ബീജിംഗ്: ഏഷ്യന് ഗെയിംസില് വുഷുവില് വെള്ളി നേടിയ ഇന്ത്യന് താരം റോഷിബിനാ ദേവി മണിപ്പൂര് കലാപത്തെ ഓര്ത്ത് ആശങ്കയില്. 60 കിലോ വിഭാഗത്തില് വെളളിനേടിയ താരം നാട്ടിലെ മാതാപിതാക്കളെ ഓര്ത്ത് വിതുമ്പി. മണിപ്പൂരിലെ ബിഷ്ണുപ്പൂര് ജില്ലയില് നിന്നുള്ള താരമാണ് റോഷിബിനാ.
ഇവിടുത്തെ ക്വാസിഫായ് മായൈ ലെയ്കി ഗ്രാമത്തില് നിന്നുമാണ് വുഷു താരം വരുന്നത്. ഇംഫാലില് നിന്നും ബിഷ്ണുപ്പൂരില് എത്താന് ഒരു മണിക്കൂര് വേണം. ഗെയിംസ് വില്ലേജില് നിന്നും എല്ലാ ദിവസവും റോഷിബിനാ മാതാപിതാക്കളെ വിളിക്കുമായിരുന്നു. പരിശീലനത്തിലെ സന്തോഷങ്ങള് പങ്കുവെയ്ക്കാനല്ല ഈ വിളി. പകരം മാതാപിതാക്കള്ക്ക് കുഴപ്പമൊന്നുമില്ലെന്ന് ഉറപ്പിക്കാനായിരുന്നു.
കഴിഞ്ഞ നാലുമാസമായി മണിപ്പൂരില് കലാപം കുഴഞ്ഞുമറിയുകയാണ്. റോഷിബിനയുടെ പിതാവ് കര്ഷകനാണ്. പ്രതിഷേധങ്ങളിലും പങ്കെടുത്തിരുന്നു. പിതാവ് പുറത്തുപോകുമ്പോള് മറ്റുള്ളവര്ക്കൊപ്പം ഗ്രാമത്തിന് മാതാവ് കാവലിരിക്കും.
തന്റെ വീട് പോലീസ് സ്റ്റേഷന് തൊട്ടടുത്താണെങ്കിലും പോലീസുകാരും ഭീഷണിയ്ക്ക് കീഴിലാണെന്ന് താരം പറയുന്നു. തന്റെ വിജയം സുഹൃത്തുക്കളായ ഒനിലു, ന്യെമാന്, വാംഗ്സൂ, മെപ്പംഗ് ലാംഗു എന്നിവര്ക്കാണ് താരം സമര്പ്പിച്ചിരിക്കുന്നത്.
ന്യൂമാന് വാംഗ്സൂവും ഒനിലുവും ലാംഗുവും അരുണാചല് പ്രദേശില് നിന്നുള്ളവരായതിനാല് ഇവര്ക്ക് ചൈന വിസ അനുവദിക്കാതെ വന്നതിനെ തുടര്ന്ന് മത്സരത്തില് പങ്കെടുക്കാനായിരുന്നില്ല. തന്റെ വിജയം കാണാന് ഒനിലു ഇവിടെ ഉണ്ടാകണമായിരുന്നു എന്നും താരം പറഞ്ഞു.
സ്വര്ണ്ണമെഡല് നേട്ടത്തിനുള്ള പോരാട്ടത്തില് മണിപ്പൂര് താരം പരാജയപ്പെട്ടത് ചൈനീസ് താരത്തോടായിരുന്നു. വു സിയാവോവിയോട് പരാജയപ്പെട്ടതാണ് താരത്തിന് വെള്ള മെഡലാകാന് കാരണമായത്.
