പത്തനംതിട്ട: നിലയ്ക്കല് ഭദ്രാസനാധിപന് ഡോ. ജാഷ്വാ മാര് നിക്കോദിമോസിനെ അധിക്ഷേപിച്ച് ശബ്ദരേഖ പുറത്തുവിട്ട വൈദികന് ഫാ. മാത്യൂസ് വാഴക്കുന്നത്തിനോട് സഭാ നേതൃത്വം വിശദീകരണം തേടി. ഭദ്രാസന ആസ്ഥാനത്ത് നേരിട്ടെത്തി വിശദീകരണം നല്കാനാണ് നിര്ദേശം. അതേസമയം, മെത്രാപ്പോലീത്തയ്ക്കെതിരെ പരസ്യമായി പ്രതികരിച്ചതില് അദ്ദേഹം ഖേദം പ്രകടിപ്പിച്ചതായും ഭദ്രാസനം പി.ആര്.ഒ അറിയിച്ചു.
അതിനിടെ, ബി.ജെ.പിയില് ചേര്ന്ന ഫാ.ഷൈജു കുര്യനെതിരെ ഉയര്ന്ന ആരോപണങ്ങളില് അന്വേഷണത്തിന് കമ്മീഷനെ നിയമിച്ചതായി ഭദ്രാസനം അറിയിച്ചു. കമ്മീഷന് രണ്ട് മാസത്തിനകം റിപ്പോര്ട്ട് സമര്പ്പിക്കണം. കമ്മീഷന്റെ അന്വേഷണ റിപ്പോര്ട്ടിന്റെ അടിസ്ഥാനത്തില് നടപടി സ്വീകരിക്കും. അദ്ദേഹത്തെ ഇടവകയുടെ ചുമതലയില് നിന്നും സണ്ഡേ സ്കൂള് വൈസ് പ്രസിഡന്റ് സ്ഥാനത്തുനിന്നും നീക്കി. ഭദ്രാസന സെക്രട്ടറി പദവി സഭയുടെ ഭരണഘടനാ അനുസരിച്ച് തിരഞ്ഞെടുക്കപ്പെട്ട പദവിയായതിനാല് ആ സ്ഥാനത്തുനിന്ന് നീക്കുന്നതില് പരിമിതിയുണ്ട്. വൈദികര് രാഷ്ട്രീയത്തില് ഇടപെടരുതെന്നാണ് വ്യക്തിപരമായ ആഗ്രഹം. മുന്പും വൈദികര് രാഷ്ട്രീയത്തില് ഇടപെട്ടിട്ടുണ്ട്. അതിന്റെ പേരില് നടപടി ഉണ്ടായിട്ടില്ല. ഇനിയുമാരെങ്കിലും രാഷ്ട്രീയത്തില് ഇടപെട്ടുവെന്ന് കരുതി നടപടിയെടുക്കാനാവില്ലെന്നും പി.ആര്.ഒ അറിയിച്ചു.
അതിനിടെ, ഭദ്രാസന ആസ്ഥാനത്ത് വിശ്വാസികളും വൈദിക പ്രതിനിധികളുമായി നടത്തിയ ചര്ച്ച പരാജയപ്പെട്ടു. ആരോപണ വിധേയനെ എല്ലാ ചുമതലകളില് നി്ന്നും മാറ്റിനിര്ത്തണമെന്ന് വിശ്വാസികള് ആവശ്യപ്പെട്ടു. ഫാ.ഷൈജു കുര്യന് ഗുണ്ടാത്തലവനെ പോലെയാണ് പെരുമാറുന്നത്. ഒരു വൈദികനും രാഷ്ട്രീയത്തില് ഇടപെടേണ്ടെന്നും വിശ്വാസികള് പറഞ്ഞു. ഫാ.ഷൈജുവിന്റെ കാര്യത്തില് ഭദ്രാസന മെത്രാപ്പോലീത്താ ഉചിതമായ നടപടി സ്വീകരിച്ചില്ലെങ്കില് പ്രതിഷേധവുമായി രംഗത്തെത്തുമെന്നും വിശ്വാസികള് അറിയിച്ചു.
