കൊച്ചി: സോളാര് െലെംഗികപീഡനക്കേസിലെ പരാതിയില് മുന്മുഖ്യമന്ത്രി ഉമ്മന് ചാണ്ടിയുടെ പേരുള്പ്പെടുത്താന് ഗൂഢാലോചന നടത്തിയെന്ന കേസ് റദ്ദാക്കണമെന്നാവശ്യപ്പെട്ട് കെ.ബി. ഗണേഷ്കുമാര് എം.എല്.എ. സമര്പ്പിച്ച ഹര്ജി െഹെക്കോടതി തള്ളി. ഗൂഢാലോചന ആരോപണം നിലനില്ക്കുന്നിടത്തോളം കാലം ഉമ്മന് ചാണ്ടിയുടെ ആത്മാവ് പൊറുക്കില്ലെന്നും കോടതി പരാമര്ശിച്ചു.
ആരോപണങ്ങള് അന്തരീക്ഷത്തില് പുകമറപോലെ നിന്നാല്പോരാ. ഗണേഷ്കുമാര് നിരപരാധിയാണെങ്കില് അത് തെളിയിക്കപ്പെടണം. അതിന് മജിസ്ട്രേറ്റ് കോടതിയിലെ നടപടിക്രമങ്ങള് പൂര്ത്തിയാകണമെന്നു കോടതി വ്യക്തമാക്കി. കൊട്ടാരക്കര മജിസ്ട്രേറ്റ് കോടതിയുടെ പരിഗണനയിലുള്ള കേസ് റദ്ദാക്കണമെന്നാവശ്യപ്പെട്ടാണു ഗണേഷ്കുമാര് െഹെക്കോടതിയെ സമീപിച്ചത്.
ഹര്ജിക്കാരനെതിരേ ഗുരുതര ആരോപണങ്ങളാണുള്ളതെന്നു കോടതി വിലയിരുത്തി. ആരോപണങ്ങള് തെറ്റാണെന്നു കണ്ടെത്തിയാല് പരാതിക്കാര്ക്കെതിരെ ഗണേഷ്കുമാറിനു നിയമനടപടി സ്വീകരിക്കാം. ഉമ്മന് ചാണ്ടിയെ അപകീര്ത്തിപ്പെടുത്താന് ശ്രമിച്ചെന്നാരോപിച്ച് ഗണേഷ്കുമാറിനും സോളാര് തട്ടിപ്പുകേസില് പ്രതിയായ വനിതയ്ക്കുമെതിരേ അഡ്വ. സുധീര് ബാബുവാണു പരാതി നല്കിയത്.
പത്തനംതിട്ട ജയിലില് കഴിയവേ പരാതിക്കാരി 25 പേജുള്ള കത്ത് തയാറാക്കി അഡ്വ. ഫെനി ബാലകൃഷ്ണന് മുഖേന കോടതിയില് സമര്പ്പിച്ചിരുന്നു. എന്നാല്, 21 പേജുള്ള കത്ത് ഗണേഷ്കുമാര് ഉള്പ്പെടെയുള്ളവര് ഗൂഢാലോചന നടത്തി 25 പേജാക്കിയെന്നു പരാതിയില് പറയുന്നു. ഉമ്മന് ചാണ്ടിയുടെ പേരുള്പ്പെടെ കത്തില് കൂട്ടിച്ചേര്ത്തു.
ഉമ്മന് ചാണ്ടി മന്ത്രിസഭയില്നിന്നു ഗണേഷ്കുമാറിനെ ഒഴിവാക്കിയതിലുള്ള വിരോധം മൂലമാണു വ്യാജരേഖ ചമച്ചതെന്നും ഹര്ജിക്കാരന് ആരോപിച്ചു. എന്നാല്, 25 പേജുള്ള കത്താണെഴുതിയതെന്നു പരാതിക്കാരി സോളാര് കമ്മിഷനില് ഉള്പ്പെടെ വ്യക്തമാക്കിയ സാഹചര്യത്തില് തനിക്കെതിരായ കേസ് നിലനില്ക്കില്ലെന്നായിരുന്നു ഗണേഷ്കുമാറിന്റെവാദം.
