ജീവിതത്തിലെ ഏറ്റവും സുപ്രധാനമായ നിമിഷമാണ് വിവാഹം. അന്നേ ദിവസം തന്റെ പ്രിയപ്പെട്ടവര്ക്കൊപ്പമുള്ള ഗംഭീര നിമിഷങ്ങളായിരിക്കും ഓരോ വധുവരന്മാരും സ്വപ്നം കാണുന്നത്. ജീവിതത്തില് എന്നും ഓര്ത്തിരിക്കാനുള്ള നല്ല ഓര്മ്മകള് നെയ്തെടുക്കാനും വിവാഹം വഹിക്കുന്ന പങ്ക് വലുത് തന്നെയാണ്. എന്നാല് വിധി എല്ലാവര്ക്കും അനുകൂലമാകണമെന്ന് നിര്ബന്ധമില്ല. കാരണം ചിലര് വിവാഹം ആഘോഷകരമാക്കുമ്പോള് മറ്റ് ചിലര് വന് ദുരന്തത്തിനായിരിക്കും സാക്ഷ്യം വഹിക്കുന്നത്. ഇതിന് ഉദാഹരണമാണ് കഴിഞ്ഞ ദിവസം ഒരു വിവാഹ ചടങ്ങിനിടയില് നടന്ന ദാരുണ സംഭവം.
ടെക്സസിലാണ് ഞെട്ടിക്കുന്ന സംഭവം ഉണ്ടായിരിക്കുന്നത്. വിവാഹച്ചടങ്ങില് വച്ച് ഒരു മുത്തച്ഛന് തന്റെ കൊച്ചുമകനെ വെടിവച്ചു. മൈക്കിള് ഗാര്ഡ്നെര് എന്ന 69 -കാരന് നെബ്രാസ്കയില് ഒരു വിവാഹച്ചുമതല വഹിക്കുകയായിരുന്നു. ആ സമയത്ത് വിവാഹമോതിരം എവിടെയാണ് വച്ചത് എന്ന് മറന്നു പോയി. അത് കാരണം വിവാഹ ചടങ്ങുകള് വൈകുകയും ചെയ്തു. ഇതേ തുടര്ന്ന് ആളുകളുടെ ശ്രദ്ധ ആകര്ഷിക്കുന്നതിന് വേണ്ടിയാണ് മൈക്കിള് തോക്ക് ഉപയോഗിച്ചത്. വെടിയുതിര്ത്തത് വായുവിലേക്കാണെങ്കിലും ആ സമയത്ത് തോക്ക് ആളുടെ കയ്യില് നിന്നും താഴെ വീഴുകയും ഇയാളുടെ തന്നെ കൊച്ചുമകന്റെ ദേഹത്ത് വെടിയേല്ക്കുകയും ആയിരുന്നു. ഇയാളുടെ കയ്യിലുണ്ടായിരുന്നത് ബ്ലാങ്ക് ഗണ് ആണ് എന്നാണ് പുറത്തുവരുന്ന റിപ്പോര്ട്ട്.
വെടിവയ്പ്പില് കുട്ടിക്ക് പരിക്കേറ്റതോടെ വിവാഹത്തിനെത്തിയ അതിഥികള് പരിഭ്രാന്തിയിലായി. അധികം വൈകാതെ തന്നെ കുട്ടിയെ പരിസരത്തെ ആശുപത്രിയില് പ്രവേശിപ്പിച്ചു. പിന്നീട്, മറ്റൊരു ആശുപത്രിയിലേക്ക് മാറ്റി. ജീവന് അപകടത്തിലാക്കും വിധം ഗൗരവമുള്ളതല്ല കുട്ടിയുടെ പരിക്കുകള്. മൈക്കിള് സ്വയം തന്നെ പോലീസില് ഹാജരാവുകയായിരുന്നു. പിന്നാലെ, ഇയാളുടെ അറസ്റ്റ് രേഖപ്പെടുത്തി. കുട്ടികള്ക്ക് നേരെയുള്ള അതിക്രമ പ്രകാരമാണ് കേസെടുത്തിരിക്കുന്നത്.
