മുംബൈ: ഈ വർഷത്തെ ഐപിഎൽ താരലേലത്തിന് മുമ്പായി ഫ്രാഞ്ചൈസികള് ഒഴിവാക്കുന്ന കളിക്കാരുടെ പട്ടിക ഇന്നറിയാം. ചെന്നൈ സൂപ്പര് കിംഗ്സ് താരമായിരുന്ന ബെന് സ്റ്റോക്സിന് പിന്നാലെ രാജസ്ഥാന് താരമായിരുന്ന ജോ റൂട്ടും ഈ വർഷത്തെ ഐപിഎല്ലില് നിന്ന് പിന്മാറിയിട്ടുണ്ട്. കഴിഞ്ഞ ഐപിഎല് ലേലത്തില് അടിസ്ഥാന വിലയായ ഒരു കോടി രൂപയ്ക്കാണ് രാജസ്ഥാന് റോയൽസ് റൂട്ടിനെ സ്വന്തമാക്കിയത്.
ഗുജറാത്ത് ടൈറ്റൻസ് നായകൻ ഹാര്ദിക് പണ്ഡ്യ മുംബൈ ഇന്ത്യൻസിലേക്ക് മടങ്ങുമെന്ന അഭ്യൂഹങ്ങളിലെ വ്യക്തതയ്ക്ക് വേണ്ടിയാണ് പ്രധാനമായും ആരാധകര് കാത്തിരിക്കുന്നത്.രാജസ്ഥാന് റോയല്സിന്റെ മലയാളി താരം ദേവ്ദത്ത് പടിക്കൽ ലക്നൗ സൂപ്പർ ജയന്റ്സിലെത്തും. പകരം പേസർ ആവേഷ് ഖാൻ രാജസ്ഥാനു വേണ്ടി കളിക്കും. ലക്നൗവിന്റെ വിന്ഡീസ് താരം റൊമാരിയോ ഷെപ്പേര്ഡിനെ മുംബൈ ഇന്ത്യന്സിന് കൈമാറിയിരുന്നു. പൃഥ്വി ഷായെ ഡല്ഹി ക്യാപിറ്റല്സ് നിലനിര്ത്താന് തീരുമാനിച്ചുവെന്നും റിപ്പോര്ട്ടുകളുണ്ട്.
ഇടംകയ്യൻ സ്പിന്നര് മായങ്ക് ഡാഗറിനെ റോയൽ ചലഞ്ചേഴ്സിന് വിട്ടുകൊടുത്ത് പകരം ഷഹ്ബാസ് അഹമ്മദിനെ സൺറൈസേഴ്സ് ഹൈദരാബാദ് സ്വന്തമാക്കിയതാണ് ഏറ്റവും ഒടുവിൽ സംഭവിച്ച താര കൈമാറ്റം. കഴിഞ്ഞ തവണത്തെ ലേലത്തിൽ 1.8 കോടി രൂപ മുടക്കിയാണ് ഡാഗറിനെ ഹൈദരാബാദ് സ്വന്തമാക്കിയത്. 2022ലെ ലേലത്തിൽ റോയൽ ചലഞ്ചേഴ്സ് ഷഹ്ബാസിനായി 2.4 കോടി രൂപ മുടക്കിയിരുന്നു.
ഒഴിവാക്കപ്പെടുമെന്ന് കരുതുന്ന താരങ്ങളില് ആര്സിബിയുടെ വാനിന്ദു ഹസരങ്ക, ഹര്ഷല് പട്ടേല്, കൊക്കത്തയുടെ ഷാര്ദുൽ താക്കൂര്, ആന്ദ്രെ റസല്, സുനില് നരെയ്ന് എന്നിവരുമുണ്ട്. ആന്ദ്ര റസ്സൽ ഹൈദരാബാദിലേക്കെന്നാണ് സൂചനകൾ.
