ന്യൂഡല്ഹി: ഇന്ത്യന് ക്രിക്കറ്റ് താരം ശിഖര് ധവാന് വിവാഹമോചനം അനുവദിച്ച് ഡല്ഹി ഹൈക്കോടതി. പിരിഞ്ഞുകഴിയുന്ന ഭാര്യ അയേഷ മുഖര്ജിയില്നിന്ന് താരം ക്രൂരതയും മാനസിക യാതനകളും അനുഭവിക്കുന്നതായി കോടതി വിലയിരുത്തി. വര്ഷങ്ങളായി ഏകമകനില് നിന്നു വേര്പെട്ടു ജീവിക്കുന്ന ധവാനെ ഭാര്യ സമ്മര്ദത്തിലാക്കിയതായും താരം അതിന്റെ മാനസിക വേദനയിലായിരുന്നെന്നും ഡല്ഹി പാട്യാല ഹൗസ് കോപ്ലക്സിലെ കുടുംബകോടതി വ്യക്തിമാക്കി.
വിവാഹ മോചനം ആവശ്യപ്പെട്ടുളള ഹര്ജിയില് ധവാന് ഭാര്യയ്ക്കെതിരായി ഉന്നയിച്ച ആരോപണങ്ങള് ശരിയാണെന്നു കോടതി കണ്ടെത്തി. ഭാര്യ മാനസികമായി ക്രുരതയ്ക്ക് ഇരയാക്കിയതായി ധവാന് കോടതിയില് പരാതിപ്പെട്ടിരുന്നു. 2012 ഒക്ടോബറിലാണ് അയേഷ മുഖര്ജിയും ധവാനും വിവാഹിതരായത്. ആദ്യ വിവാഹത്തില് അയേഷയ്ക്കു രണ്ടു പെണ്മക്കളുണ്ട്.
‘ഒരു കാര്യത്തിലെ അന്തിമ തീരുമാനം സ്വയം എടുക്കേണ്ടതാണ് അതില് ഞാന് പരാജയപ്പെട്ടു. ഞാന് ആര്ക്കെതിരെയും വിരല് ചൂണ്ടുന്നില്ല. എന്റെ വിവാഹമോചന കേസ് നടന്നുകൊണ്ടിരിക്കുകയാണ്.നാളെ എനിക്കു മറ്റൊരു വിവാഹം ചെയ്യേണ്ടി വന്നാല് എനിക്ക് അക്കാര്യത്തില് കൂടുതല് വിവേകത്തോടെ തീരുമാനമെടുക്കാനാകും. എങ്ങനെയുളള പെണ്കുട്ടിയെയാണ് എനിക്കു വേണ്ടതെന്നു എനിക്കു മനസ്സിലാക്കാന് സാധിക്കും’ അടുത്തിടെ നല്കിയ ഒരഭിമുഖത്തില് ധവാന് പറഞ്ഞിരുന്നു.
അതേസമയം ധവാന്റെയും അയേഷയുടെയും മകന് ആര്ക്കൊപ്പം ജീവിക്കുമെന്ന കാര്യത്തില് കോടതി നിലപാടെടുത്തിട്ടില്ല. മകനെക്കാണാനും ആവശ്യമുളളപ്പോള് വീഡിയോ കോള് ചെയ്യാനുമുളള അനുവാദം ധവാന് കോടതി നല്കിയിട്ടുണ്ട്. മക്കള്ക്കൊപ്പം ഓസ്ട്രേലിയയിലാണ് അയേഷ മുഖര്ജി താമസിക്കുന്നത്. സ്കൂള് അവധിക്കാലത്തിന്റെ പകുതി സമയം കുട്ടിയെ ഇന്ത്യയിലെ ധവാന്റെ കുടുംബത്തോടൊപ്പം കഴിയാന് അനുവദിക്കണമെന്നും കോടതി നിലപാടെടുത്തു.
