പത്തനംതിട്ട: നിര്ദിഷ്ട ശബരിമല വിമാനത്താവളത്തിന് വേണ്ടി 2570 ഏക്കര് ഏറ്റെടുക്കാന് സര്ക്കാര് ഉത്തരവിട്ടെങ്കിലും ബിലീവേഴ്സ് ചര്ച്ചിന്റെ ഉടമസ്ഥതയിലുളള ചെറുവളളി എസ്റ്റേറ്റ് വലിയ കടമ്പയാകും. 2263 ഏക്കര് വരുന്ന എസ്റ്റേറ്റ് ഏറ്റെടുക്കാന് നിയമ തടസങ്ങള് ഏറെയാണ്. എസ്റ്റേറ്റ് ഭൂമി സംബന്ധിച്ച് കോടതിയില് നടക്കുന്ന കേസുകളില് സര്ക്കാര് കാണിച്ചിട്ടുള്ള മണ്ടത്തരങ്ങള് തന്നെയാകും മുഖ്യതടസം.
നിലവില് എസ്റ്റേറ്റിന്റെ ഉടമസ്ഥാവകാശം കോടതി വിധികള് പ്രകാരം ബിലീവേഴ്സ് ചര്ച്ചിന് തന്നെയാണ്. എസ്റ്റേറ്റിന്റെ ആധാരം വ്യാജമാണെന്നുള്ള രാജമാണിക്യം റിപ്പോര്ട്ടിന്റെ അടിസ്ഥാനത്തില് സര്ക്കാര് ഏറ്റെടുക്കാന് തീരുമാനിച്ചെങ്കിലും ബിലിവേഴ്സ് ചര്ച്ച് കോടതിയെ സമീപിക്കുകയും അനുകൂലവിധി സമ്പാദിക്കുകയും ചെയ്തിരുന്നു. ആധാരത്തിന്റെ സാധുത സംബന്ധിച്ച് അന്തിമ തീര്പ്പ് കല്പ്പിക്കേണ്ടത് സബ് കോടതിയാണെന്നുള്ള ഹൈക്കോടതി പരാമര്ശത്തിന്റെ അടിസ്ഥാനത്തില് കോട്ടയം ജില്ലാ കലക്ടര് പാലാ സബ്കോടതിയില് ഹര്ജിയും നല്കി വാദം നടന്നു വരികയാണ്.
ഇവിടെയാണ് സര്ക്കാര് മണ്ടത്തരങ്ങള് തന്നെ കാണിച്ചു കൂട്ടിയിട്ടുള്ളത്. ഹൈക്കോടതി ഉത്തരവ് അനുസരിച്ച് കൊണ്ട് പാലാ സബ്കോടതിയില് ഹര്ജി നല്കിയ സര്ക്കാര് തന്നെ ഇതേ ഉത്തരവിനെ എതിര്ത്തു കൊണ്ട് സുപ്രീംകോടതിയെ സമീപിക്കുകയും ചെയ്തു. സുപ്രീംകോടതി ഹര്ജി ഫയലില്പ്പോലും സ്വീകരിച്ചില്ല. ഒരേ ഉത്തരവിനെ എതിര്ത്തും അനുകൂലിച്ചും കാട്ടിയ മണ്ടത്തരം ബിലീവേഴ്സ് ചര്ച്ചിന് കോടതിയില് തുണയാകും.
ബിലീവേഴ്സ് ചര്ച്ച് തര്ക്ക ഭൂമിയായതിനാല് കോടതിയില് പണം കെട്ടിവച്ച് ഏറ്റെടുക്കാനാണ് സര്ക്കാരിന്റെ നീക്കം. ഇത് സാധിക്കില്ലെന്ന് നിയമ വിദഗ്ധര് പറയുന്നു. ലാന്ഡ് അക്വിസിഷന് ആക്ട് പ്രകാരം രണ്ട് വ്യക്തികള് തമ്മില് ഉടമസ്ഥാവകാശ തര്ക്കത്തിലിരിക്കുന്ന ഭൂമി മാത്രമേ ഇങ്ങനെ ഏറ്റെടുക്കാന് കഴിയൂ. ഇവിടെ തര്ക്കം സര്ക്കാരുമായിട്ടാണ്. അവിടെ തീരുമാനം സര്ക്കാരിന് എടുക്കാം. ഭൂമി തങ്ങളുടേതാണെന്ന് സര്ക്കാരിന് ഉറപ്പുണ്ടെങ്കില് ഏറ്റെടുക്കാം. ഇതിനായി കോടതിയില് പണം കെട്ടിവയ്ക്കേണ്ട കാര്യമില്ല. ഭൂമി വിട്ടുകൊടുക്കാന് ബിലീവേഴ്സ് ചര്ച്ച് തയാറല്ല. ഇക്കാര്യം ചൂണ്ടിക്കാട്ടി അവര് കോടതിയെ സമീപിക്കും.
ഇത് സര്ക്കാരിന്റെ ഭൂമിയാണെന്ന് സര്ക്കാര് രാജമാണിക്യം റിപ്പോര്ട്ടിന്റെ അടിസ്ഥാനത്തില് ഉത്തരവിട്ടതാണ് ബിലീവേഴ്സ് ചര്ച്ച് ഹൈക്കോടതിയെ സമീപിച്ച് റദ്ദാക്കിയത്. അപ്പീലുമായി സര്ക്കാര് സുപ്രീംകോടതിയില് ചെന്നെങ്കിലും ഫയലില് സ്വീകരിച്ചില്ല. ഇതോടെ സര്ക്കാര് വെട്ടിലാണ്. സബ്കോടതിയില് നല്കിയ കേസ് നിലനില്ക്കില്ലെന്ന് ചൂണ്ടിക്കാട്ടി ബിലീവേഴ്സ് ചര്ച്ച് ഹൈക്കോടതിയെ സമീപിച്ചാല് സര്ക്കാര് വെട്ടിലാകും. ഒരേ സമയം ഉത്തരവിനെ എതിര്ക്കുകയും അനുകൂലിക്കുകയും ചെയ്ത സര്ക്കാര് നടപടിയാകും ചൂണ്ടിക്കാണിക്കുക.
സബ്കോടതിയില് തങ്ങളുടെ ഭൂമിയാണെന്ന് പറഞ്ഞ് ഹര്ജി കൊടുത്തിരിക്കുന്ന സര്ക്കാര് ഇതേ ഭൂമി തന്നെ കോടതിയില് പണം കെട്ടി വച്ച് ഏറ്റെടുക്കാന് നടത്തുന്ന നീക്കവും വൈരുദ്ധ്യമാണ്. ഉടമസ്ഥാവകാശം ഉറപ്പുണ്ടെങ്കില് പണം കെട്ടി വച്ച് ഏറ്റെടുക്കേണ്ട കാര്യമില്ല. ഇതെല്ലാം ഭൂമി ഏറ്റെടുക്കലില് സര്ക്കാരിനെ വെട്ടിലാക്കുന്ന കാര്യങ്ങളാണ്. ചുരുക്കത്തില് വിമാനത്താവളത്തിന് വേണ്ട പ്രധാനപ്പെട്ട ഭൂമി സര്ക്കാരിന് ഏറ്റെടുക്കാന് കഴിയില്ല. അതു കൊണ്ട് തന്നെ ഇപ്പോള് പുറപ്പെടുവിച്ചിരിക്കുന്ന ഉത്തരവുകളൊക്കെ തന്നെ പാഴാകും.
