തിരക്കേറിയ ജീവിതത്തിനിടയില് ഭക്ഷണത്തിനായി ഇന്ന് കൂടുതല് ആളുകളും ഓണ്ലൈന് ഫുഡ് ഡെലിവറി സര്വ്വീസുകളെയാണ് ആശ്രയിക്കുന്നത്. അതുകൊണ്ട് തന്നെ രാജ്യത്തുടനീളം നിരവധി ഓണ്ലൈന് ഭക്ഷണ സേവനങ്ങള് ലഭ്യമാണ്. ഒരു വര്ഷത്തെ കണക്കെടുത്താല് ഏകദേശം 5000 മുതല് 10000 രൂപ വരെ എങ്കിലും ഒരാള് ഓാണ്ലൈനായി ഭക്ഷണം ഓര്ഡര് ചെയ്തിട്ടുണ്ടാകും. അതുമല്ലെങ്കില് ആയിരമോ രണ്ടായിരമോ മാത്രമായിരിക്കും ഇതിനായി ചെലവഴിച്ചിട്ടുള്ളത്. എന്നാല് മുംബൈയില് നിന്നുള്ള ഒരു ഉപഭോക്താവ് 2023 ല് മാത്രമായി ഓണ്ലൈന് ഭക്ഷ്യശൃഖംലയായ സ്വിഗ്ഗിയിലൂടെ ഓര്ഡര് ചെയ്തത് 42 ലക്ഷം രൂപയുടെ ഭക്ഷണമാണ്.
2023 'സ്വിഗ്ഗി റാപ്പ്' റിപ്പോര്ട്ടിലൂടെ സ്വിഗ്ഗി തന്നെയാണ് ഈ കണ്ണ് തള്ളുന്ന കണക്ക് പുറത്ത് വിട്ടത്. ഏകദേശം അരക്കോടിയോളം രൂപയുടെ ഓര്ഡറാണ് ഇയാള് സ്വിഗ്ഗിയിലൂടെ നടത്തിയിരിക്കുന്നത്. വിവരം പുറത്തുവന്നതോടെ സംഭവം സമൂഹ മാധ്യമങ്ങളില് വന് ചര്ച്ചകള്ക്ക് വിധേയമായി. നിരവധി ആളുകളാണ് തങ്ങളുടെ അഭിപ്രായങ്ങളുമായി രംഗത്തെത്തിയത്. 42 ലക്ഷം രൂപയുടെ ഭക്ഷണം എത്ര കലോറി ആയിരിക്കും എന്നായിരുന്നു ഒരു സോഷ്യല് മീഡിയ ഉപയോക്താവിന്റെ ചോദ്യം. മറ്റൊരാള് രസകരമായി കുറിച്ചത് ഈ സ്വിഗ്ഗി ഉപയോക്താവിനെ തേടി ആദായനികുതി വകുപ്പ് ഇറങ്ങിയിട്ടുണ്ടെന്നാണ്. മുംബൈ വെറും സാമ്പത്തിക തലസ്ഥാനം മാത്രമല്ല, ഇന്ത്യയുടെ ഭക്ഷ്യ തലസ്ഥാനം കൂടിയാണെന്നായിരുന്നു മൂന്നാമത്തെ ആള് അഭിപ്രായപ്പെട്ടത്. 42.3 ലക്ഷം രൂപ ഒരു വര്ഷം ഭക്ഷണത്തിനായി ഒരു വ്യക്തി ഉപയോഗിച്ചിട്ടുണ്ടെങ്കില് ഒരു ദിവസം 11,500 രൂപ ശരാശരി വരുമെന്നാണ് സോഷ്യല് മീഡിയയിലെ ഒരു കണക്കപ്പിള്ളയുടെ കണക്ക്.
എന്നാല് അതേസമയം ഇത്രയധികം ഭക്ഷണം ഒരു വ്യക്തിക്കായി വാങ്ങിയതല്ല എന്നാണ് പലരും അഭിപ്രായപ്പെട്ടത്. ഏതെങ്കിലും സ്ഥാപനത്തിലേക്കോ ഒരു കുടുംബത്തിലെ മുഴുവന് വ്യക്തികള്ക്കുമായോ വാങ്ങിയ ഭക്ഷണ ആയിരിക്കാമെന്നുമാണ് പറയുന്നത്. സ്വിഗ്ഗിയുടെ വാര്ഷിക റിപ്പോര്ട്ടില് ശ്രദ്ധിക്കപ്പെട്ട കാര്യം ഇതുമാത്രമല്ല. 2023-ല് ഇന്ത്യയില് ഓരോ സെക്കന്ഡിലും 2.5 ബിരിയാണികള് ഓര്ഡര് ചെയ്തുവെന്നും റിപ്പോര്ട്ട് ചൂണ്ടിക്കാട്ടുന്നു. മറ്റൊരു രസകരമായ കാര്യം ചണ്ഡീഗഢില് ഇന്ത്യ - പാകിസ്ഥാന് മത്സരത്തിനിടെ ഒരു കുടുംബം 70 പ്ലേറ്റ് ബിരിയാണിയാണ് ഓര്ഡര് ചെയ്തതെന്നതാണ്.
