ന്യൂഡല്ഹി: ഹമാസ് ആക്രമണത്തിനു പിന്നാലെ യുദ്ധം പ്രഖ്യാപിച്ചതോടെ ഇസ്രയേലില് കുടുങ്ങിയ ഇന്ത്യക്കാരില് മേഘാലയയില്നിന്നുള്ള രാജ്യസഭാംഗവും. ഭരണകക്ഷിയായ നാഷണല് പീപ്പിള്സ് പാര്ട്ടി(എന്.പി.പി)യുടെ മുതിര്ന്ന അംഗവും രാജ്യസഭാ എം.പിയുമായ ഡോ. വാന്വീറോയ് ഖാര്ലൂഖിയും ഭാര്യയും മകളുമാണ് ബത്ലഹേമില് കുടുങ്ങിയത്.
ഇവരെക്കൂടാതെ ജറുസലേം തീര്ഥാടനത്തിനെത്തിയ സംഘത്തില്പ്പെട്ട 24 ഇന്ത്യന്പൗരന്മാരും ഇവിടെ കുടുങ്ങിയിട്ടുണ്ട്. ഇവരെ സുരക്ഷിതമായി നാട്ടിലെത്തിക്കുന്നത് ഉറപ്പാക്കാന് വിദേശകാര്യ മന്ത്രാലയവുമായി ബന്ധപ്പെട്ടുകൊണ്ടിരിക്കുകയാണെന്ന് മേഘാലയ മുഖ്യമന്ത്രി കോണ്റാഡ് സാങ്മ പറഞ്ഞു. ഇന്ത്യന് പൗരന്മാര് ജാഗ്രത പാലിക്കണമെന്ന് ഇസ്രയേലിലെയും ഈജിപ്തിലെയും ഇന്ത്യന് എംബസികള് മുന്നറിപ്പ് നല്കിയിട്ടുണ്ട്. അനാവശ്യ യാത്രകള് ഒഴിവാക്കി സുരക്ഷിത സ്ഥലത്തു തുടരണമെന്നാണു നിര്ദേശം.
പ്രാദേശിക ഭരണകൂടം നല്കുന്ന നിര്ദേശങ്ങള് പാലിക്കണം. അടിയന്തര സാഹചര്യമുണ്ടായാല് ഇന്ത്യന് എംബസിയുമായി ബന്ധപ്പെടണമെന്നും നിര്ദേശമുണ്ട്. തെക്കന് ഇസ്രയേലില് താമസിക്കുന്നവര് വീടിനു പുറത്തിറങ്ങരുതെന്ന് സര്ക്കാര് മുന്നറിയിപ്പ് നല്കിയിട്ടുണ്ട്.
ഇന്ത്യന് എംബസിയുമായി നിരന്തരം സമ്പര്ക്കം പുലര്ത്തുന്നുണ്ടെന്ന് ടെല് അവീവിലെ ഹീബ്രു സര്വകലാശാലയിലെ ഇന്ത്യന് വിദ്യാര്ഥി വികാസ് ശര്മ പറഞ്ഞു. യുദ്ധം പ്രഖ്യാപിച്ചതോടെ കടുത്ത ആശങ്കയിലാണെങ്കിലും സര്വകലാശാലയിലെ ഇന്ത്യന് വിദ്യാര്ഥികളെല്ലാം സുരക്ഷിതരാണ്. സര്വകലാശാല ഏര്പ്പെടുത്തിയ താമസസ്ഥലത്താണ് എല്ലാവരുമുള്ളത്. ഇന്ത്യന് എംബസിയുമായും മറ്റ് ഇന്ത്യന് വിദ്യാര്ഥികളുമായും വാട്ട്സ്ആപ്പ് വഴി നിരന്തരം ആശയവിനിമയം നടത്തുന്നുണ്ടെന്നും വികാസ് പറഞ്ഞു.
ഇതുപോലൊരു സാഹചര്യം മുമ്പ് നേരിടേണ്ടിവന്നിട്ടില്ലെന്ന് 18 വര്ഷമായി ഇസ്രയേലില് ജോലിചെയ്യുന്ന ഇന്ത്യന് പൗരന് സോമ രവി പറഞ്ഞു. 20 മിനിറ്റിനിടെ അയ്യായിരം റോക്കറ്റുകളാണ് ഹമാസ് തൊടുത്തുവിട്ടത്. വളരെ ബുദ്ധിമുട്ടേറിയ സാഹചര്യത്തിലൂടെയാണ് കടന്നുപോകുന്നതെന്നും സോമ രവി പറഞ്ഞു.
