കപൂർ കുടുംബത്തിൽ നിന്നെത്തി ബോളിവുഡിൽ തന്റേതായ സ്ഥാനം ഉറപ്പിച്ച താരമാണ് കരീന കപൂർ ഖാൻ.
ബോളിവുഡിലെ ചോട്ടെ നവാബ് സെയ്ഫ് അലി ഖാന്റെ ഭാര്യയായി പട്ടൗഡി കൊട്ടാരത്തിന്റെ മരുമകളായി എത്തിയപ്പോൾ താരത്തിന്റെ ആരാധകരുടെ എണ്ണവും ഇരട്ടിയായി. രണ്ടു മക്കളാണ് കരീന സെയ്ഫ് ദമ്പതിമാർക്ക്, തൈമൂർ അലി ഖാനും ജഹാംഗിർ അലി ഖാനും. ഇപ്പോഴിതാ കരീന മൂത്തമകൻ തൈമൂർ അലി ഖാൻ സ്കൂളിൽ മെഡൽ കരസ്ഥമാക്കിയതിന്റെ സന്തോഷം പങ്കിടുകയാണ്. അതിരുകളില്ലാത്ത സന്തോഷം അഭിമാനത്തോടെ പങ്കുവച്ച കരീന മകന്റെ വെങ്കളാ മെഡൽ ധരിച്ചാണ് വിഡിയോയിൽ പ്രത്യക്ഷപെടുന്നത്. സ്റ്റൈലിഷ് ഗ്രേ സിപ്പർ ജാക്കറ്റും ധരിച്ച താരം സംവിധായകൻ കരൺ ജോഹറിന്റെ ചോദ്യങ്ങൾക്കൊക്കെ മറുപടി പറയുന്നുണ്ട്. "അതെ, അവന്റെ മെഡലുകൾ ധരിക്കുന്ന അമ്മ ഞാനാണ്...വെങ്കലം ആണ് പുതിയ സ്വർണ്ണം...അഭിമാനിയായ അമ്മ... മറ്റാരെങ്കിലും അങ്ങനെ ചെയ്യുമോ?..." കരീന ചോദിക്കുന്നു. മെഡൽ അഭിമാനത്തോടെ പ്രദർശിപ്പിക്കുന്ന കരീനയുടെ വീഡിയോ പങ്കുവെച്ചുകൊണ്ട് 'വെങ്കലമാണ് പുതിയ സ്വർണ്ണം' എന്ന് ഉറപ്പിച്ച് കരൺ ജോഹർ ആഘോഷത്തിൽ പങ്കുചേരുന്നുണ്ട്.
