തിരുവനന്തപുരം: കരുവന്നൂര് ബാങ്ക് തട്ടിപ്പ് കേസില് എന്ഫോഴ്സ്മെന്റ് ഡയറക്ടറേറ്റിനെതിരെ (ഇ.ഡി) സിപിഎം സംസ്ഥാന നേതൃത്വം. കേസില് പാര്ട്ടിയെ പ്രതിക്കൂട്ടിലാക്കാനാണ് ഇ.ഡിയുടെ ശ്രമമെന്ന് സംസ്ഥാന സെക്രട്ടറി എം.വി ഗോവിന്ദന് ആരോപിച്ചു. അതിനായി അക്രമം നടത്തുന്നു. തട്ടിപ്പില് സിപിഎം സംസ്ഥാന നേതാക്കള്ക്ക് പങ്കുണ്ടെന്ന് ഇ.ഡി പറയുന്നത് ഇതിന്റെ ഭാഗമാണ്.
മൊഴിയെടുക്കുമ്പോള് ഭീഷണിപ്പെടുത്തി വ്യാജ തെളിവുകളുണ്ടാക്കാന് ശ്രമിക്കുകയാണ്. തെളിവുണ്ടാക്കാന് എ.സി മൊയ്തീന്റെ പേര് പറയാന് നിര്ബന്ധിച്ചു. മൊയ്തീന് ചാക്കില് പണം കൊണ്ടുപോകുന്നത് കണ്ടുവെന്ന് പറയാന് നിര്ബന്ധിച്ചു. കൗണ്സിലര് അരവിന്ദാക്ഷനെതിരെ ബലപ്രയോഗമുണ്ടായി. ഉത്തരേന്ത്യയില് നിന്നുള്ള ഉദ്യോഗസ്ഥരുടെ നേതൃത്വത്തിലാണ് ഭീഷണിപ്പെടുത്തുന്നത്. മകളുടെ വിവാഹ നിശ്ചയം പോലും നടക്കില്ലെന്ന് അരവിന്ദാക്ഷനെ ഭീഷണിപ്പെടുത്തി. കൊല്ലുമെന്ന് വരെ ഭീഷണിപ്പെടുത്തിയെന്നും എം.വി ഗോവിന്ദന് വാര്ത്താസമ്മേളനത്തില് ആരോപിച്ചു.
സംസ്ഥാനത്ത് ഇടത് മുന്നണി സര്ക്കാരിനെതിരെ കള്ള പ്രചാരവേല നടക്കുകയാണ്. മുഖ്യമന്ത്രിക്കും കുടുംബാംഗങ്ങള്ക്കും നേതാക്കള്ക്കുമെതിരെ കള്ള പ്രചാരവേല നടക്കുന്നുണ്ട്. സംസ്ഥാന സഹകരണ മേഖലയിലെ ഇഡി പരിശോധനയും ആ രൂപത്തിലാണ് കാണുന്നത്. സംസ്ഥാനത്ത് സഹകരണ പ്രസ്ഥാനം എല്ലാ മേഖലയിലും ഇടപെടുന്നുണ്ട്. സഹകരണ മേഖലയെ ഒതുക്കാന് കേന്ദ്ര ആഭ്യന്തര മന്ത്രി അമിത് ഷാ തന്നെ രംഗത്തുണ്ട്. കരുവന്നൂരില് സംസ്ഥാന സര്ക്കാര് സമഗ്ര അന്വേഷണം നടത്തിയതാണ്. ഇതിന് ശേഷം പാര്ട്ടിക്ക് ബന്ധമുണ്ടെന്ന് തെളിവുണ്ടെന്ന് വരുത്തിത്തീര്ക്കാന് ഇഡി ഉദ്യോഗസ്ഥര് ശ്രമിക്കുകയാണെന്നും അദ്ദേഹം കുറ്റപ്പെടുത്തി.
സര്ക്കാര് നല്ല രീതിയിലാണ് മുന്നോട്ട് പോകുന്നത്. വേണ്ട മാറ്റങ്ങള് വരുത്തും. എല്ലാ വകുപ്പും നല്ല രീതിയിലാണ് പോകുന്നത്. അധികാര കേന്ദ്രമാകാനുള്ള നീക്കം എല്ലാ തലത്തിലുമുണ്ട്. എല്ലാവര്ക്കും വീട് എന്ന പദ്ധതിയുമായി സര്ക്കാര് മുന്നോട്ട് പോകണം. കെ. ഫോണ്, എഐ ക്യാമറകള് യാഥാര്ത്ഥ്യമായത് നേട്ടമാണ്. ദേശീയപാതാ നിര്മ്മാണം പുരോഗമിക്കുന്നുണ്ട്. പ്രകടന പത്രികയില് പറഞ്ഞ കാര്യങ്ങള് നടപ്പാക്കാന് കഴിയണം. കേന്ദ്ര സര്ക്കാര് പണം നല്കാതെ സംസ്ഥാന സര്ക്കാരിനെ ബുദ്ധിമുട്ടിലാക്കുന്നുണ്ട്.
കടമെടുക്കാനുള്ള സംസ്ഥാനത്തിന്റെ പരിധി വെട്ടിക്കുറയ്ക്കുന്നത് കേരളത്തിലെ ജനങ്ങള്ക്കെതിരായ യുദ്ധമാണ്. ഭൂപതിവുമായി ബന്ധപ്പെട്ട പ്രശ്നം പരിഹരിച്ചു. 518 കോടി ദേവസ്വം ബോര്ഡിന് നല്കി. സര്ക്കാരിന്റെ പ്രവര്ത്തനം മൂന്നായി തിരിക്കും. കഴിഞ്ഞ സര്ക്കാര് തുടങ്ങിയത് പൂര്ത്തിയാക്കും, ഈ സര്ക്കാരിന്റെ പദ്ധതികള് പൂര്ത്തിയാക്കും. പുതിയ പദ്ധതികള് ഏറ്റെടുക്കുമെന്നും അദ്ദേഹം വ്യക്തമാക്കി.
മുഖ്യമന്ത്രിയുടെ കുടുംബത്തിനെതിരായത് കളള പ്രചാരണമാണെന്ന കാര്യത്തില് തര്ക്കമില്ല. വിശദമായി പരിശോധിച്ച ശേഷമാണ് പാര്ട്ടി തീരുമാനത്തിലെത്തിയത്. PV പിണറായിയല്ലെന്നും അത് പാര്ട്ടി പരിശോധിച്ച് ഉറപ്പാക്കി. താന് ചോദിച്ച ഏഴ് ചോദ്യങ്ങള്ക്ക് മാത്യു കുഴനാടന് കൃത്യമായ മറുപടി നല്കിയിട്ടില്ല. അത് പറഞ്ഞ ശേഷമാകാം ബാക്കിയെന്നും അദ്ദേഹം പറഞ്ഞു.
സഹകരണ മേഖലയില് ആക്ഷേപം ഒറ്റപ്പെട്ടതാണ്. കരുവനൂരില് സിപിഎമ്മിന് ഒന്നും മറച്ചുവെക്കാനില്ല. നഷ്ടപ്പെട്ട പണം തിരിച്ചു പിടിക്കാന് ശ്രമം നടക്കുന്നുണ്ട്. കരുവന്നൂരിന്റെ പേരില് സഹകരണ മേഖല മുഴുവന് അഴിമതിയാണെന്ന് പറയാന് കഴിയില്ലെന്നും അദ്ദേഹം പറഞ്ഞു.
