കടുത്തുരുത്തി: നെല് കര്ഷകരെ വെട്ടിലാക്കി തൊഴിലാളി ക്ഷാമവും കൂടുതല് കൂലി വേണമെന്ന അതിഥിതൊഴിലാളികളുടെ ആവശ്യവും. പുഞ്ച കൃഷി പുരോഗമിക്കുമ്പോഴാണ് ഇരുട്ടടി. അതിഥി തൊഴിലാളികള് കൂടുതല് തുക ആവശ്യപ്പെടുന്നതാണു പ്രധാന പ്രശ്നമെന്നു കര്ഷകര് പറയുന്നു.
നാടന് തൊഴിലാളി ക്ഷാമം മുതലെടുത്തും പാടശേഖരങ്ങളില് തൊഴില് വര്ധിച്ചതും മുതലെടുത്താണ് ഇവര് കൂലി കൂടുതല് ആവശ്യപ്പെടുന്നത്. സീസണ് തുടക്കത്തില് ഒരാള്ക്ക് 850 രുപായുണ്ടായിരുന്നത് 900- 1000 രുപയായി ഉയര്ത്തണമെന്നാണ് അതിഥി തൊഴിലാളികളുടെ ആവശ്യം. കഴിഞ്ഞ വര്ഷം 750 - 800 രൂപയായിരുന്നു കൂലി. നിര്മാണമേഖലയിലെ ജോലി പകുതിയോളം സ്തംഭിച്ചതോടെ തൊഴിലാളികള് മറ്റു സംസ്ഥാനങ്ങളിലേക്കു പോയതാണ് ഇവിടെ തൊഴിലാളികള് കുറയാന് കാരണം. ഇതും അവര് മുതലെടുക്കുകയാണ്. അതിഥി തൊഴിലാളികളെ സെപ്ലെ ചെയ്യുന്ന ഏജന്റുമാരാണു കൂലി കൂടുതല് ആവശ്യപ്പെടുന്നത്.
ഏജന്റുമാര് ഒരു മാസം മുന്പ് കൃഷിപ്പണിക്കു കൂലി കുടുതല് ചോദിച്ചുവെങ്കിലും കര്ഷകര് തൊഴിലാളികളെ വിളിക്കാതായതോടെ കൂലി വര്ധന ആവശ്യം പിന്വലിച്ചു പഴയ കൂലിക്ക് തന്നെ ജോലി ചെയ്യാന് തീരുമാനിക്കുകയായിരുന്നു. എന്നാല്, പാടത്തെ പണി സജീവമായതോടെ വീണ്ടും കൂലി കൂടുതല് ചോദിക്കാന് തുടങ്ങിയെന്നു കര്ഷകര് പറയുന്നു. ഒന്നോ രണ്ടോ പേരുടെ ജോലി ആവശ്യമുള്ളവര് അവര് പറയുന്ന കൂലി നല്കി വിളിക്കുകയാണ്. കൂടുതല് ജോലിക്കാരെ ആവശ്യമുള്ള കര്ഷകരാണു ബുദ്ധിമുട്ടിലാകുന്നത്.
പടിഞ്ഞാറന് മേഖലയിലെ മിക്ക പാടശേഖരങ്ങളിലും പണിയ്ക്കിറങ്ങുന്നത് അതിഥി തൊഴിലാളികളാണ്. പുഞ്ചകൃഷി വിത പടിഞ്ഞാറന് മേഖലയില് ഏറെക്കുറെ പൂര്ണമായി. സമീപ ദിവസങ്ങളില് നട്ട പാടങ്ങള് മുതല് പകുതി വളര്ച്ചയെത്തിയ പാടങ്ങള് വരെയുണ്ട്.മഴ പൂര്ണമായും മാറാത്തത് കര്ഷകരെ ആശങ്കയിലാക്കുന്നുണ്ട്.
