തൃശൂര്: ലോക്സഭാ തെരഞ്ഞെടുപ്പുമായി ബന്ധപ്പെട്ട സ്ഥാനാര്ത്ഥി നിര്ണ്ണയ ചര്ച്ചകള് യുഡിഎഫില് ഇതുവരെ തുടങ്ങിയിട്ടുപോലുമില്ല എന്നിരിക്കെ കോണ്ഗ്രസ് നേതാവ് ടി.എന്. പ്രതാപന് വേണ്ടി വീണ്ടും ചുവരെഴുത്ത് തൃശൂരില് പ്രത്യക്ഷപ്പെട്ടു. തൃശൂര് എളവള്ളിയിലാണ് പ്രതാപന് വേണ്ടി തെരഞ്ഞെടുപ്പ് ചുവരെഴുത്ത് കണ്ടെത്തിയത്.
തൃശൂര് ലോകസഭാ മണ്ഡലത്തില് ടി എന് പ്രതാപന് എംപിയുടെ പേരില് യുഡിഎഫ് പ്രവര്ത്തകര് നേരത്തേ തന്നെ ചുവരെഴുത്ത് തുടങ്ങിയ വിവരം പുറത്തുവന്നിരുന്നു. മണ്ഡലത്തിലെ വിവിധ പ്രദേശങ്ങളിലാണ് ചുവരെഴുത്ത്. എന്നാല് ചുവരെഴുത്ത് വ്യാപകമായതോടെ ടിഎന് പ്രതാപന് ഇടപെട്ട് ഇത് മായ്ച്ചിരുന്നു. ഇതിന് പിന്നാലെയാണ് വീണ്ടും ചുവരെഴുത്തുമായി അണികള് ആവേശത്തിലായത്.
അതേസമയം ദേശീയശ്രദ്ധ ആകര്ഷിച്ച മണ്ഡലമായ തൃശൂരില് ചല പ്രവര്ത്തകരുടെ വികാരവും ആവേശവുമാണ് ചുവരെഴുത്തിന് കാരണമായിരിക്കുന്നതെന്നും പാര്ട്ടി പറഞ്ഞാല് മാത്രമായിരിക്കും താന് മത്സരിക്കുകയെന്നും പ്രതാപന് പ്രതികരിച്ചു. ഇക്കാര്യത്തില അന്തിമ തീരുമാനം എടുക്കേണ്ടത് ഹൈക്കമാന്റ് ആണെന്നും പറഞ്ഞു. തൃശൂരില് ഇതുവരെ യുഡിഎഫ് ആരേയും തീരുമാനിച്ചിട്ടില്ലെന്നും പറഞ്ഞു.
നേരത്തെ സുരേഷ് ഗോപിയുടെ പേരിലും തൃശൂരില് ചുവരെഴുത്ത് കണ്ടിരുന്നു. ബിജെപി വന് പ്രതീക്ഷ വെച്ചിരിക്കുന്ന മണ്ഡലങ്ങളില് ഒന്നായ തൃശൂരില് സുരേഷ്ഗോപി വിവിധ പരിപാടികളുമായി നിറ സാന്നിദ്ധ്യമാണ്. കഴിഞ്ഞ ദിവസം സുരേഷ്ഗോപിയുടെ മകളുടെ വിവാഹത്തില് പങ്കെടുക്കാന് പ്രധാനമന്ത്രി നരേന്ദ്രമോദി തന്നെ വന്നിരുന്നു. തൃശൂരില് രണ്ടാഴ്ചയ്ക്കിടെ രണ്ടാം തവണയാണ് മോദി വന്നത്.
എന്നാല് മോദിയുടെ വരവ് വോട്ടായി മാറില്ലെന്നാണ് ഇതിന് കോണ്ഗ്രസ് നല്കുന്ന മറുപടി. പ്രധാനമന്ത്രിക്ക് തൃശൂരിലേക്ക് ഇനിയും വരാമെന്നും അതിനെ തങ്ങള് സ്വാഗതം ചെയ്യുന്നതായിട്ടുമാണ് പ്രതാപന്റെ പ്രതികരണം. പ്രധാനമന്ത്രി ഇങ്ങിനെ വന്നുപോയാല് മാത്രം പോര തൃശൂരിന് വേണ്ടി എന്തെങ്കിലൂം ചെയ്യുക കൂടി വേണമെന്നും പ്രതാപന് പറഞ്ഞു. കക്ഷിരാഷ്ട്രീയത്തിനും ജാതിവര്ഗ്ഗ വൈവിദ്ധ്യത്തിനും അതീതമായിട്ടാണ് താന് നില്ക്കുന്നതെന്നും തൃശൂരിലെ ജനങ്ങള്ക്ക് തന്നെ വ്യക്തമായി അറിയാമെന്നും ടി.എന്. പ്രതാപന് പറയുന്നു.
