കണ്ണൂര്: കൈവെട്ടുകേസില് ഒളിവില് കഴിയുകയായിരുന്ന പ്രതി സവാദിനെ കുടുക്കിയത് കുഞ്ഞിന്റെ ജനന സര്ട്ടിഫിക്കറ്റില് രേഖപ്പെടുത്തിയ പേര്. ഷാജഹാന് എന്ന പേരില് വിവാഹം കഴിച്ച സവാദ് പക്ഷേ കുഞ്ഞിന്റെ ജനന സര്ട്ടിഫിക്കറ്റില് ഒറിജിനല് പേരായ എംഎം സവാദ് എന്ന് നല്കിയതാണ് എന്ഐഎ യ്ക്ക് ഇയാളെ പിടികൂടാന് സഹായകരമായി മാറിയത്.
ഷാനവാസ് എന്ന പേരില് ഭാര്യാപിതാവിനെ പരിചയപ്പെട്ട സവാദ് വിവാഹ റജിസ്റ്ററില് നല്കിയ പേര് ഷാജഹാന് എന്നായിരുന്നു. ഇതിന് പിന്നാലെയാണ് കുഞ്ഞിന്റെ സര്ട്ടിഫിക്കറ്റില് സവാദ് എന്ന് പേര് നല്കിയത്. കണ്ണൂര് സ്വദേശിയാണെന്നും തനിക്ക് വീട്ടില് ആരുമില്ലെന്നും പറഞ്ഞായിരുന്നു ഷാജഹാന് വിവാഹത്തിന് സമീപിച്ചതെന്നായിരുന്നു കഴിഞ്ഞദിവസം ഭാര്യയുടെ പിതാവ് മാധ്യമങ്ങളോട് പറഞ്ഞത്. സവാദിന്റെ പൂര്വ്വകാല കാര്യങ്ങളോ കൈവെട്ട് കേസിലെ പ്രതിയാണെന്നതോ അറിയാതെയാണ് തങ്ങള് മകളുടെ വിവാഹം സവാദുമായി നടത്തിയതെന്നും ഇപ്പോള് എന്ഐഎ പിടികൂടിയപ്പോള് മാത്രമാണ് വിവരം അറിഞ്ഞതെന്നുമായിരുന്നു പ്രതികരണം. ഇത് അന്വേഷണസംഘം മുഖവിലയ്ക്ക് എടുത്തിട്ടില്ല.
ഷാജഹാന് എന്ന പേരില് ആരുമില്ലെന്ന് പറഞ്ഞ് എത്തിയ സവാദുമായി വിവാഹം നടത്തുന്നതില് യുവതിയുടെ ബന്ധുക്കള്ക്ക് അതൃപ്തി ഉണ്ടായിരുന്നതായിട്ടാണ് വിവരം. അന്വേഷണം നടത്താതെ വിവാഹം നടത്തിയതില് ഇവര്ക്കെല്ലാം അതൃപ്തിയുണ്ടായിരുന്നു എന്നും പിതാവിന്റെ നിര്ബ്ബന്ധത്തിന് വഴങ്ങിയാണ് വിവാഹം നടത്തിയതെന്നുമാണ് വിവരം. യുവതിയുടെ പിതാവ് സവാദിനെ അറിയുമായിരുന്നില്ല എന്ന രീതിയില് നടത്തുന്ന പ്രതികരണത്തില് പകുതിയിലധികം കള്ളമാണെന്ന രീതിയിലാണ് എന്ഐഎ സംഘവും മുമ്പോട്ട് പോകുന്നത്.
കണ്ണൂരിലെ മട്ടന്നൂരില് ഭാര്യയും രണ്ടു കുട്ടികള്ക്കുമൊപ്പം ഒളിച്ചു താമസിക്കുകയായിരുന്ന സവാദ് ഇവിടെയും ഷാജഹാന് എന്നാണ് ആള്ക്കാരോട് പറഞ്ഞിരുന്ന പേര്. ഒരു വര്ഷമായി ഇവിടെ കഴിയുകമായിരുന്ന സവാദ് അടുത്തുള്ള ആള്ക്കാരുമൊന്നുമായും അധികം ബന്ധം പുലര്ത്തിയിരുന്നില്ല. വാടകകാലാവധി കഴിഞ്ഞതിനാല് മറ്റൊരിടത്തേക്ക് മാറാനായി ഒരുങ്ങുമ്പോഴായിരുന്നു എന്ഐഎ അപ്രതീക്ഷിതമായി പിടികൂടിയത്. പുറത്ത് അധികം ഇറങ്ങാതെ സൂക്ഷിച്ചിരുന്ന സവാദ് ജോലിക്ക് പോയിരുന്നത് രാവിലെ ഓട്ടോയിലായിരുന്നു. തിരികെ വന്നിരുന്നത് രാത്രി ഏറെ വൈകിയും. ഇയാള്ക്ക് പുറത്തു നിന്നും സഹായം കിട്ടിയിട്ടുണ്ടോ എന്ന പരിശോധനയിലാണ് ഇപ്പോള് അന്വേഷണ സംഘം.
