കൊച്ചി: തുലാവര്ഷക്കാലത്ത് സംസ്ഥാനത്ത് മേഘവിസ്ഫോടനത്തിനു സാധ്യതയുണ്ടെന്ന് കാലാവസ്ഥാ വിദഗ്ധര്. ബംഗാള് ഉള്ക്കടലില് കൂടുതല് ചക്രവാതച്ചുഴികളും ന്യൂനമര്ദത്തിനും ഇനിയും സാധ്യതയുണ്ട്. നിലവില് ബംഗാള് ഉള്ക്കടലിലുള്ള ഇരട്ട ചക്രവാതച്ചുഴിയുടെ സ്വാധീനത്തിലാണ് കേരളത്തില് വ്യാപകമായി തുലാവര്ഷം പെയ്യുന്നത്. അതിനൊപ്പം കിഴക്കന് കാറ്റ് ശക്തിപ്രാപിക്കുന്നതും മഴയ്ക്ക് അനുകൂലമാണ്.
തുലാവര്ഷത്തില് ലഘുമേഘവിസ്ഫോടനങ്ങള്ക്കു സമാനമായ മഴയുണ്ടാകുമെന്ന് കുസാറ്റ് റഡാര് ഗവേഷണ കേന്ദ്രം മുന്നറയിപ്പു നല്കുന്നു. കുറഞ്ഞ സമയത്തില് കൂടുതല് അതിതീവ്രമഴയാണ് ലഘുമേഘവിസ്ഫോടനത്തില് സംഭവിക്കുക. നവംബര് മാസത്തിലെ ഒട്ടെല്ലാ ദിവസങ്ങളിലും പരക്കേ മഴപെയ്യുമെന്നാണ് കാലാവസ്ഥാ ഗവേഷകരുടെ വിലയിരുത്തല്. പതിവില് കൂടുതലാണ് സീസണിലെ തുലാവര്ഷം.
ഒക്ടോബര് മാസത്തില് തുലാവര്ഷം മികച്ചതോതിലാണ് ലഭിച്ചത്. പ്രതീക്ഷിച്ചത് 306 മില്ലി മീറ്റര് മഴ ലഭിക്കേണ്ടസ്ഥാനത്ത് 311 മില്ലീമീറ്റര് മഴ ലഭിച്ചു. ഒരു ശതമാനം അധികമഴയാണ് ഒക്ടോബറില് കിട്ടിയത്. ഇടുക്കി, കണ്ണൂര്, വയനാട് എന്നീ ജില്ലകളില് മാത്രമാണ് ഇതുവരെ തുലാവര്ഷം കുറഞ്ഞുപോയിട്ടുള്ളത്. അതേ സമയം തിരുവനന്തപുരത്ത് 78 ശതമാനവും പത്തനംതിട്ടയില് 66 തമാനം അധികമഴ ഒക്ടോബറില് ലഭിച്ചു.
നവംബര് ആദ്യവാരത്തില് സംസ്ഥാനത്ത് കനത്തമഴ പെയ്യുമെന്ന് കുസാറ്റ് റഡാര് ഗവേഷണകേന്ദ്രം ഡയറക്ടര് ഡോ.എസ്. അഭിലാഷ് അറിയിച്ചു. വരുംദിവസങ്ങളില് ബംഗാള് ഉള്ക്കടലില് ന്യൂനമര്ദങ്ങള്ക്കും ചക്രവാതച്ചുഴികള്ക്കും സാധ്യതയുണ്ട്. പസഫിക്ക് സമുദ്രത്തിലെ എല്നിനോ പ്രതിഭാസം തുലാവര്ഷമഴയ്ക്ക് അനുകൂലമായി നില കൊള്ളുന്നുണ്ടെന്നും അദ്ദേഹം വ്യക്തമാക്കി.
സംസ്ഥാനത്ത് അടുത്ത അഞ്ച് ദിവസം ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില് ഓറഞ്ച്, യെല്ലോ അലര്ട്ടുകള് പ്രഖ്യാപിച്ചു. ഇന്നു ഇടുക്കി ജില്ലയിലും നാളെ ഇടുക്കി പത്തനംതിട്ട ജില്ലകളിലും ഓറഞ്ച് അലര്ട്ട് പ്രഖ്യാപിച്ചു.
ഇന്നു കൊല്ലം, പത്തനംതിട്ട, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലും നാളെ തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശൂര്, പാലക്കാട്, മലപ്പുറം, കോഴിക്കോട് വയനാട് ജില്ലകളിലും യെല്ലോ അലര്ട്ട് പ്രഖ്യാപിച്ചു. ഞായറാഴ്ച തിരുവനന്തപുരം,കൊല്ലം, പത്തനംതിട്ട, എറണാകുളം, ഇടുക്കി, തൃശൂര്,പാലക്കാട്, കോഴിക്കോട് വയനാട്, കണ്ണൂര് ജില്ലകളിലും തിങ്കളാഴ്ച തിരുവനന്തപുരം, കൊല്ലം, പത്തനംതിട്ട, എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും യെല്ലോ അലര്ട്ട് പ്രഖ്യാപിച്ചു.
കേരള തീരത്ത് 1.2 മുതല് 2.0 മീറ്റര് വരെയും തെക്കന് തമിഴ്നാട് തീരത്ത് 1.2 മുതല് 2.1 മീറ്റര് വരെയും ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം. കേരള കര്ണാടക തീരത്തും ലക്ഷദ്വീപ് പ്രദേശത്തും മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.
