ലക്നൗ: മനഃസാക്ഷിയെ ഞെട്ടിക്കുന്ന വാര്ത്തയാണ് ഉത്തര്പ്രദേശിലെ ഝാന്സിയില് നിന്ന് വരുന്നത്. 200 രൂപയെ ചൊല്ലിയുള്ള തര്ക്കത്തിന്റെ പേരില് പത്താം ക്ലാസുകാരനെ സഹപാഠികള് മദ്യം കുടിപ്പിച്ച് നഗ്നാക്കി മര്ദ്ദിക്കുകയും രംഗം വീഡിയോയില് ചിത്രീകരിക്കുകയും ചെയ്തു.
കടം വാങ്ങിയ പണം തിരികെ ചോദിച്ചായിരുന്നു മര്ദ്ദനം. തന്നെ ബെല്റ്റുകളും വടികളും കൊണ്ട് മര്ദ്ദിച്ചുവെന്നും രംഗം മൊബൈലില് ചിത്രീകരിച്ച് പ്രചരിപ്പിച്ചുവെന്നും കുട്ടി പോലീസിന് നല്കിയ പരാതിയില് പറയുന്നു. വസ്ത്രമുരിയാന് ആവശ്യപ്പെട്ട് മറ്റ് കുട്ടികള് അസഭ്യം പറയുന്നതും എതിര്ത്തപ്പോള് മുഖത്ത് അടിക്കുന്നതും വീഡിയോയില് കാണാം. വീഡിയോ പ്രചരിക്കുന്നത് തനിക്ക് അപമാനമാണെന്ന് ചൂണ്ടിക്കാട്ടി കുടുംബത്തോടൊപ്പം സ്റ്റേഷനിലെത്തി കുട്ടി പരാതിപ്പെടുകയായിരുന്നു.
രണ്ട് മാസം മുന്പാണ് ഒരു സുഹൃത്തിനോട് 200 രൂപ കടം വാങ്ങിയത്. എന്നാല് അത് തിരിച്ചുകൊടുക്കാനായില്ല. ഇതേചൊല്ലി തര്ക്കമുണ്ടായിരുന്നു. തിങ്കളാഴ്ച സുഹൃത്തിനൊപ്പം പാര്ക്കിലിരിക്കുമ്പോള് പണം നല്കിയ സഹപാഠി അടക്കം നാല് പേര് ഒരു കാറില് എത്തുകയും കാറിലേക്ക് വലിച്ചിഴച്ച് കയറ്റി സമീപത്തുള്ള ഒരു വനമേഖലയില് കൊണ്ടുപോയി മര്ദ്ദിക്കുകയുമായിരുന്നുവെന്ന് പറയുന്നു.
