കൊച്ചി: സിറോ മലബാര് സഭയുടെ മേജര് ആര്ച്ച് ബിഷപ്, എറണാകുളം-അങ്കമാലി അതിരൂപതയുടെ മെത്രാപ്പോലീത്താ എന്നീ നിലകളില് തന്റെ ദൗത്യനിര്വഹണത്തില് വന്നുപോയ കുറവുകളിലും പോരായ്കളിലും ഖേദിക്കുന്നുവെന്ന് കര്ദിനാള് മാര് ജോര്ജ് ആലഞ്ചേരി. സഭാ തലവന് എന്ന സ്ഥാനത്തുനിന്നുള്ള വിടപറയലില് എല്ലാവര്ക്കും നന്ദി പ്രകാശിപ്പിച്ചുകൊണ്ട് എഴുതിയ കത്തിലാണ് അദ്ദേഹത്തിന്റെ ഏറ്റുപറച്ചില്. സഭയുടെ നേതൃത്വത്തില് നിന്ന് മാറുമ്പോഴും സഭയുടെ എല്ലാ ദൗത്യമേഖലകളിലും കൂട്ടായ്മ സംഘടനാത്മകത, സഹകരണം എന്നിവയോടെ സാക്ഷ്യം വഹിക്കാന് സാധിക്കുമെന്ന ഉറച്ച പ്രത്യാശ തനിക്കുണ്ടെന്നും അദ്ദേഹം കത്തില് പറയുന്നു.
സഭാ തലവനെന്ന നിലയില് കഴിഞ്ഞ 12 വര്ഷവും മുന്പ് തക്കല രൂപതാദ്ധ്യക്ഷനെന്ന നിലയില് 13 വര്ഷവും ചെയ്ത സേവനത്തിന്റെ ഓര്മ്മ മനസ്സില് സജീവമായി നിലനില്ക്കുന്നുവെന്ന് പറയുന്ന മാര് ആലഞ്ചേരി, ഈ കാലയളവില് സഭയുടെ ഉന്നമനത്തിനായി താന് നടത്തിയ പ്രവര്ത്തനങ്ങള് കത്തില് ചൂണ്ടിക്കാട്ടുന്നുമുണ്ട്.
അതിരൂപതാ ഭൂമി ഇടപാട് കേസുകളും ആരാധനാക്രമ തര്ക്കവും രൂക്ഷമായി നില്ക്കുന്ന സാഹചര്യത്തിലാണ് ഡിസംബര് ഏഴിന് വത്തിക്കാന് ഇടപെടുന്നതും മാര് ആലഞ്ചേരിയുടെ മേജര് ആര്ച്ച് ബിഷപ്പ് സ്ഥാനം രാജിവയ്ക്കുന്നതും. അതിരുപതയുടെ അപ്പസ്തോലിക് അഡ്മിനിസ്ട്രേറ്റര് സ്ഥാനത്തുനിന്ന് ആര്ച്ച് ബിഷപ് മാര് ആന്ഡ്രൂസ് താഴത്തിനെയും വത്തിക്കാന് നീക്കിയിരുന്നു.
