കൊച്ചി : മുതിര്ന്ന സി പി ഐ നേതാവും സി പി ഐ സംസ്ഥാന സെക്രട്ടറി കാനം രാജേന്ദ്രന് അന്തരിച്ചു. കൊച്ചി അമൃത ആശുപത്രിയിലായിരുന്നു അന്ത്യം. പ്രമേഹരോഗം മൂർച്ഛിച്ചതിനെ തുടർന്ന് ചികിത്സയിലായിരുന്നു. ഇന്ന് വൈകിട്ടോടെ ഹൃദയാഘാതത്തെ തുടര്ന്നായിരുന്നു അന്ത്യം. ഭാര്യ: വനജ. മക്കൾ: സന്ദീപ്, സ്മിത. മരുമക്കൾ: താരാ സന്ദീപ്, വി. സർവേശ്വരൻ.
ആരോഗ്യ പ്രശ്നങ്ങള് മൂലം ഏറെ നാളായി പാര്ട്ടിയുടെ സജീവ പ്രവര്ത്തനങ്ങളില് നിന്ന് മാറി നിന്നിരുന്ന കാൽപ്പാദം മുറിച്ചുമാറ്റുന്ന ശസ്ത്രക്രിയയ്ക്ക് അദ്ദേഹത്തെ വിധേയനാക്കായിരുന്നു. സംസ്ഥാന സെക്രട്ടറി സ്ഥാനത്തുനിന്ന് അവധി നൽകണമെന്ന അപേക്ഷ ദേശീയ നേതൃത്വം പരിഗണിക്കുന്നതായി ഇന്ന് രാവിലെ വാർത്ത വന്നിരുന്നു. കഴിഞ്ഞ രണ്ടു ടേമുകളായി സിപിഐ സംസ്ഥാന സെക്രട്ടറിയായി തുടരുകയായിരുന്നു.
കോട്ടയം ജില്ലയിലെ കാനത്ത് 1950 നവംബര് 10-നായിരുന്നു അദ്ദേഹത്തിന്റെ ജനനം. എഴുപതുകളില് വിദ്യാര്ത്ഥി രാഷ്ട്രീയത്തിലൂടെ കാനം രാഷ്ട്രീയരംഗത്ത് പ്രവേശിക്കുന്നത്. 1971ല് 21-ാം വയസ്സില് സംസ്ഥാനകൗണ്സിലില് എത്തി. എന് ഇ ബല്റാം പാര്ട്ടി സെക്രട്ടറിയായിരുന്നപ്പോള് 1975-ല് എം എന് ഗോവിന്ദന് നായര്, ടി വി തോമസ്, സി അച്യുതമേനോന് എന്നിവര്ക്കൊപ്പം പാര്ട്ടിയുടെ സംസ്ഥാന സെക്രട്ടേറിയറ്റില് ഉള്പ്പെട്ടു.
1982 മുതൽ 1991 വരെ വാഴൂർ നിയോജകമണ്ഡലത്തിന്റെ നിയമസഭാംഗമായിരുന്നു.
എഐവൈഎഫ് സംസ്ഥാനസെക്രട്ടറിയും ദേശീയ വൈസ് പ്രസിഡന്റുമായിരുന്ന കനാത്തിന്റെ പോരാട്ടവീര്യം എഐടിയുസിയിലൂടെയും കേരളം കണ്ടു. സംസ്ഥാന ജനറല് സെക്രട്ടറിയായ അദ്ദേഹം സംഘടനയെ ഇന്ത്യയിലെ കരുത്തുള്ള ഘടകമാക്കിമാറ്റി. സിനിമ, ഐ.ടി, പുതുതലമുറബാങ്കുകള് തുടങ്ങി എഐടിയുസിക്ക് വിവിധ മേഖലകളില് ഘടകങ്ങളുണ്ടാക്കി
2006-ല് എ.ഐ.ടി.യു.സി.യുടെ സംസ്ഥാന ജനറല് സെക്രട്ടറിയായ അദ്ദേഹം 2012 ല് സിപിഐ ദേശീയ എക്സിക്യുട്ടീവ് അംഗവുമായി. 2015 അദ്ദേഹം കമ്മ്യൂണിസ്റ്റ് പാര്ട്ടി ഓഫ് ഇന്ത്യയുടെ കേരള സംസ്ഥാന സെക്രട്ടറിയായി തെരഞ്ഞെടുക്കപ്പെട്ടു.
