തിരുവനന്തപുരം: മുഖ്യമന്ത്രി പിണറായി വിജയനു കിയ കാര് വാങ്ങിയതിനെ ന്യായീകരിച്ചു ധനമന്ത്രി കെ.എന്. ബാലഗോപാല്. 35 ലക്ഷം രൂപയ്ക്ക് ഒരു കാര് വാങ്ങുന്നതാണോ ഇത്ര വലിയ കാര്യമെന്ന് അദ്ദേഹം നിയമസഭയില് ചോദിച്ചു.
സംസ്ഥാനത്തെ ധനപ്രതിസന്ധി ചൂണ്ടിക്കാട്ടി പ്രതിപക്ഷം അടിയന്തരപ്രമേയം കൊണ്ടുവന്നതിനു പിന്നാലെ നടന്ന ചര്ച്ചയില്, ധനമന്ത്രി ദയനീയ പരാജയമാണെന്നു പ്രതിപക്ഷ നേതാവ് വി.ഡി. സതീശന് ആരോപിച്ചിരുന്നു. തുടര്ന്നു മറുപടി പറയുമ്പോഴാണു ന്യായീകരണവുമായി മന്ത്രി രംഗത്തെത്തിയത്. ക്ലിഫ് ഹൗസിലെ കാലിത്തൊഴുത്തിന് എസ്റ്റിമേറ്റ് തയാറാക്കിയതു മുഖ്യമന്ത്രിയല്ലെന്നു ബാലഗോപാല് പറഞ്ഞു.
''നവകേരള സദസ് ബസിനെക്കുറിച്ചു വലിയ കഥ ഉണ്ടായി. വന്നതു സാധാരണ ബസ്. നവ കേരള സദസ് സര്ക്കാര് പരിപാടിതന്നെയായിരുന്നു. ഇപ്പോള് രാഹുല് ഗാന്ധി യാത്ര ചെയ്യുന്ന ബസ് നോക്കൂ. ആ ബസ് തെറ്റാണെന്നു ഞങ്ങള് പറയുന്നില്ല.
കേരളത്തെ ബ്രാന്ഡ് ചെയ്യാനുള്ള പരിപാടിയാണു കേരളീയം. കേന്ദ്രത്തിനു കേരളത്തോടു ചിറ്റമ്മ നയമാണ്. ജി.എസ്.ടി. സംവിധാനം ശാസ്ര്തീയമാകുന്നതുവരെ നഷ്ടപരിഹാരം തുടരണമെന്നാണ് സര്ക്കാരിന്റെ ആവശ്യം.
ഭരണഘടനയിലെ, സംസ്ഥാനങ്ങളുടെ സാമ്പത്തിക അവകാശമാണ് കേന്ദ്രസര്ക്കാര് വെല്ലുവിളിക്കുന്നത്. വരുമാനത്തിന്റെ കാര്യത്തില് വലിയ വെട്ടിക്കുറവ് വന്നപ്പോഴും ചെലവ് മുന്വര്ഷത്തേക്കാള് കൂടുതലാണ്. 500 ലധികം കേസുകള് ഇ.ഡി. രജിസ്റ്റര് ചെയ്തപ്പോള് 25 കേസുകള്മാത്രമാണ് കോടതിയിലെത്തിയത്''-ബാലഗോപാല് പറഞ്ഞു.
