തോതില് കള്ളപ്പണം വെളുപ്പിക്കല് നടക്കാനിടയുണ്ടെന്ന കണ്ടെത്തലിലാണ് ഇ.ഡി. നീക്കം. കോടികളുടെ സ്വത്ത് കണ്ടുകെട്ടുക വഴി കേന്ദ്രസര്ക്കാരിനു കോടികളുടെ വരുമാനമാണു ലഭിക്കുന്നത്.
കോടികളുടെ പണവും സ്വര്ണ നിക്ഷേപങ്ങളും സ്വത്തുക്കളുമാണു പിടിച്ചെടുക്കുന്നത്. ആദ്യം സമ്പാദ്യം മരവിച്ചിച്ചശേഷം പിന്നെ അറ്റാച്ച് ചെയ്യുകമാണു ചെയ്യുന്നത്. കേസില് വിചാരണ പൂര്ത്തിയായി വിധിയും അപ്പീല് നടപടികളും പൂര്ത്തിയായശേഷം വെറുതെവിട്ടാല് മാത്രമേ സ്വത്ത് തിരികേ ലഭിക്കൂ. എന്നാല്, മിക്കവാറും കേസുകളില് ശിക്ഷ ശരിവയ്ക്കുകയാണു ചെയ്യുന്നത്.
സംസ്ഥാനത്തെ ചില സഹകരണ, സ്വകാര്യ ബാങ്കുകളില് കോടികളുടെ കള്ളപ്പണ നിക്ഷേപവും അതിന്റെ മറവില് പണം വെളുപ്പിക്കലും നടക്കുന്നുണ്ടെന്ന് ഇ.ഡി. കണ്ടെത്തിയിട്ടുണ്ട്. നോട്ട് നിരോധന കാലത്താണ് ഇതു കൂടുതലും നടന്നിട്ടുള്ളത്. കരുവന്നൂര് ബാങ്കില് മാാത്രം 400 കോടിയില്പരം രൂപയുടെ വെളുപ്പിക്കല് നടന്നുവെന്നാണ് ഇ.ഡിയുടെ നിഗമനം.
പണം കണ്ടുകെട്ടല് വഴി കോടികളുടെ വരുമാനമാണു കേന്ദ്ര സര്ക്കാരിനു ലഭിക്കുന്നത്. കള്ളപ്പണമായതിനാല്, കേസുമായി മുന്നോട്ടുപോകാനും പല കക്ഷികളും തയാറാവില്ല. മാത്രല്ല, പി.എം.എല്.എ. കേസില് നടപടികള് പൂര്ത്തിയാകാന് വര്ഷങ്ങളെടുക്കും.
പി.എം.എല്.എ. കേസുകളില് അന്വേഷണസംഘം ഉന്നയിക്കുന്ന ആരോപണങ്ങള് തെറ്റെന്നു സ്ഥാപിക്കേണ്ട ബാധ്യത പ്രതിക്കാണ്. കള്ളപ്പണ ഇടപാട് നടന്നിട്ടുണ്ടെങ്കില് പ്രതികള് കേസ് മുന്നോട്ടുകൊണ്ടുപോകാനും താല്പര്യം കാണിക്കില്ല. മാത്രമല്ല, പ്രതികളുടെ സ്വത്തെല്ലാം ഇ.ഡി. കണ്ടുകെട്ടുന്നതോടെ കേസ് നടത്താന്പോലും പണമുണ്ടാകില്ല.
സ്വത്ത് തിരിച്ചെടുക്കാന് പലരും താല്പര്യം കാണിക്കാത്തതും സര്ക്കാരിന്റെ വരുമാനം വര്ധിപ്പിക്കുന്നു. ഇ.ഡിയുടെ കണ്ടുകെട്ടല് വഴി സംസ്ഥാനസര്ക്കാരിനു യാതൊരു വരുമാനവും ലഭിക്കുന്നില്ല. സംസ്ഥാന സര്ക്കാരിന്റെ സാമ്പത്തിക കുറ്റാന്വേഷണ ഏജന്സിയായ വിജിലന്സ് ആന്ഡ് ആന്റി കറപ്ഷന് ബ്യൂറോയ്ക്കാകട്ടെ ഇത്തരത്തില് സ്വത്ത് കണ്ടുകെട്ടാനുള്ള അധികാരമുമില്ല. എന്നാല്, വിജിലന്സ് രജിസ്റ്റര് ചെയ്യുന്ന സാമ്പത്തിക തട്ടിപ്പുകേസുകളെല്ലാം ഇ.ഡി. ഏറ്റെടുത്തശേഷമാണു സ്വത്ത് അറ്റാച്ച്മെന്റ് തുടങ്ങിയ നടപടികളിലേക്കു കടക്കുന്നത്. റെയ്ഡുകളില് പരമാവധി സ്വത്തുക്കള് പിടിച്ചെടുത്തു മരവിപ്പിക്കുന്ന രീതിയാണു ഇ.ഡിക്കുള്ളത്. അതില് മുഴുവനും കക്ഷികള്ക്കു തിരിച്ചുകിട്ടാറുമില്ല.
