അല്പം ഗൗരവമെന്നു തോന്നിപ്പിക്കുന്ന സംഭവങ്ങള്ക്കിടയില് അപ്രതീക്ഷിതമായി ചിരിയുണര്ത്തുന്ന ചില സന്ദര്ഭങ്ങള് ഉണ്ടാകാറുണ്ട്. ഇത് സംബന്ധിക്കുന്ന നിരവധി വീഡിയോകള് സമൂഹ മാധ്യമങ്ങളില് വൈറലാകാറുണ്ട്. ഇവയില് ഭൂരിഭാഗവും മറ്റുള്ളവരെ സഹായിക്കാന് ചെന്ന് ഒടുവില് സ്വയം പണി വാങ്ങിക്കൂട്ടുന്ന ആളുകളെ കുറിച്ചുള്ളതായിരിക്കും. ഇത്തരം ഒരു വീഡിയോയാണ് കഴിഞ്ഞ ദിവസം സമൂഹമാധ്യമങ്ങളില് നെറ്റീസണ്സിനെ പൊട്ടിച്ചിരിപ്പിച്ചത്.
@Godman Chikna എന്ന എക്സ് ഉപയോക്താവാണ് വീഡിയോ തന്റെ അക്കൗണ്ടില് പങ്കുവച്ചത്. സ്കൂട്ടറില് നിന്നും വീണ രണ്ട് പെണ്കുട്ടികളെ സഹായിക്കാനായി ഓടിയെത്തിയ ഒരു മനുഷ്യന് സംഭവിച്ച അമളിയാണ് വീഡിയോയില് കാണുന്നത്. ഈ ദൃശ്യങ്ങള് കണ്ടാല് ആരായാലും ഒന്നും ചിരിച്ചുപോകുമെന്നതില് സംശയമില്ല. വീഡിയോയുടെ തുടക്കത്തില് ഒരു വലിയ ജലാശയത്തിന് സമീപത്തെ റോഡില് നിര്ത്തിയിട്ടിരിക്കുന്ന കാറിന്റെ മുന്നില് സ്കൂട്ടറില് വന്ന രണ്ട് യുവതികള് നില തെറ്റി വീഴുന്നതാണ് കാണുന്നത്. പുറകിലിരുന്ന യുവതി ഇറങ്ങുന്നതിന് മുമ്പ് തന്നെ മുന്നിലിരിക്കുന്ന യുവതിയുടെ നിലതെറ്റുകയും സ്കൂട്ടര് മറിയുകയുമായിരുന്നു. പിന്നാലെ പുറകിലിരുന്ന യുവതിയും വീഴുന്നു. ഈ സമയം, യുവതികള് ആവശ്യപ്പെടാതെ തന്നെ അവര്ക്ക് പുറകിലെ റോഡില് നിന്ന് ഒരാള് ഓടി വരികയും സ്കൂട്ടര് ഉയര്ത്താന് ശ്രമിക്കുകയും ചെയ്യുന്നു.
വീണു കിടന്ന യുവതികള് എഴുന്നേറ്റ് നോക്കുമ്പോള് കാണുന്നത്, സഹായിക്കാനായി ഓടിവന്ന ആള്, വീണ് കിടന്ന വണ്ടിയുടെ ആക്സിലേറ്ററില് പിടിച്ച് ഉയര്ത്താന് ശ്രമിക്കുകയും വണ്ടി അയാളെയും കൊണ്ട് സമീപത്തെ വിശാലമായ വെള്ളക്കെട്ടിലേക്ക് വീഴുന്നതുമായിരുന്നു. അപ്രതീക്ഷിതമായുണ്ടായ ആ വീഴ്ചയില് യുവതികള് തലയില് കൈവച്ച് നില്ക്കുന്നതും കാണാം. ഈ സമയം വീഡിയോ ചിത്രീകരിച്ച സിസിടിവി സ്ഥാപിച്ച കെട്ടിടത്തില് നിന്നും ഒരാള് ഓടി സ്കൂട്ടര് വീണ വെള്ളം നിറഞ്ഞ പാടത്തേക്ക് പോകുന്നതും വീഡിയോയില് കാണാം. വീഡിയോ ഒറ്റ ദിവസം കൊണ്ട് ഏതാണ്ട് എണ്പത്തിയൊമ്പതിനായിരത്തോളം പേര് കണ്ടു. നിരവധി പേരാണ് വീഡിയോയ്ക്ക് കുറിപ്പെഴുതാനെത്തിയത്.
നിമിഷ നേരങ്ങള്ക്കുള്ളില് വൈറലായ വീഡിയോ കണ്ട് നിരവധി പേര് പക്ഷത്ത് നിന്ന് സംസാരിച്ചു. ഒരു കൂട്ടര് ആരെയെങ്കിലും സഹായിക്കാന് പോയാല് സ്വയം പണി വാങ്ങേണ്ടി വരുമെന്ന് എഴുതി. മറ്റ് ചിലര്, സഹായിക്കാന് ശ്രമിച്ചയാളുടെ മനസിനെ വാഴ്ത്തി. ''ആരുടെയെങ്കിലും പ്രശ്നത്തില് സഹായിക്കുന്നത് എല്ലാവര്ക്കും കൂടുതല് പ്രശ്നങ്ങള് സൃഷ്ടിച്ചേക്കാം.'' എന്നായിരുന്നു ഒരു കാഴ്ചക്കാരനെഴുതിയത്. ''വീണ സ്കൂട്ടി ഉയര്ത്തുന്നതിന് മുമ്പ് എല്ലായ്പ്പോഴും ഇഗ്നീഷ്യന് ഓഫ് ചെയ്യുക.'' എന്ന് മറ്റൊരാള് ഉപദേശിച്ചു. ഏതായാലും ഭൂരിഭാഗം ആളുകളെയും വീഡിയോ അല്പനേരത്തേക്ക് ചിരിപ്പിച്ചു എന്ന കാര്യത്തില് തര്ക്കമില്ല.
Helping in someone’s problem can create more problems for everyone. 😂 pic.twitter.com/eZeEp6kO5x
— Godman Chikna (@Madan_Chikna) October 3, 2023
