ന്യൂഡല്ഹി: മുടങ്ങിയ ക്ഷേമപെന്ഷന് കിട്ടുന്നതിനു വേണ്ടി പോരാട്ടം നടത്തിയ അടിമാലി സ്വദേശി മറിയക്കുട്ടിയുടെ കഥ സമൂഹ മാധ്യമങ്ങളില് പങ്കുവച്ച് കേന്ദ്രമന്ത്രി പ്രകാശ് ജാവ്ദേക്കര്. നമ്മുടെ സ്ത്രീ ശക്തിയുടെ സവിശേഷ ഉദാഹരണമാണ് മറിയക്കുട്ടിയെന്ന് കേന്ദ്രമന്ത്രി പറയുന്നു. മറിയക്കുട്ടിയ്ക്കൊപ്പമുള്ള ചിത്രവും അദ്ദേഹം പങ്കുവച്ചിട്ടുണ്ട്.
'സമൂഹ മാധ്യമങ്ങളുടെ ശക്തി അപാരമാണ്. എനിക്കൊപ്പമുള്ളത് കേരളത്തില് നിന്നുള്ള 80 വയസ്സുള്ള മറിയക്കുട്ടിയാണ്. തന്റെ വാര്ദ്ധക്യകാല പെന്ഷന് മുടങ്ങിയതില് പിണറായി വിജയന് നയിക്കുന്ന എല്ഡിഎഫ് സര്ക്കാരിനെതിരെ അനന്യമായ പോരാട്ടം നടത്തി. 'സര്ക്കാര് എന്റെ പെന്ഷന് നിഷേധിച്ചു, അുകൊണ്ട് എന്ന സഹായിക്കണമെന്ന' പോസ്റ്ററും പിടിച്ച് റോഡിലൂടെ ചട്ടിയെടുത്ത് അവര് ഭിക്ഷയാചിച്ചു. അത് സമൂഹ മാധ്യമങ്ങളില് വൈറലായി. കോടതി വരെ സ്വമേധയാ ഇടപെട്ട് നോട്ടീസ് അയച്ചു. ഒടുവില് അനുകമ്പ തോന്നി എല്ഡിഎഫ് സര്ക്കാരിന് അവരുടെ പെന്ഷന് പുനഃസ്ഥാപിക്കേണ്ടിവന്നു. അനീതിക്കെതിരായ അവരുടെ വിജയകരമായ പോരാട്ടത്തിന് അവര്ക്ക് വ്യാപകമായ അംഗീകാരം ലഭിച്ചു. അവര് ജനങ്ങളുടെ താരമായി. തൃശൂരില് പ്രധാനമന്ത്രി നരേന്ദ്ര മോദി പങ്കെടുത്ത വനിതാ റാലിയിലും മോദിക്കൊപ്പം വേദിയിലും അവര് പങ്കെടുത്തിരുന്നു. നമ്മുടെ സ്ത്രീ ശാക്തികരണത്തിന്റെ ഏറ്റവും സവിശേഷമായ ഉദാഹരണമാണ് മറിയക്കുട്ടിയെന്നും അദ്ദേഹം പറയുന്നു.
