ദേവ്നാഗരി: കര്ണാടകയില് തടസ്സപ്പെട്ട പെന്ഷന് വാങ്ങാന് ഭിന്നശേഷിക്കാരിയായ 77 കാരി ഇഴഞ്ഞത് രണ്ടു കിലോമീറ്റര്. ഹരിഹര് നഗറിലെ വികലാംഗയായ ഗിരിജമ്മ എന്ന വൃദ്ധയാണ് പെന്ഷന് വന്നോ എന്നറിയാന് രണ്ടു കിലോമീറ്റര് അപ്പുറത്തുള്ള പോസ്റ്റോഫീസിലേക്ക് ഇഴഞ്ഞു നീങ്ങിയത്. പോസ്റ്റോഫീസ് വഴി വന്നിരുന്ന തന്റെ പെന്ഷന് ഏതാനും നാളായി കിട്ടാതെ വന്നതിനെ തുടര്ന്ന് എന്താണ് തടസ്സമെന്ന് അന്വേഷിക്കാന് വേണ്ടിയായിരുന്നു കാലു രണ്ടും തളര്ന്ന അവസ്ഥയിലുള്ള സ്ത്രീ ഇഴഞ്ഞ് എത്തിയത്.
മക്കളില്ലാത്ത ഗിരിജമ്മയുടെ ഉപജീവനമാര്ഗ്ഗം കുടുംബപെന്ഷനാണ്. ഇത് വന്നിരുന്നത് കുനിബേലേക്കേരാ ഗ്രാമത്തിലെ പോസ്റ്റോഫീസ് വഴിയാണ്. ഏതാനും നാളായി പെന്ഷന് മുടങ്ങിയ അവസ്ഥയില് വിലാസം സംബന്ധിച്ച വിഷയമെന്തെങ്കിലും ആണെങ്കില് പരിഹരിക്കണം എന്ന ലക്ഷ്യത്തിലാണ് ഇവര് പോസ്റ്റോഫീസിലേക്ക് നീങ്ങിയത്. എല്ലാമാസവും 10,000 രൂപ വീതം പെന്ഷന് കിട്ടുമായിരുന്നു. എന്നാല് രണ്ടുമാസമായി പെന്ഷന് കിട്ടാതെ വന്നതിനാല് ഓട്ടോയിലോ ബസിലോ പോരാന് നയാപൈസ കയ്യിലില്ലാത്ത സ്ഥിതി വന്നതോടെയാണ് ഇവര് ഇഴഞ്ഞു വലിഞ്ഞ് പോസ്റ്റോഫീസിലേക്ക് എത്തിച്ചേര്ന്നതെന്ന് ഇവര് കണ്ണീരോടെ പറഞ്ഞു.
ഇത്രയും ദൂരം നീന്തി എത്തിയതിനെ തുടര്ന്ന് കാലെല്ലാം പൊള്ളി പൊങ്ങി. ഒരാഴ്ച മുമ്പ് നടന്ന സംഭവത്തിന്റെ വീഡിയോ വൈറലായി മാറിയതോടെ കടുത്ത പ്രതിഷേധം ഉയര്ന്നിട്ടുണ്ട്. സംഗതി വിവാദമായി മാറിയതോടെ വില്ലേജിലെയും ഗ്രാമപഞ്ചായത്തിലെയും ഉദ്യോഗസ്ഥരുടെ ഇടപെടലും ഉണ്ടായി. 2023 നവംബറിന് ശേഷം ഇവര്ക്ക് പെന്ഷന് കിട്ടിയിട്ടില്ലെന്നാണ് ഗിരിജമ്മ പറഞ്ഞത്. അതേസമയം 2012 ല് പദ്ധതിയില് ഉള്പ്പെടുത്തിയ ശേഷം ഒരു തവണ പോലും മുടക്കമില്ലാതെ ഗിരിജമ്മയ്ക്ക് പണം കിട്ടിക്കൊണ്ടിരുന്നതാണെന്ന് അധികൃതരും പറയുന്നു. എന്നിരുന്നാലൂം കുനേബെലേക്കരെയിലെ ആശാവര്ക്കര്മാര് തഹസീല്ദാരുടെ ശ്രദ്ധയില് ഗിരിജമ്മയുടെ വിഷയം എത്തിച്ചിട്ടുണ്ട്. തുടര്ന്ന് ഗ്രാമ പഞ്ചായത്ത് ഉദ്യോഗസ്ഥര് ഇവരെ ഹരിഹര് ഹോസ്പിറ്റിലില് വന്നു കണ്ടിരുന്നു.
