തെരുവുനായ്ക്കള് എന്നു കേള്ക്കുമ്പോള് തന്നെ കേരളക്കാര്ക്ക് പേടിയാണ്. കാരണം കഴിഞ്ഞ കുറച്ചു വര്ഷങ്ങളായി തെരുവുനായ്ക്കളില് നിന്ന് കടുത്ത ആക്രമണം നേരിട്ടിരിക്കൊണ്ടിരിക്കുകയാണ് ഇവിടുത്തെ ജനങ്ങള്. ഇവയുടെ ശല്യം രൂക്ഷമായപ്പോള് നായയുടെ കടിയേറ്റ് ആശുപത്രിയിലാകുന്നവരുടെ എണ്ണത്തില് വലിയ വര്ദ്ധനവാണ് രേഖപ്പെടുത്തിയത്. ഇതിന് പിന്നാലെ തെരുവ് നായ്ക്കളെ കൊല്ലണമെന്നും അതല്ല, നായ്ക്കളുടെ വംശവര്ദ്ധന തടഞ്ഞാല് മതിയെന്നുമുള്ള വാദങ്ങളുമായി നിരവധി ആളുകള് രംഗത്തെത്തി. എന്നാല് അതേ സമയം അങ്ങ് ബ്രസീലിലെ കരുവാരു രൂപതയിലെ പുരോഹിതനായ ഫാദര് ജോവോ പോളോ അറൗജോ ഗോമസ് തെരുവ് നായകള്ക്ക് വേണ്ടി തന്റെ പള്ളി വാതില് തന്നെ തുറന്നുനല്കിയിരിക്കുകയാണ്.
പള്ളിയിലെ പ്രര്ത്ഥനയ്ക്കിടയില് ഫാദര് ജോവോ പോളോ അറൗജോ ഗോമസിന് സമീപത്തായി ഒരു നായ നില്ക്കുന്ന ചിത്രം എക്സില് പങ്കുവയ്ക്കപ്പെട്ടതോടെയാണ് അദ്ദേഹം ലോക പ്രശസ്തനായത്. B&S എന്ന എക്സ് ഉപയോക്താവ് പങ്കുവച്ച ചിത്രം ഇതിനകം ആറ് ലക്ഷത്തിലേറെ ആളുകള് കണ്ടു കഴിഞ്ഞു. ചിത്രം പങ്കുവച്ച് കൊണ്ട് B&S ഇങ്ങനെ കുറിച്ചു, 'കരുവാരു രൂപതയില് നിന്നുള്ള ബ്രസീലിയന് പുരോഹിതന് ജോവോ പോളോ അറൗജോ ഗോമസ്, ഉപേക്ഷിക്കപ്പെട്ട നായ്ക്കളെ തെരുവില് നിന്ന് എടുത്ത് ഭക്ഷണം കൊടുക്കുകയും കുളിപ്പിക്കുകയും തുടര്ന്ന് ഓരോ സംഘത്തിനും ഒരു നായയെ ദത്തെടുക്കാന് സമര്പ്പിക്കുകയും ചെയ്യുന്നു. ഡസന് കണക്കിന് തെരുവ് നായ്ക്കള്ക്ക് വൈദികന്റെ അനുഗ്രഹത്താല് ഇതിനകം വീടുണ്ട്.'
പലപ്പോഴും തന്നോടൊപ്പമുള്ള നായ്ക്കളെ അദ്ദേഹം കുര്ബാനയില് പങ്കെടുപ്പിക്കാറുണ്ട്. മാത്രമല്ല പള്ളിയിലെ ഓരോ പ്രാര്ത്ഥനാ ശ്രുശ്രൂഷയ്ക്ക് ശേഷവും താന് രക്ഷിച്ച ഏതെങ്കിലും ഒരു നായയെ ദത്തെടുക്കാന് അദ്ദേഹം വിശ്വാസികളോട് ആവശ്യപ്പെടാറുണ്ട്. പൗരോഹിത്യം ഏറ്റെടുത്ത 2013 മുതല് അദ്ദേഹം ഇത്തരത്തില് തെരുവ് നായ്ക്കളെ സംരക്ഷിക്കുകയും അവയെ ദത്തെടുക്കാന് വിശ്വാസികളോട് ആവശ്യപ്പെടുകയും ചെയ്യുന്നു. എക്സില് പോസ്റ്റ് വൈറലായതിന് പിന്നാലെ ലോകമെങ്ങുനിന്നുമുള്ള നിരവധി വിശ്വാസികളാണ് അദ്ദേഹത്തിന് പിന്തുണയുമായി എത്തിയത്. ഇദ്ദേഹം ചെയ്യുന്നതാണ് യഥാര്ത്ഥ ക്രിസ്തുമതം എന്നാണ് പോസ്റ്റ് കണ്ട പലരും അഭിപ്രായപ്പെട്ടത്.
Brazilian priest João Paulo Araujo Gomes, from the Diocese of Caruaru, takes abandoned dogs off the streets, feeds them, bathes them, and then presents a dog to each mass, to be adopted. Dozens of stray dogs already have a home thanks to the priest. pic.twitter.com/7BbmrPX7a8
— B&S (@_B___S) September 21, 2023
