കഴിഞ്ഞ അഞ്ച് വര്ഷത്തോളം പേരക്കുട്ടിയെ നോക്കിയ മുത്തശ്ശിക്ക് 9.4 ലക്ഷം രൂപ നല്കാന് കുട്ടിയുടെ മാതാപിതാക്കള്ക്ക് കോടതി നിര്ദ്ദേശം. ചൈനയിലാണ് സംഭവം. കുട്ടിയെ അഞ്ച് വര്ഷമാണ് കുട്ടിയുടെ അമ്മയുടെ അമ്മ നോക്കിയത്. കോടതി വിധി വന്നതോടെ ആളുകളില് പലരും സംഭവം ചര്ച്ചയ്ക്ക് വിധേയമാക്കി. തെക്കുപടിഞ്ഞാറന് ചൈനയിലെ സിചുവാന് പ്രവിശ്യയിലെ ഗ്വാംഗന് സിറ്റിയില് നിന്നുള്ള ഡുവാന് എന്ന സ്ത്രീയാണ് തന്റെ മകളായ ഹൂ, മരുമകന്, ഷു എന്നിവര്ക്കെതിരെ കേസ് കൊടുത്തത്. കുട്ടിയെ സംരക്ഷിച്ചതിനാല് തനിക്ക് 192,000 യുവാന് അതായത് ഏകദേശം 22 ലക്ഷം രൂപ തരണം എന്ന് ആവശ്യപ്പെട്ടാണ് സ്ത്രീ കേസ് കൊടുത്തത്.
2018 ഫെബ്രുവരി മുതല് 2023 ജൂലൈ വരെ ഡുവാനാണ് മകളുടെ കുഞ്ഞിനെ പരിചരിച്ചത്. ചെങ്ഡുവില് ജോലി ചെയ്തുകൊണ്ടിരിക്കുന്ന ഹൂവിനും ഭര്ത്താവിനും പ്രായപൂര്ത്തിയാകാത്ത തങ്ങളുടെ മകനെ പരിപാലിക്കാന് സമയമില്ലായിരുന്നു. ഈ സാഹചര്യത്തിലാണ് മുത്തശ്ശി കൊച്ചുമകന്റെ സംരക്ഷണം ഏറ്റെടുത്തത്. ഈ സമയത്ത്, മകളും മരുമകനും അവര്ക്ക് പ്രതിമാസം 1,000 യുവാന് അതായത് 11,000 രൂപ സ്റ്റൈപ്പന്ഡും കൂടാതെ 2,000 യുവാന് (22,000 രൂപ) കുട്ടിയെ നോക്കാനുള്ള അധിക ചെലവിനും അയച്ചു നല്കിയിരുന്നു.
തുടര്ന്ന് കഴിഞ്ഞ അഞ്ച് വര്ഷത്തോളം ഡുവാന് പേരക്കുട്ടിയെ നന്നായി നോക്കി. എന്നാല്, ജൂലൈയില്, തന്റെ ശ്രമങ്ങള്ക്ക് മതിയായ പ്രതിഫലം ലഭിച്ചില്ലെന്ന് അവര്ക്ക് തോന്നുകയായിരുന്നു. ഇത് അവര് മകളോടും ഭര്ത്താവിനോടും പറയുകയും ചെയ്തു. കുട്ടിയെ നോക്കിയതിന്റെ ഭാഗമായി തനിക്ക് 22 ലക്ഷം രൂപ തരണം എന്നും അവര് അഭ്യര്ത്ഥിച്ചു. എന്നാല്, അമ്മയുടെ അഭ്യര്ത്ഥന അല്പം കടന്നതാണ് എന്ന് ഹു വിശ്വസിച്ചു. പക്ഷേ, ഭര്ത്താവുമായി കൂടിയാലോചിക്കാതെ തന്നെ അമ്മയ്ക്ക് 50,000 യുവാന് (ഏകദേശം 5.6 ലക്ഷം രൂപ) നല്കാനും ഹു തയ്യാറായി. അത് നല്കുമെന്ന ഉറപ്പിനായി അവര് ഒപ്പിട്ട ഒരു രേഖയും ഉണ്ടാക്കി. എന്നാല്, അമ്മ നിരന്തരം ഓര്മ്മിപ്പിച്ചിട്ടും ഹൂവിന് ആ പണം നല്കാന് സാധിച്ചില്ല. ഇതേത്തുടര്ന്ന് ഡുവാന് ദമ്പതികള്ക്കെതിരെ നിയമനടപടി സ്വീകരിക്കുകയായിരുന്നു.
തന്റെ കൊച്ചുമകനെ പരിപാലിക്കാന് ഡുവാന് നിയമപരമായ ബാധ്യതയില്ലെന്നായിരുന്നു ഇക്കാര്യത്തില് കോടതിയുടെ നിരീക്ഷണം. അതുകൊണ്ട് തന്നെ ഡുവാന്റെ ആവശ്യം ന്യായമാണ് എന്നും കോടതി പറഞ്ഞു. പക്ഷേ, ഡുവാന് ചോദിച്ചിരിക്കുന്ന തുക കുറച്ച് അധികമാണ് എന്നും കോടതി പറഞ്ഞു. അങ്ങനെയാണ് 9.4 ലക്ഷം രൂപ നല്കാന് കോടതി ഉത്തരവിടുന്നത്. അതേസമയം, താന് ഡിവോഴ്സിന് വേണ്ടി നില്ക്കുകയാണ് അതിനാലാണ് ഡുവാന് ഈ കേസ് നല്കിയത് എന്നാണ് മകളുടെ ഭര്ത്താവ് പറയുന്നത്. എന്നാല്, സോഷ്യല് മീഡിയയില് ഭൂരിഭാഗം പേരും ഡുവാന് ചെയ്തതിനെ അഭിനന്ദിച്ചു.
