കൊല്ലം: നവകേരള സദസുമായി ബന്ധപ്പെട്ട പ്രതിഷേധത്തിന്റെ ഭാഗമായി കറുപ്പണിഞ്ഞെത്തുന്നവരെ പോലീസ് നേരിടുന്നതിനാല് മുഖ്യമന്ത്രിയും മന്ത്രിമാരും എത്തുന്ന വഴിയില് ശരീരമാസകലം വെള്ളച്ചായം പൂശി ബി.ജെ.പി. പഞ്ചായത്ത് അംഗത്തിന്റെ വേറിട്ട പ്രതിഷേധം.
മുഖ്യമന്ത്രിയും സംഘവും പത്തനാപുരത്തെത്തുന്നതിന് തൊട്ടുമുമ്പാണ് തലവൂര് ഗ്രാമപഞ്ചായത്ത് അംഗമായ സി. രഞ്ജിത്ത് വേറിട്ട പ്രതിഷേധവുമായി എത്തിയത്. കൊട്ടാരക്കര-കിഴക്കേത്തെരുവ് പാതയിലെ തലവൂര് രണ്ടാലുംമൂട് ജങ്ഷനില് രാവിലെ പത്തോടെ വെള്ളച്ചായം പൂശിയ ഇരുമ്പ് കസേരയുമായി നിലയുറപ്പിച്ച രഞ്ജിത്തിനെ മുഖ്യമന്ത്രിയും സംഘവും എത്തുന്നതിനു മുമ്പുതന്നെ കുന്നിക്കോട് പോലീസ് കസ്റ്റഡിയിലെടുത്തു. ഇതിനുശേഷമാണ് നവകേരള യാത്രാ സംഘം ഇതുവഴി കടന്നുപോയത്.
പോലീസ് പിടികൂടുമെന്ന് ഭയന്നാണ് താന് ശരീരത്തില് വെള്ള പെയിന്റ് അടിച്ചതെന്ന് രഞ്ജിത്ത് പരിഹാസത്തോടെ പറഞ്ഞു. കറുത്ത ഷര്ട്ട് ഇട്ടാല് പോലും ആളുകളെ പിടിച്ചുകൊണ്ടുപോകുന്ന സ്ഥിതിയാണുള്ളത്. തന്നെ സൃഷ്ടിച്ചതു കറുപ്പ് നിറത്തോടെയാണ്. അതുകൊണ്ടാണ് രാജാവ് എഴുന്നള്ളുമ്പോള് ബുദ്ധിമുട്ട് ഉണ്ടാകാതിരിക്കാനായി കറുപ്പ് നിറത്തെ വെള്ള പൂശി മറച്ചതെന്നും രഞ്ജിത് പരിഹസിച്ചു. വാര്ഡിലെ തുടര്ച്ചയായ െവെദ്യുതി മുടക്കത്തിനെതിരേ കെ.എസ്.ഇ.ബി. ഓഫീസില് ചില്ലറയുമായി എത്തി പ്രതിഷേധം നടത്തി രഞ്ജിത് ശ്രദ്ധനേടിയിരുന്നു
നവകേരള യാത്രയുമായി ബന്ധപ്പെട്ട് കൊട്ടാരക്കരയില്നിന്ന് തലവൂര് വഴി പത്തനാപുരത്തേക്കു വന്ന മുഖ്യമന്ത്രിക്കും മന്ത്രിമാര്ക്കുമെതിരേ കരിങ്കൊടി പ്രതിഷേധവുമായി യൂത്ത് കോണ്ഗ്രസ്, കെ.എസ്.യു. പ്രവര്ത്തകരും എത്തിയിരുന്നു. നടുത്തേരിയില് പ്രതിഷേധമുയര്ത്താന് സംഘടിച്ചുനിന്ന പ്രവര്ത്തകരും പോലീസും തമ്മില് വാക്കേറ്റവും ഉന്തും തള്ളുമുണ്ടായി.
