കൊച്ചി: സോളര് പീഡന കേസില് പരാതിക്കാരിയുടെ കത്ത് വ്യാജമല്ലെന്ന് കെ.ബി.ഗണേഷ്കുമാര് എംഎല്എ. കത്ത് എഴുതിയതും ഒപ്പിട്ടതും കോടതിയില് ഹാജരാക്കിയതും പരാതിക്കാരിയാണെന്നും ഗണേഷ് കുമാര് കോടതിയില് പറഞ്ഞു. ഇക്കാര്യം വ്യക്തമാക്കിയത് സോളര് കേസിലെ ഗൂഢാലോചനയില് കൊട്ടാരക്കര ജുഡീഷ്യല് ഒന്നാംക്ലാസ് മജിസ്ട്രേറ്റ് കോടതിയുടെ നടപടി റദ്ദാക്കണമെന്ന് ആവശ്യപ്പെട്ട് ഗണേഷ് നല്കിയ ഹര്ജി ഹൈക്കോടതി പരിഗണിക്കുമ്പോഴാണ്.
കൊട്ടാരക്കര കോടതിയില് ഗണേഷിനെതിരായ ഹര്ജിയില് നടപടി തുടരാമെന്നു ഹൈക്കോടതി ഉത്തരവിട്ടു. ഗണേഷ് പത്ത് ദിവസത്തേക്ക് ഹാജരാകേണ്ടതില്ല. കേസ് റദ്ദാക്കണമെന്ന ഗണേഷിന്റെ ഹര്ജി വിധി പറയാന് മാറ്റി.സോളര് പീഡന കേസിലെ ഗൂഢാലോചനയില് ഗണേഷ് നേരിട്ട് ഹാജരാകണമെന്നു കൊട്ടാരക്കര ജുഡീഷ്യല് മജിസ്ട്രേറ്റ് കോടതി നേരത്തെ ഉത്തരവിട്ടിരുന്നു. നിര്ദേശം നല്കിയത് കോണ്ഗ്രസ് നേതാവ് അഡ്വ. സുധീര് ജേക്കബ് നല്കിയ ഹര്ജിയിലായിരുന്നു.
