ഷാരോണ് വധ കേസില് ഗ്രീഷ്മക്ക് ഹൈക്കോടതിയില് നിന്ന് ജാമ്യം അനുവദിച്ചെങ്കിലും ജയില് മോചനം നീണ്ടേക്കും. പൊലീസ് കസ്റ്റഡിയിലിരികെ ബാത്റൂം ക്ലീനര് കഴിച്ച് ആത്മഹത്യക്ക് ശ്രമിച്ചതിനാല് ആ കേസില് കൂടി ജാമ്യം ലഭിച്ചാല് മാത്രമേ ഗ്രീഷ്മയ്ക്ക് ജയില് മോചിതയാകാനായി സാധികൂ.ഈ കേസ് പരിഗണിക്കുന്നത് പാറശ്ശാല കോടതിയാണ്. ഒപ്പം, ഹൈക്കോടതി അനുവദിച്ച ജാമ്യത്തില് വിചാരണ കോടതിയായ നെയ്യാറ്റിന്കര കോടതിയില് രണ്ട് ലക്ഷം രൂപ കെട്ടിവയ്ക്കുകയും വേണം. അട്ടക്കുളങ്ങര ജയിലില് കഴിഞ്ഞിരുന്ന ഗ്രീഷ്മയെ കഴിഞ്ഞ 15 ന് സഹത്തടവുകരുടെ പരാതിയെ തുടര്ന്ന് ആലപ്പുഴ സബ് ജയിലിലേക്ക് മാറ്റുകയായിരുന്നു.
ഹൈക്കോടതി ഉപാധികളോയെയാണ് ഗ്രീഷ്മയ്ക്ക് ജാമ്യം അനുവദിച്ചത്. വിചാരണ നീണ്ടു പോകുന്നതും കൂടി കണക്കിലെടുത്താണ് ജാമ്യം. അന്വേഷണം പൂര്ത്തിയായതായും ഗ്രീഷ്മ ചൂണ്ടിക്കാട്ടി. ഗ്രീഷ്മയെ 2022 ഒക്ടോബര് 31 നാണ് അറസ്റ്റിലായത്. കേസില് കുറ്റപത്രം സമര്പ്പിച്ചിരുന്നു.
കേസില് 142 സാക്ഷികളും 55 തൊണ്ടിമുതലുകളുമാണുള്ളത്. കൊലപാതകത്തില് പങ്കുള്ള ഗ്രീഷ്മയുടെ അമ്മാവനും അമ്മയും കൂട്ടുപ്രതികളാണ്. ഷാരോണിനെ ഒഴിവാക്കാന് ഗ്രീഷ്മ ആസൂത്രിത കൊലപാതകമാണ് നടത്തിയതെന്ന് കുറ്റപത്രത്തില് പറയുന്നു. സെക്സ് ചാറ്റിലൂടെ ലൈംഗിക ബന്ധത്തിന് വീട്ടിലേക്കു ക്ഷണിച്ചുവരുത്തിയാണ് ഷാരോണിനെ കൊലപ്പെടുത്തിയതെന്നും കാര്പ്പിക്ക് എന്ന കളനാശിനിയാണ് കഷായത്തില് കലര്ത്തിയതെന്നും കുറ്റപത്രത്തില് വ്യക്തമാക്കുന്നു.കുറ്റപത്രം സമര്പ്പിച്ചത് നെയ്യാറ്റിന്കര മജിസ്ട്രേറ്റ് കോടതിയിലാണ്. കുറ്റ പാത്രത്തിലുള്ളത് 142 സാക്ഷിമൊഴികളും 57 രേഖകളുമാണ്.
ഗ്രീഷ്മയെ അറസ്റ്റ് ചെയ്ത് 85ാമത്തെ ദിവസമാണ് കുറ്റപത്രം നല്കിയത്.ഗ്രീഷ്മ കാമുകനായ ഷാരോണിന് കഴിഞ്ഞ വര്ഷം ഒക്ടോബര് 14 നായിരുന്നു കഷായത്തില് വിഷം കലര്ത്തി നല്കിയത്. ശാരീരിക അസ്വാസ്ഥ്യതയുണ്ടായ ഷാരോണിനെ ആശുപത്രിയില് പ്രവേശിപ്പിക്കുകയും 25ന് മരിക്കുകയും ചെയ്തു. മരണമൊഴിയില്പോലും തന്റെ കാമുകിയായിരുന്ന ഗ്രീഷ്മയെ ഷാരോണ് സംശയിച്ചിരുന്നില്ല. പാറശ്ശാല പൊലീസ് ആദ്യം സാധാരണ മരണമെന്ന് നിഗമനത്തിലെത്തിയിരുന്നു. എന്നാല് പ്രത്യേക സംഘം നടത്തിയ അന്വേഷണത്തിലും ചോദ്യം ചെയ്യലിനും ശേഷം ഗ്രീഷ്മ കുറ്റം സമ്മതിക്കുകയായിരുന്നു.മകള് കൊലപാതകിയാണെന്ന് മനസിലാക്കിയ അമ്മ സിന്ധുവും അമ്മാവന് നിര്മ്മല് കുമാരന് നായരും ചേര്ന്ന് തെളിവുകള് നശിപ്പിച്ചുവെന്ന് പൊലീസ് കുറ്റപത്രത്തില് പറയുന്നു. പ്രതികള്ക്കെതിരെ ചുമത്തിയട്ടുള്ളത് കൊലപാതകം, തെളിവ് നശിപ്പിക്കല് എന്നീ കുറ്റകൃത്യങ്ങളാണ്.
