മുന് ഫുട്ബോള് ഇതിഹാസം ഡേവിഡ് ബെക്കാമിനൊപ്പമുള്ള ചിത്രങ്ങളാണ് പല ബോളിവുഡ് സെലിബ്രിറ്റികളും പങ്കിടുന്നത്. യൂനിസെഫ് അംബാസഡര് എന്ന നിലയില് ഇന്ത്യയില് മൂന്നുദിവസത്തെ സന്ദര്ശനത്തിനെത്തിയ ബെക്കാം മുംബൈ വാങ്ക്ഡേ സ്റ്റേഡിയത്തില് ഇന്ത്യ-ന്യൂസിലെന്ഡ് സെമി ഫൈനല് കാണാനുമുണ്ടായിരുന്നു. തിരിച്ചു മടങ്ങും വഴി ബോളിവുഡ് കിംഗ് ഖാന് ഷാരൂഖ് ഖാന്റെ വീടായ മന്നത്തും ബെക്കാം സന്ദര്ശിച്ചു. മുംബൈ വിമാനത്താവളത്തിലേക്കുള്ള യാത്രയ്ക്കിടെയാണ് ബെക്കാം ഷാരൂഖ് ഖാന്റെ വീട്ടിലും അതിഥിയായെത്തി. നിരവധി ആഡംബര കാറുകളുടെ അകമ്പടിയോടെ മന്നത്തിലേക്കുള്ള ഡേവിഡ് ബെക്കാമിന്റെ വരവ് സോഷ്യല് മീഡിയ വഴി ഷാരൂഖ് ഖാന് ഫാന്സുകാര് പങ്കുവച്ചിരുന്നു. ഇപ്പോഴിതാ ബെക്കാമിനൊപ്പമുള്ള സുന്ദരനിമിഷങ്ങള് പങ്കിടുകയാണ് ഷാരൂഖ്. ‘‘കഴിഞ്ഞ രാത്രി ഒരു ഐക്കണും ഒരു തികഞ്ഞ മാന്യനുമൊപ്പമായിരുന്നു. എല്ലായ്പ്പോഴും ഞാന് ബെക്കാമിന്റെ ഒരു വലിയ ആരാധകനായിരുന്നു, പക്ഷേ അദ്ദേഹത്തെ കണ്ടുമുട്ടുകയും കുട്ടികളുമായി അദ്ദേഹം എങ്ങനെയുണ്ടെന്ന് കാണുകയും ചെയ്തത് ഫുട്ബോളിനപ്പുറമുള്ള താരത്തിന്റെ മറ്റൊരു മുഖം കാണാന് സഹായിച്ചു. ബെക്കാമിന് ദയയും സൗമ്യമായ സ്വഭാവവുമാണെന്ന് എനിക്ക് മനസ്സിലായി. നിങ്ങളുടെ കുടുംബത്തിന് എന്റെ സ്നേഹം. സുഹൃത്തേ, സുഖമായും സന്തോഷമായും ഇരിക്കൂ, അൽപ്പം വിശ്രമിക്കൂ, ഉറങ്ങൂ.. ഡേവിഡ്ബെക്കാം...’’ എന്നാണ് ഷാരൂഖ് ബെക്കാമിനൊപ്പമുള്ള ചിത്രത്തിന്റെ കൂടെ കുറിച്ചത്.
മന്നത്തിലെത്തുന്നതിന് മുമ്ബ് മുകേഷ് അംബാനിയേയും കുടുംബത്തേയും ഡേവിഡ് ബെക്കാം സന്ദര്ശിച്ചിരുന്നു. അംബാനി സംഘടിപ്പിച്ച സത്കാരത്തില് ബെക്കാം പങ്കെടുത്തു. അംബാനിയുടെ മുംബൈയിലെ വസതിയായ ആന്റിലിയയിലായിരുന്നു പാര്ട്ടി. മുകേഷ് അംബാനിക്കും കുടുംബത്തിനുമൊപ്പം ബെക്കാം നില്ക്കുന്ന ചിത്രം മുംബൈ ഇന്ത്യന്സ് ഔദ്യോഗിക എക്സ് പേജിലൂടെ പുറത്തുവിട്ടിരുന്നു.
സോനം കപൂറും ഭര്ത്താവ് ആനന്ദ് അഹൂജയും ചേര്ന്ന് നടത്തിയ പാര്ട്ടിയിലും ഡേവിഡ് ബെക്കാം പങ്കെടുത്തിരുന്നു. ബോളിവുഡ് താരങ്ങളായ കരിഷ്മ കപൂര്, അര്ജുന് കപൂര്, മലൈക അറോറ, കിയാര അദ്വാനി, സിദ്ധാര്ഥ് മല്ഹോത്ര, എന്നിവരും ഈ ആഘോഷത്തിലുണ്ടായിരുന്നു. മറക്കാനാവാത്ത അനുഭവമായിരുന്നു ഇന്ത്യയിലേക്കുള്ള തന്റെ ആദ്യ യാത്രയെന്ന് ബി.സി.സി.ഐക്ക് നല്കിയ അഭിമുഖത്തില് ബെക്കാം പറഞ്ഞിരുന്നു.
