വെള്ളിയാമറ്റം (ഇടുക്കി): പശുക്കള് കൂട്ടത്തോടെ ചത്ത് പോയപ്പോള് മാത്യു അനുഭവിച്ച വിഷമത്തിലൂടെ താനും കടന്നുപോയിട്ടുണ്ടെന്ന് നടന് ജയറാം. വെള്ളിയാമറ്റത്തെ മാത്യുവിന്റെ വീട്ടില് അഞ്ച് ലക്ഷത്തിന്റെ സഹായവുമായി എത്തിയപ്പോഴായിരുന്നു ജയറാം തന്റെ വേദനപ്പിക്കുന്ന ഓര്മ പങ്കുവച്ചത്. ആറു വര്ഷം മുമ്പ് തന്റെ ഫാമിലെ 22 പശുക്കളാണ് ചത്തത്. ആദ്യം ഒരു കിടാവ് നിലത്ത് വീണ് വയറ് വീര്ത്ത് ചത്തു.
കാരണം മനസിലായില്ല. തുറന്നുവിട്ട് തീറ്റിയാണ് വളര്ത്തിയിരുന്നത്. സ്വന്തം വീട്ടിലെ പശുക്കളെ കൂട്ടത്തോടെ കുഴിച്ചുമൂടിയ സമയത്താണ് താനും ഭാര്യയും ഏറ്റവും കൂടുതല് കരഞ്ഞിട്ടുള്ളത്. മാത്യുവിന്റെ പശുക്കള് ചത്ത വിവരം അറിഞ്ഞപ്പോള് മാത്യുവും കുടുംബവും അനുഭവിച്ച വേദന തനിക്ക് വ്യക്തമായി മനസിലാകും. ഇന്നലെ മുതല് ഇവരുടെ കാര്യമാണ് വീട്ടില് സംസാരം. രാവിലെ പത്രങ്ങള് കണ്ടപ്പോഴും സഹിക്കാനായില്ല.
പുതിയ സിനിമ എബ്രഹാം ഓസ്ലറിന്റെ ഓഡിയോ, ട്രെയ്ലര് ലോഞ്ച് ഇന്നാണ് നിശ്ചയിച്ചിരുന്നത്. ഇത് നടത്താതെ ആ തുക മാത്യുവിനും കുടുംബത്തിനും നല്കാന് തീരുമാനിക്കുകയായിരുന്നു. നിര്മാതാവ് ഇര്ഷാദ് എം. ഹസന്, ആന്റോ ജോസഫ്, സംവിധായകന് മിഥുന് മാനുവല് തോമസ് ചടങ്ങില് പങ്കെടുക്കാമെന്ന് അറിയിച്ചിരുന്ന നടന് പൃഥ്വിരാജ് തുടങ്ങി എല്ലാവരും കൂട്ടായെടുത്ത തീരുമാനമാണിത്.
കുട്ടികള്ക്ക് 10 പശുക്കളെയെങ്കിലും വാങ്ങാന് തുക സഹായിക്കുമല്ലോയെന്നും ജയറാം പറഞ്ഞു. ഇവിടെത്തന്നെ 100 പശുക്കളെ വളര്ത്താനുള്ള തൊഴുത്ത് നിര്മിക്കാന് മാത്യുവിനും കുടുംബത്തിനും സാധിക്കുമെന്ന ആത്മവിശ്വാസവും നല്കിയാണ് ജയറാം മടങ്ങിയത്. കൂടെ വരികയാണെങ്കില് താന് പശുക്കളെ വാങ്ങുന്ന കൃഷ്ണഗിരിയില് നിന്ന് നമുക്ക് പശുക്കളെ വാങ്ങാമെന്നും ജയറാം പറഞ്ഞു.
