ന്യൂഡല്ഹി: രാജ്യത്തെ ജനനനിരക്ക് കുറയുന്ന സാഹചര്യത്തില് കൂടുതല് കുട്ടികളെ ജനിപ്പിക്കാന് സ്വന്തം നാട്ടുകാരായ സ്ത്രീകളോട് കരഞ്ഞു പറഞ്ഞ് ഉത്തരകൊറിയന് ഏകാധിപതി കിംഗ് ജോംഗ് ഉന്. അടുത്തിടെ നടന്ന ഒരു പരിപാടിയില് കിംഗ് ജോംഗ് ഉന് വികാര ഭരിതനായി തന്റെ നാട്ടുകാരികളോട് പറയുന്ന രംഗത്തിന്റെ വീഡിയോ പുറത്തുവന്നു. വീഡിയോയില് കിം ജോങ് ഉന് കണ്ണുനീര് തുടയ്ക്കുകയും വികാരഭരിതനായി കാണുകയും ചെയ്യുന്നു. സോഷ്യല് മീഡിയയില് വൈറലായിക്കൊണ്ടിരിക്കുന്ന വീഡിയോയില് താഴോട്ട് നോക്കി കണ്ണുനീര് തുടയ്ക്കുന്നത് കാണാം. നേതാവ് കരയുമ്പോള് കാണികളില് പലരും കണ്ണീരൊഴുക്കുന്നതും ദൃശ്യങ്ങളിലുണ്ട്.
'ജനന നിരക്കിലെ ഇടിവ് തടയുക, നല്ല ശിശുപരിപാലനം എന്നിവയെല്ലാം അമ്മമാരോടൊപ്പം ജോലി ചെയ്യുമ്പോള് നമ്മള് കൈകാര്യം ചെയ്യേണ്ട ഗൃഹപാലന ചുമതലകളാണ്,' ഞായറാഴ്ച പ്യോങ്യാങ്ങില് അമ്മമാര്ക്കായുള്ള പരിപാടിയില് കിമ്മിനെ ഉദ്ധരിച്ച് വാര്ത്താ ഏജന്സി റോയിട്ടേഴ്സ് പറഞ്ഞു. ദേശീയ ശക്തിയെ ശക്തിപ്പെടുത്തുന്നതില് അമ്മമാര് വഹിച്ച പങ്കിന് അദ്ദേഹം നന്ദി പറയുകയും ചെയ്തു. യുണൈറ്റഡ് നേഷന്സിന്റെ പോപ്പുലേഷന് ഫണ്ട് 2023 ല് കണക്കാക്കിയത് ഉത്തര കൊറിയയിലെ ജനന നിരക്ക് 1.8 ആണ്. അടുത്ത ദശകങ്ങളില് അത് ഇനിയും കുറയാനുള്ള പ്രവണതയാണ് കാണിക്കുന്നതും. 2023 ലെ കണക്കനുസരിച്ച്, ഒരു സ്ത്രീക്ക് ജനിക്കുന്ന കുട്ടികളുടെ ശരാശരി എണ്ണം 1.8 ആയിരുന്നു.
അതേസമയം ഈ നിരക്ക് ഉത്തരകൊറിയയുടെ ചില അയല്രാജ്യങ്ങളേക്കാള് കൂടുതലാണ്. ദക്ഷിണ കൊറിയയുടെ ഫെര്ട്ടിലിറ്റി നിരക്ക് കഴിഞ്ഞ വര്ഷം റെക്കോര്ഡ് കുറവായിരുന്നു. 0.78 ആയി കുറഞ്ഞപ്പോള് ജപ്പാനില് അതിന്റെ കണക്ക് 1.26 ആയി കുറഞ്ഞു. ദക്ഷിണ കൊറിയയിലെ ജനനനിരക്ക് കുറയുന്നത് ശിശുരോഗ വിദഗ്ധരുടെ കുറവിനും കാരണമായിട്ടുണ്ട്. ഇത് കൂട്ടാനായി ഒരു നഗരം മാച്ച് മേക്കിംഗ് ഇവന്റുകള് സംഘടിപ്പിച്ചിരുന്നു. അതേസമയം ഏകദേശം 25 ദശലക്ഷം ജനസംഖ്യയുള്ള ഉത്തരകൊറിയയ്ക്ക് കടുത്ത ദാരിദ്ര്യം നേരിടേണ്ടി വരുന്നുണ്ട്.
സമീപ ദശകങ്ങളില് ഗുരുതരമായ ഭക്ഷ്യക്ഷാമം നേരിടേണ്ടി വന്നിട്ടുണ്ട്, 1990-കളിലെ മാരകമായ ക്ഷാമം ഉള്പ്പെടെ, പലപ്പോഴും വെള്ളപ്പൊക്കം പോലുള്ള പ്രകൃതിദുരന്തങ്ങളുടെ ഫലമായി വിളവെടുപ്പ് നശിച്ചതായിരുന്നു ഇതിന് കാരണം.
