ഒമ്പതാംക്ലാസ്സില് തോറ്റ ക്രിക്കറ്റു കളിക്കാര്ക്ക് വെള്ളം കൊണ്ടു കൊടുത്തിരുന്ന തേജസ്വീയാദവ് നേതാവായത് ലാലുവിന്റെ മകനായത് കൊണ്ടാണെന്നും ജിഡിപിയെ കുറിച്ച് കഴിഞ്ഞ ദിവസം പറഞ്ഞ അയാള് അതിന്റെ പൂര്ണ്ണരൂപം എന്താണെന്ന് പറഞ്ഞാല് താന് പണി നിര്ത്താന് തയ്യാറാശണന്നും പരിഹസിച്ച് ജെഡിയു നേതാവും തെരഞ്ഞെടുപ്പ് തന്ത്രജ്ഞനുമായ പ്രശാന്ത് കിഷോര്.
തിരഞ്ഞെടുപ്പ് തന്ത്രജ്ഞനായ പ്രശാന്ത് കിഷോര് പദയാത്രയിലാണ്. ഇതിനിടയില് വ്യാഴാഴ്ച മാധ്യമങ്ങള്ക്ക് മുന്നിലാണ് രൂക്ഷ വിമര്ശനം നടത്തിയത്. സ്വന്തം അപ്പന്റെ പാര്ട്ടിയായാല് ആര്ക്കും കയറി നേതാവാകാമെന്നും പരിഹസിച്ചു. ''രാജീവ് ഗാന്ധിയുടെ മകനായതിനാല് രാഹുല് കോണ്ഗ്രസിന്റെ വലിയ നേതാവായി. നിങ്ങളുടെ ബാപ്പൂജിയുടെ പാര്ട്ടിയാണെങ്കില് ആര്ക്കും നേതാവാകാം. തേജസ്വി യാദവിന്റെ ഐഡന്റിറ്റി എന്താണ്? അവന് ഒമ്പതാംക്ലാസ്സ് തോറ്റവന്, ക്രിക്കറ്റ് കളിക്കാര്ക്ക് വെള്ളം കൊടുക്കാന് പോയിരുന്നവന്. അയാള് ലാലു യാദവിന്റെ മകനാണെന്ന് എല്ലാവര്ക്കും അറിയാം. അതുകൊണ്ട് അദ്ദേഹം ആര്ജെഡി നേതാവാണ്.'' പ്രശാന്ത് കിഷോര് പറഞ്ഞു.
''എന്ത് മഹത്തായ നേട്ടമാണ് അദ്ദേഹം ചെയ്തത്? അവര് ലാലുവിന്റെ മക്കളാണെന്ന് എല്ലാവര്ക്കും അറിയാം. എന്താണ് ഈ കാര്യങ്ങള് കൊണ്ട് ഇവര് ഉദ്ദേശിക്കുന്നത്? അവന് വിഡ്ഢിത്തം പറഞ്ഞു ചുറ്റിനടന്നു, ജാതിയുടെയും മതത്തിന്റെയും പേരില് ജനങ്ങളെ വിഭജിച്ചു... പണം പിരിച്ചെടുത്തു, മതത്തിന്റെ അടിസ്ഥാനത്തില് ജനങ്ങളെ ഭിന്നിപ്പിച്ചു. ജാതിയുടെ പേരില്, ദാരിദ്ര്യം കാരണം ആളുകളെ നിര്ബന്ധിച്ച് വോട്ടുചെയ്യിക്കുന്നു. അതിനു ശേഷം നേതാവായി അവര്ക്ക് അറിവ് നല്കുന്നു.''
തേജസ്വി യാദവിന്റെ ജിഡിപി പ്രസ്താവനയെയും പരിഹസിച്ചു. ''ബിഹാറാണ് ഏറ്റവും ഉയര്ന്ന ജിഡിപിയെന്ന് മഹാനായ ഉപമുഖ്യമന്ത്രി പറഞ്ഞത് കുറച്ച് ദിവസങ്ങള്ക്ക് മുമ്പ് നിങ്ങള് കേട്ടിട്ടുണ്ടാകും. ജിഡിപി എന്താണെന്ന് തേജസ്വിക്ക് അറിയില്ലേ? പേപ്പര് കാണാതെ അവര് അതിന്റെ നിര്വചനം പറഞ്ഞാല്, ഞങ്ങള് ഈ പണി ഉപേക്ഷിച്ച് തേജസ്വി യാദവിന്റെ കൊടി പിടിക്കും. അല്ലെങ്കില് പേപ്പര് കാണാതെ ജിഡിപിയുടെ മുഴുവന് രൂപവും എഴുതിയാല് ഞങ്ങള് സമ്മതിക്കും.'' അദ്ദേഹം പറഞ്ഞു.
അതേസമയം ഇതിന് പിന്നാലെ ലാലു പ്രസാദ് യാദവിന്റെ മകള് പ്രതികരണവുമായി എത്തി. ''ആരാണ് ഇത്? ആരെങ്കിലും അയാളെ തിരിച്ചറിയുന്നുണ്ടോ? ആരെയെങ്കിലും ബാബുജി ആക്കണം, അങ്ങനെ ആരുടെയെങ്കിലും രാഷ്ട്രീയ അവകാശിയാകാം എന്നാണ് അയാള് പറയുന്നത്. ബിസിനസ്സിനും സ്വന്തം നേട്ടത്തിനും അനുസരിച്ച് പിതാവിനെ ഇടയ്ക്കിടെ മാറ്റിക്കൊണ്ടിരിക്കുന്നയാളാണ് അയാള്.'' രോഹിണി ആചാര്യ കുറിച്ചു.
''ചിലപ്പോള് മോദി-ഷാ അയാളുടെ ബാബുജിയാണ്, ചിലപ്പോള് പവന് വര്മ-നിതീഷ് കുമാര് അയാളുടെ ബാബുജിയാകും. ചിലപ്പോള് രാഹുല് ഗാന്ധിയാണ് അയാളുടെ പിതാവ്. ചിലപ്പോള് അഭിഷേക് ബാനര്ജി, അല്ലെങ്കില് ജഗന് റെഡ്ഡി, ചിലപ്പോള് സ്റ്റാലിന് എന്നിങ്ങനെ അയാള്ക്ക് പിതാവ് മാറിക്കൊണ്ടിരിക്കും. ഇപ്പോള് വീണ്ടും അയാള് ആദ്യത്തെയാളെ പിതാവാക്കിയിരിക്കുകയാണ്. പേര് വെളിപ്പെടുത്താന് അദ്ദേഹത്തിന് കഴിയുന്നില്ല. തേജസ്വിക്ക് നേരെ ചെളി വാരിയെറിയാന് വന്നിരിക്കുന്ന അയാള് ബിജെപിക്ക് വേണ്ടി ബ്രോക്കറേജ് ചെയ്യുകയാണ്. അയാള് അദ്ദേഹം മാധ്യമങ്ങളുടെ പ്രീതിയിലാണ്. അല്ലെങ്കില് തെരുവിലെ നായ പോലും അവനെ ശ്രദ്ധിക്കില്ല. രോഹിണിയുടെ കുറിപ്പില് പറയുന്നു.
