കൗതുകമുണര്ത്തുന്ന ഒട്ടനവധി വാര്ത്തകള് സമൂഹ മാധ്യമങ്ങളിലൂടെ ശ്രദ്ധ നേടാറുണ്ട്. വര്ഷങ്ങള്ക്ക് മുന്പ് നടന്നതാണെങ്കിലും ഇത്തരത്തിലുള്ള ആശ്ചര്യപ്പെടുത്തുന്ന പല സംഭവങ്ങളും ഇന്നും ആളുകള് ഓര്മയില് സൂക്ഷിക്കാറുണ്ട്. ഇപ്പോഴിതാ 7 വര്ഷം മുന്പ് ബ്രിട്ടനില് നടന്ന ഒരു വിചിത്ര സംഭവം വീണ്ടും വാര്ത്തകളില് ഇടം നേടുകയാണ്. ഏകദേശം പതിനായിരകണക്കിന് തേനീച്ചകള് ഒരു കാറിനെ തുടര്ച്ചയായി രണ്ട് ദിവസത്തോളം പിന്തുടര്ന്ന വാര്ത്തയാണിത്. എന്നാല് ഇന്നും ഇതെന്തുകൊണ്ടാണ് തേനീച്ചകള് അങ്ങനെ പിന്തുടര്ന്നത് എന്നതിനുളള കാരണം ആര്ക്കും കണ്ടെത്താനായിട്ടില്ല.
കാരോള് ഹോവാര്ത്ത് എന്ന 68 കാരിയായ ബ്രിട്ടീഷ് വനിത ഒരു പ്രകൃതി ഉദ്യാനത്തില് നിന്ന് മടങ്ങുകയായിരുന്നു. തന്റെ മിത്സുബിഷി കാറിലായിരുന്നു കാരോള് അന്ന് യാത്ര ചെയ്തിരുന്നത്. എന്നാല് യാത്രയ്ക്കിടയില് പടിഞ്ഞാറന് വെയില്സിലെ പട്ടണമായ ഹാവര്ഫോര്ഡ് വെസ്റ്റില് എത്തിയശേഷം കാരള് ഷോപ്പിങ്ങിനായി പോയി. എന്നാല് ഈ സമയം ഏകദേശം ഇരുപതിനായിരത്തോളം അംഗങ്ങളുള്ള തേനീച്ചപ്പട കാരോളിന്റെ കാറിനെ പിന്തുടരുന്നുണ്ടായിരുന്നു. നിര്ത്തിയിട്ട കാരോളിന്റെ കാറിനെ തേനീച്ചപ്പട പൊതിഞ്ഞത് കണ്ട് ചിലര് മൃഗസംരക്ഷണ അധികൃതരെ വിളിച്ചു. ഇവര് എത്തിയാണ് തേനീച്ചകളെ തുരത്തി ഒരു കൂട്ടിലേക്ക് മാറ്റിയത്. അന്ന് കാരോഹ ആശ്വാസത്തോടെ മടങ്ങി.
എന്നാല് അവിടംകൊണ്ടൊന്നും തീര്ന്നില്ല. പിറ്റേ ദിവസവും ഇത് തന്നെ ആവര്ത്തിക്കപ്പെട്ടു. തേനീച്ചകള് വീണ്ടും കാറിനെ വന്ന് പൊതിയാന് തുടങ്ങി. ഇത് കണ്ട് കാരോള് വേഗം അധികൃതരെ വിളിക്കുകയും തേനീച്ചകളെ തുരത്തുകയും ചെയ്തു. എന്നാല് തേനീച്ചകള് എന്തിനാണ് ഈ കാറിനെ ഇങ്ങനെ പിന്തുടര്ന്നത് എന്ന് മനസ്സിലാക്കാന് ആര്ക്കും കഴിഞ്ഞിരുന്നില്ല. എന്നാല് വിദഗ്ധ സംഘം പറയുന്നത് കാറിനുള്ളില് അവരുടെ റാണി ഉള്പ്പെട്ടിരിക്കാം എന്നാണ്. തേനീച്ചകളുടെ ലോകം റാണിയെ ചുറ്റപ്പറ്റിയാണ്. റാണി പോയാല് അവ പിന്തുടരും.
കാറിനുള്ളിലുണ്ടായിരുന്ന എന്തെങ്കിലും ഭക്ഷണസാധനങ്ങളോ അല്ലെങ്കില് സുഗന്ധവസ്തുക്കളോ റാണിത്തേനീച്ചയെ ആകര്ഷിച്ചു കാണും. അങ്ങനെ റാണിയെ പിന്തുടര്ന്ന് ഇവ വന്നതാകാം എന്നാണ് വിദഗ്ധര് പറയുന്നത്. ഏതായാലും ഈ സംഭവത്തിന്റെ യഥാര്ത്ഥ കാരണം കണ്ടെത്താന് ഇതുവരെ ആര്ക്കും കഴിഞ്ഞിട്ടില്ല എന്നതും മറ്റൊരു വസ്തുതയാണ്.
