ന്യൂഡല്ഹി: പരസ്പര സമ്മതത്തോടെ ശാരീരികബന്ധത്തില് ഏര്പ്പെടുന്നതിലുള്ള കുറഞ്ഞ പ്രായത്തില് മാറ്റം വരുത്തരുതെന്ന് കേന്ദ്രനിയമ കമ്മിഷന് ശിപാര്ശ. നിലവിലെ 18 വയസ് തന്നെ നിലനിര്ത്തുന്നതാണ് ഉചിതമെന്ന ശിപാര്ശ കേന്ദ്ര നിയമമന്ത്രാലയത്തിനു നല്കിയതായി വാര്ത്താ ഏജന്സി റിപ്പോര്ട്ട് ചെയ്തു.
പോക്സോ നിയമപ്രകാരം െലെംഗിക ബന്ധത്തിന് അനുമതി നല്കാവുന്ന കുറഞ്ഞ പ്രായം 16 ആയി കുറയ്ക്കണമെന്നായിരുന്നു ആവശ്യം. എന്നാല്, സമ്മതപ്രായം കുറയ്ക്കുന്നത് െശെശവ വിവാഹം, കുട്ടിക്കടത്ത് ഉള്പ്പെടെയുള്ളവയ്ക്കെതിരായ പോരാട്ടങ്ങളെ പ്രത്യക്ഷത്തിലും പ്രതികൂലമായും ബാധിച്ചേക്കാമെന്ന ആശങ്ക 22-ാം കേന്ദ്ര നിയമ കമ്മിഷന് പ്രകടിപ്പിച്ചു.
അതേസമയം, പോക്സോ നിയമംവച്ച് കൗമാരക്കാരുടെ ലൈംഗിക ബന്ധത്തെ കണ്ണുമടച്ച് കുറ്റകരമായി കാണുന്നതില് കമ്മിഷന് ആശങ്കയും പ്രകടിപ്പിച്ചു. 16-18 പ്രായക്കാര് ഉള്പ്പെട്ട, ഉഭയസമ്മതത്തോടെയും മൗനാനുവാദത്തോടെയുമുള്ള മാനഭംഗക്കേസുകളില് ശിക്ഷവിധിക്കുന്നത് ജഡ്ജിമാരുടെ വിവേചനാധികാരത്തില് ഉള്പ്പെടുത്തണമെന്നതാണു മറ്റൊരു പ്രധാന ശിപാര്ശ. പ്രായം പതിനാറോ അതിനു മുകളിലോ ആയിരിക്കുകയും ഇരുവരും തമ്മിലുള്ള പ്രായവ്യത്യാസം മൂന്നുവര്ഷത്തില് അധികരിക്കാത്തതുമായ സാഹചര്യത്തില് കുറഞ്ഞശിക്ഷയില് ഇളവു നല്കുന്ന കാര്യം കോടതികളുടെ വിവേചനാധികാരത്തിനു വിടണം.
ഓരോ കേസുകളിലെയും സവിശേഷ സാഹചര്യം പരിഗണിച്ച് ന്യായാധിപര്ക്ക് ഉചിതമായ തീരുമാനം െകെക്കൊള്ളാം. ഉഭയകക്ഷിസമ്മതം, മൗനാനുവാദം, പങ്കാളികള് തമ്മിലുള്ള സ്നേഹബന്ധം തുടങ്ങിയ ഘടകങ്ങള് വിചാരണാവേളയില് ജഡ്ജിമാര് വിശകലനം ചെയ്യണം. തുടര്ന്ന് ശിക്ഷ വിധിക്കുന്നതില് തീരുമാനമെടുക്കാം. ഇതിനായി ആവശ്യമെങ്കില് നിയമഭേദഗതിയടക്കം പരിഗണിക്കണമെന്നും ഋതുരാജ് അവസ്തി തലവനായ സമിതി സമര്പ്പിച്ച റിപ്പോര്ട്ടില് ചൂണ്ടിക്കാട്ടുന്നു. ജൂവെനെല് ജസ്റ്റിസ് നിയമത്തില് ഭേദഗതിക്കും നിയമ കമ്മിഷന് ശിപാര്ശ ചെയ്തു.
പതിനാറിനും പതിനെട്ടിനും ഇടയില് പ്രായമുള്ളവര് ഉള്പ്പെട്ട പോക്സോ കേസുകള് ക്രിമിനല് കോടതികള് കേള്ക്കുന്നതിനു പകരം ജുവെനെല് ജസ്റ്റിസ് ബോര്ഡ് പരിഗണിക്കുന്ന രീതിയില് ജൂവെനെല് ജസ്റ്റിസ് നിയമം പൊളിച്ചെഴുതണം. തടവുശിക്ഷയ്ക്കു പകരം താക്കീത് നല്കല്, കമ്യൂണിറ്റി സേവനം, കൗണ്സലിങ്, നല്ലനടപ്പിനുള്ള ഉപാധിയോടെയുള്ള മോചനം എന്നിവ ഉള്പ്പെടുത്തി ജൂവെനെല് ജസ്റ്റിസ് നിയമത്തിന്റെ 18-ാം വകുപ്പ് പരിഷ്കരിക്കുന്നത് ഉചിതമായിരിക്കുമെന്നും കമ്മിഷന് ചൂണ്ടിക്കാട്ടി.
