വ്യത്യസ്തത ഉണര്ത്തുന്ന ഒട്ടനവധി വാര്ത്തകളും സംഭവങ്ങളുമാണ് സമൂഹ മാധ്യമങ്ങളിലൂടെ ശ്രദ്ധ നേടിക്കൊണ്ടിരിക്കുന്നത്. ചിരിപ്പിക്കുന്നതും ചിന്തിപ്പിക്കുന്നതും ആശങ്കപ്പെടുത്തുന്നതുമായ ഒട്ടനവധി സംഭവങ്ങള് ഇതില് ഉള്പ്പെടുന്നുണ്ട്. ഇപ്പോഴിതാ ഇത്തരത്തില് കഴിഞ്ഞ ദിവസം വൈറലായ ഒരു വീഡിയോയാണ് നെറ്റീസണ്സിനിടയില് വ്യാപകമായി പ്രചരിക്കപ്പെടുന്നത്. ഓണ്ലൈനായി ഓര്ഡര് ചെയ്ത ഭക്ഷണം വീട്ടിലെത്തി കൈമാറിയ ഡെലിവറി ബോയ് പോകുന്ന പോക്കില് വീട്ടിലെ യുവതിയുടെ ഷൂ മോഷ്ടിച്ച് കടന്നിരിക്കുകയാണ്. എന്നാല് ഇതിന് ശേഷം അര്ദ്ധരാത്രിയില് വിണ്ടുമെത്തി ഷൂ ഒപ്പം ഒരു കവറും കൈമാറാനും ശ്രമിച്ചു. യുവതി തന്നെയാണ് രാജ്യതലസ്ഥാനത്ത് തനിക്കുണ്ടായ അനുഭവം സമൂഹ മാധ്യമങ്ങളിലൂടെ പങ്കുവച്ചത്. വളരെ വേഗം തന്നെയാണ് കുറിപ്പ് ആളുകള്ക്കിടയില് ശ്രദ്ധ നേടിയത്.
@flywithmonicaa എന്ന ഇന്സ്റ്റഗ്രാം അക്കൗണ്ടിലാണ് യുവതി തന്റെ അനുഭവം സംബന്ധിച്ച കുറിപ്പ് പങ്കുവച്ചത്. ഇതിനോടൊപ്പം യുവാവ് ഷൂ മോഷ്ടിക്കുന്ന സിസിടിവി ദൃശ്യങ്ങളും പങ്കുവച്ചിട്ടുണ്ട്. കഴിഞ്ഞ നവംബര് 23 ന് ദില്ലിയിലായിരുന്നു സംഭവം. ബ്ലിങ്കിറ്റ് എന്ന ഓണ്ലൈന് ഡെലിവറിയിലൂടെ ഓര്ഡര് ചെയ്ത ഭക്ഷണം ഫ്ലാറ്റിലെത്തിച്ച യുവാവ്, ഭക്ഷണം നല്കിയ ശേഷം ലിഫ്റ്റില് കയറി പോകുന്നു. എന്നാല്, സെക്കന്റുകള്ക്കുള്ളില് തിരിച്ചെത്തിയ ഇയാള് വാതില്ക്കല് വച്ചിരുന്ന യുവതിയുടെ ഷൂ എടുത്ത് സ്വന്തം ജാക്കറ്റിനുള്ളില് ഒളിപ്പിച്ച് വയ്ക്കുന്നു. പിന്നീട് തിരിച്ച് പോകുന്നു. മോഷണത്തെ കുറിച്ച് അറിഞ്ഞ യുവതി, ഷൂ നഷ്ടപ്പെട്ടത് സംബന്ധിച്ച് ബ്ലിങ്കിറ്റില് പരാതി നല്കി. യുവതിയുടെ പരാതി സ്വീകരിച്ചതായും അവരുടെ അഡ്രസ് രഹസ്യമാക്കിവയ്ക്കുമെന്നും ഡെലിവറി ബോയ്ക്ക് കൈമാറില്ലെന്നും ബ്ലിക്കിറ്റ് യുവതിക്ക് ഉറപ്പ് നല്കി.
തുടര്ന്ന് രാത്രി 10 മണിയോടെ ഇയാള് ഷൂ അടങ്ങിയ ഒരു കവറുമായി തിരിച്ചെത്തുകയും ക്വാളിംഗ് ബെല്ല് അമര്ത്തുകയും ചെയ്തു. ഭയന്ന യുവതി വാതില് തുറന്നില്ലെന്നും എഴുതുന്നു. ഡെലിവറി ബോയ് ഷൂ മോഷ്ടിച്ച് പോകുന്ന സിസിടിവി ദൃശ്യം പങ്കുവച്ച് കൊണ്ടാണ് മോണിക്ക ഈ വിവരങ്ങള് പങ്കുവച്ചത്. ഒപ്പം രാജ്യ തലസ്ഥാനത്ത് താമസിക്കുന്ന ഒരു യുവതിക്ക് എന്ത് സുരക്ഷിതത്വമാണ് ഉള്ളതെന്ന ആശങ്കയും ഇവര് പങ്കുവച്ചു. ഞങ്ങള്ക്ക് സ്വന്തം ചെലവില് സുരക്ഷ വര്ധിപ്പിക്കേണ്ടി വരുന്ന അവസ്ഥയാണ് ഉള്ളതെന്നും ഇവര് എഴുതുന്നു. തന്റെ അഡ്രസ് അയാളുടെ കൈയിലുണ്ടെന്നും അയാള് തിരിച്ച് കൊണ്ട് വച്ച ഷൂ തനിക്കിപ്പോള് വെറും ഷൂവല്ലെന്നും മറിച്ച് ഭയവും അവിശ്വാസവും കൊണ്ട് അവ കളങ്കപ്പെട്ടിരിക്കുന്നുവെന്നും യുവതി കുറിച്ചു.
നിമിഷ നേരങ്ങള്ക്കുള്ളിലാണ് യുവതിയുടെ വൈകാരികമായ കുറിപ്പും ദൃശ്യങ്ങളും വൈറലായത്. സംഭവത്തെത്തുടര്ന്ന് ഡെലിവറി സേവനദാതാക്കള് ഉപഭോക്താക്കളുടെ സുരക്ഷയ്ക്കും മുന്ഗണന നല്കണമെന്ന് നെറ്റിസണ്സ് ആവശ്യമുയര്ത്തി. വീഡിയോ ഇതിനകം 23 ലക്ഷത്തിലേറെ പേരാണ് കണ്ടത്.
