സമൂഹമാധ്യമങ്ങളില് തനിക്കെതിരെ നടക്കുന്ന ഡീപ്ഫെയ്ക് പ്രചാരണത്തില് പ്രതികരണവുമായി ക്രിക്കറ്റ് ഇതിഹാസം സച്ചിന് ടെര്ഡുല്ക്കറുടെ മകള് സാറ ടെന്ഡുല്ക്കര്. ഇന്ത്യന് ക്രിക്കറ്റ് താരം ശുഭ്മാന് ഗില്ലുമായി ചേര്ത്തുള്ള വ്യാജ ചിത്രങ്ങളാണു സാറയുടെ പേരില് സമൂഹമാധ്യമങ്ങളില് പ്രചരിക്കുന്നത്. ഇതിനെതിരെയാണ് സാറ കുറിപ്പ് പങ്കിട്ടിരിക്കുന്നത്.
സോഷ്യല് മീഡിയകളില് ഇന്സ്റ്റഗ്രാമില് മാത്രമാണ് തനിക്ക് അക്കൗണ്ട് ഉള്ളതെന്നും മറ്റെല്ലാം വ്യാജമാണെന്നും സാറ പറയുന്നു. '' സോഷ്യല് മീഡിയയെന്നത് സന്തോഷവും സങ്കടവും നിത്യജീവിതത്തിലെ കാര്യങ്ങളുമെല്ലാം പങ്കുവയ്ക്കുന്നൊരു മനോഹരമായ ഇടമാണ്. എന്നാല്, സാങ്കേതികത വിദ്യയെ ദുരുപയോഗം ചെയ്ത്, ഇന്റര്നെറ്റ് വഴി യാഥാര്ഥ്യത്തേയും സത്യത്തേയും ദുരുപയോഗം ചെയ്യുന്നത് കാണുമ്പോള് വിഷമം തോന്നാറുണ്ട്. യാഥാര്ത്ഥ്യവുമായി ഒരു ബന്ധവുമില്ലാത്ത നിരവധി ഡീപ്പ് ഫേക്ക് ചിത്രങ്ങള് കാണാനിടയായി.
വ്യാജ എക്സ് (ട്വിറ്റര്) അക്കൗണ്ടിലൂടെ ഞാനെന്ന വ്യാജേന ആളുകളെ തെറ്റിദ്ധരിപ്പിക്കുന്നതായും ശ്രദ്ധയില്പ്പെട്ടു. എനിക്ക് എക്സില് അക്കൗണ്ട് ഇല്ല. ഇക്കാര്യം എക്സ് അധികൃതര് ശ്രദ്ധിക്കുമെന്നും വ്യാജ പേജുകള് നീക്കുമെന്നും കരുതുന്നു. വിനോദോപാധികളെന്ന തരത്തില് വ്യാജ വാര്ത്തകളെ പ്രോത്സാഹിപ്പിക്കരുത്. യാഥാര്ഥ്യത്തിലും വിശ്വാസത്തിലും അധിഷ്ഠിതമായ ആശയവിനിമയത്തെ നമുക്ക് പ്രോത്സാഹിപ്പിക്കാം''- സാറ കുറിച്ചു.
സാറയുമായി ഗില് ഡേറ്റിങ്ങിലാണെന്ന് അഭ്യൂഹങ്ങളുണ്ട്. എന്നാല് ഇരുവരും ഇതിനെക്കുറിച്ച് ഒന്നും പ്രതികരിച്ചിട്ടില്ല.
