ചെറുതോണി: തടിയംപാട് ബിവറേജ് കോര്പറേഷന് ഔട്ട്ലെറ്റില് വിജിലന്സ് നടത്തിയ പരിശോധനയില് വ്യാപക ക്രമക്കേട് കണ്ടെത്തി.
കിഴക്കന്മേഖല പോലീസ് സൂപ്രണ്ട് വി.ജി. വിനോദ്കുമാറിനു ലഭിച്ച രഹസ്യവിവരത്തിന്റെ അടിസ്ഥാനത്തില് ജീവനക്കാര് അനധികൃതമായി ഗൂഗിള് പേ ഉള്പ്പെടെ പെയ്മെന്റ് ആപ്പുകള്വഴി പണംവാങ്ങി ചെറുകിട കച്ചവടക്കാര്ക്കു വന്തോതില് മദ്യം കൂടുതല് അളവില് വില്പന നടത്തുന്നതായും സ്റ്റോക്കില് കൃത്രിമം നടത്തുന്നതായും കണ്ടെത്തി.
ഡി.വൈ.എസ്.പി. ഷാജു ജോസിന്റെ നിര്ദേശാനുസരണം പോലീസ് ഇന്സ്പെക്ടര് അജിത്കുമാറും സംഘവും ഇടുക്കി തടിയമ്പാട് പ്രവര്ത്തിക്കുന്ന ഔട്ട്ലെറ്റില് 21നു വൈകിട്ട് 8.30 ന് നടത്തിയ മിന്നല് പരിശോധനയിലൂടെയാണ് ക്രമക്കേടുകള് കണ്ടെത്തിയത്. പരിശോധന ദിവസത്തെ ആകെ വിറ്റുവരവ് 14,86,350 രൂപയാണ്. തുടര്ന്ന് കളക്ഷന് തുക എണ്ണിതിട്ടപ്പെടുത്തിയതില് 14,94,650 രൂപ കണ്ടെത്തി.
ഇതു കണക്കു പ്രകാരമുള്ള തുകയേക്കാള് 8300 രൂപ കൂടുതലാണ്. ജീവനക്കാരുടെ െകെവശമുള്ള പണം പരിശോധിച്ചതില് ഒരു എല്.ഡി. ക്ലാര്ക്കിന്റെ െകെവശം 15,600 രൂപ അധികമായി കണ്ടെത്തി. കടയുടെ ചുമതലയുള്ള ഉദ്യോഗസ്ഥന് താമസിക്കുന്ന ഔട്ട്ലെറ്റിനു മുകളിലെ നിലയിലുള്ള മുറി പരിശോധിച്ചതില് 15,950 രൂപയും കമ്പനികളില് നിന്നും കമ്മിഷന് ലഭിക്കുന്ന കണക്കുകള് എഴുതി സൂക്ഷിക്കുന്ന ഡയറിയും കണ്ടെത്തി. ജീവനക്കാരുടെ വാഹനങ്ങള് പരിശോധിച്ചതില് ഒരു ജീവനക്കാരന്റെ കാറില് നിന്നും കണക്കില്പ്പെടാത്ത 7000 രൂപയും കണ്ടെത്തി.
കണക്കില്പ്പെടാത്ത 46,850 രൂപ പിടിച്ചെടുത്തു. ജീവനക്കാരുടെ ഗൂഗിള് പേ അക്കൗണ്ടുകള് പരിശോധിച്ചതില് നാലു ജീവനക്കാരുടെ അക്കൗണ്ടിലേക്ക് അനധികൃതമായി പണമിടപാടുകള് നടന്നതായി കണ്ടെത്തുകയും സ്റ്റോക്ക് പരിശോധിച്ചതില് വിവിധ തരത്തിലുള്ള മദ്യത്തിന്റെയും ബീയറിന്റെയും സ്റ്റോക്കില് വ്യത്യാസം കണ്ടെത്തുകയും ചെയ്തു.
അനധികൃതമായി കണ്ടെത്തിയ പണം ട്രഷറിയില് അടയ്ക്കുകയും പരിശോധനയില് കണ്ടെത്തിയ അപാകത സംബന്ധിച്ച് വിജിലന്സ് ഡയറക്ടര്ക്ക് റിപ്പോര്ട്ട് നല്കുകയും ചെയ്യുമെന്ന് പരിശോധനയ്ക്ക് നേതൃത്വം നല്കിയ പോലീസ് ഇന്സ്പെക്ടര് അജിത്കുമാര്, എസ്.ഐ: ഇ.എ മുഹമ്മദ്, എ.എസ്.ഐ. ബേസില് പി. ഐസക്, സീനിയര്സിവില് പോലീസ് ഓഫീസര്മാരായ കൃഷ്ണകുമാര്, ദിലീപ് കുമാര്, സിവില് പോലീസ് ഓഫീസര്മാരായ സന്ദീപ് ദത്തന്, ശ്രീജിത്ത് കൃഷ്ണന് എന്നിവര് അറിയിച്ചു.
