മലയാളത്തില് ആക്ഷന് ഹീറോയായി അന്നുമിന്നും നിറഞ്ഞു നില്ക്കുന്ന പേരാണ് സുരേഷ് ഗോപി. സുരേഷ് ഗോപി പൊലീസ് വേഷത്തില് എത്തുന്ന ചിത്രമെന്ന ഒറ്റ പേരു മതി ആ സിനിമയിലേക്ക് പ്രേക്ഷകരെ ആകര്ഷിക്കാൻ. പോലീസ് വേഷങ്ങളില് സുരേഷ് ഗോപി അമ്പരപ്പിച്ചിട്ടുള്ള കഥാപാത്രങ്ങള് അനവധിയാണ്. താരത്തിന്റെ ഏറ്റവും പുതിയ സിനിമയായ ‘ഗരുഡനും’ അക്കൂട്ടത്തിലേക്കാണ് പറക്കുന്നത്. അരുണ് വര്മയുടെ സംവിധാനത്തില് മിഥുൻ മാനുവലിന്റെ തിരക്കഥ പിറന്ന ഈ ചിത്രത്തെ നിറഞ്ഞ കൈയടിയോടെയാണ് പ്രേക്ഷകര് സ്വീകരിക്കുന്നത്. സിനിമയുടെ പ്രൊമോഷന്റെ ഭാഗമായി ഒരുപാട് അഭിമുഖങ്ങളും പ്രെസ്സ് മീറ്റുകളും താരം നല്കുന്നുണ്ട്. ഇപ്പോഴിതാ പ്രൊമോഷന്റെ ഭാഗമായി ഒരു അഭിമുഖത്തിനു എത്തിയപ്പോൾ അവതാരകയായ മീര മുരളി ഡയറ്റിനെക്കുറിച്ച് സുരേഷ് ഗോപിയോട് ചോദിക്കുന്നതും അതിന് താരം നൽകുന്ന മറുപടിയുമാണ് സോഷ്യൽ മീഡിയ ഏറ്റെടുക്കുന്നത്.
ഡയറ്റ് എന്തെങ്കിലുമുണ്ടോ എന്ന് അവതാരകയായ മീര മുരളി ചോദിക്കുമ്പോഴാണ് തഗ്ഗ് മറുപടി താരം പറയുന്നത്. ‘‘ ഡയറ്റ് ഒന്നുമില്ല. ഡയറ്റ് ഒട്ടുമില്ലാത്ത ഏക ജീവി ഞാനാണ് ഈ ലോകത്ത്...’’ അപ്പോള് വന്നു മീരയുടെ അടുത്ത ചോദ്യം.‘ എന്നാലും സുരേഷേട്ടാ, മമ്മൂക്ക പറയുന്നത് കേട്ടിട്ടുണ്ട്. ഒരു നടനെ സംബന്ധിച്ച് ശരീരമാണ് അവന്റെ ആയുധമെന്ന്...’’ അതിനും വന്നു സുരേഷ്ഗോപിയുടെ രസകരമായ മറുപടി. ‘‘ഭക്ഷണത്തിന്റെ കാര്യം പറയുമ്പോള് മമ്മൂട്ടി എന്ന മനുഷ്യന്റെ പേരിവിടെ ഉച്ചരിക്കരുത്. പോളണ്ടിന്റെ പേരിവിടെ ഉച്ചരിക്കരുത്. അതൊരു അപൂര്വ്വ ജന്മമാണ്. അങ്ങനെയൊന്നും ലോകത്ത് ആര്ക്കും പറ്റില്ല. വലിയ നടനാണ് മോഹന്ലാല്. മോഹന്ലാലിനും പറ്റില്ല അതുപോലെയാകാന്. ഇംപോസിബിള്...’’
ഒരു കഥാപാത്രത്തിന് വേണ്ടി ശരീരഭാരം കുറയ്ക്കണമെന്ന് പറഞ്ഞാല് എന്തു ചെയ്യുമെന്നും മീര ചോദിച്ചു. ‘‘എനിക്കു പറ്റില്ല. ഞാന് ആ ഉപദേശം വേണ്ടെന്ന് വയ്ക്കും...’’ സുരേഷ് ഗോപി പറയുന്നു.
