തിരുവനന്തപുരം: നവകേരള സദസില് എല്ലാ മന്ത്രിമാരും മുടങ്ങാതെ പങ്കെടുത്ത് കൊളളണമെന്ന് മുഖ്യമന്ത്രിയുെട അന്ത്യശാസനം. ഇടയ്ക്ക് മുങ്ങുന്ന പരിപാടി നടക്കില്ലെന്നുമാണ് നിര്ദേശം. ഇന്നലെത്തെ മന്ത്രിസഭാ യോഗത്തിലായിരുന്നു മുഖ്യമന്ത്രിയുടെ ഈ നിര്ദേശം. ഇതനുസരിച്ച് എല്ലാ മന്ത്രിമാരും എല്ലാ മണ്ഡലങ്ങളിലെയും യോഗങ്ങളില് പങ്കെടുക്കും.
140 മണ്ഡലങ്ങളിലും എത്തുന്ന നവകേരള സദസിന്റെ ഒരുക്കങ്ങള് വിലയിരുത്തിയ ശേഷമാണ് ഈ നിര്ദ്ദേശം നല്കിയത്. നവകേരള സദസിന്റെ ഭാഗമായി ഞായറാഴ്ച കാസര്കോട്ടെ സര്ക്കാര് ഉദ്യോഗസ്ഥര്ക്ക് പ്രവര്ത്തി ദിവസം ആക്കിയിരുന്നു. അതുകൊണ്ടു തന്നെ 37 ദിവസം നീളുന്ന മണ്ഡല പര്യടനത്തില് മന്ത്രിമാരുടെ സാന്നിദ്ധ്യവും ഉണ്ടാകണമെന്നാണ് നിര്ദേശം. ശനിയാഴ്ച വൈകുന്നേരം 3.30ന് മഞ്ചേശ്വരം മണ്ഡലത്തിലാണ് പരിപാടിയുടെ തുടക്കം. ഡിസംബര് 24 ന് തിരുവനന്തപുരത്ത് സമാപിക്കും.
നവകേരള സദസിനിടെ വിവിധ ജില്ലകളില് മുഖ്യമന്ത്രി മാധ്യമങ്ങളെ കാണും. ജനങ്ങളുമായി സംസാരിക്കുന്ന കാര്യത്തില് നവകേരള സദസിന് വിപുലമായ സാധ്യതകളുണ്ട്. ജനപങ്കാളിത്തം കൊണ്ട് ചരിത്രത്തില് അടയാളപ്പെടുത്തുമെന്നുമാണ് വിലയിരുത്തല്. ജില്ലകളുടെ ചുമതലയുളള മന്ത്രിമാര് അതാത് ജില്ലകളിലെ ഒരുക്കങ്ങള്ക്ക് നേതൃത്വം വഹിക്കും. മന്ത്രിസഭാ യോഗത്തിനുശേഷം നവകേരള സദസിന്റെ ജില്ലകളിലെ ചെയര്മാന്മാര്, കണ്വീനര്മാര് തുടങ്ങിയവരുമായും മുഖ്യമന്ത്രി ആശയ വിനിമയം നടത്തി.
പരിപാടിക്കെത്തുന്നവരെ മുഴുവന് ഉള്ക്കൊളളാനാകുന്ന തരത്തിലുളള ക്രമീകരണം വേണമെന്ന് നിര്ദ്ദേശം നല്കി. എല്ലാ ജില്ലകളിലെയും പ്രമുഖ വ്യക്തികളുമായും മുഖ്യമന്ത്രി കൂടിക്കാഴ്ച നടത്തുന്നുണ്ട്. സര്ക്കാര് പരിപാടിയാണെങ്കിലും ചെലവിനുളള പണം അടക്കമുളള കാര്യങ്ങളില് സംഘാടക സമിതിയാണ് മുന്നിട്ടിറങ്ങുന്നത്. ഔദ്യോഗിക കാര്യങ്ങള് മാത്രമാണ് കളക്ടറും ഉദ്യോഗസ്ഥരും ചെയ്യുക.
