അവതാരകനും നടനുമായ ഗോവിന്ദ് പത്മസൂര്യയും നടി ഗോപിക അനിലും തമ്മിലുള്ള വിവാഹം സോഷ്യല് മീഡിയ ആഘോഷമാക്കിയതാണ്. ജിപിയുടെയും ഗോപിക അനിലിന്റെയും വിവാഹത്തില് സിനിമാലോകം ഒന്നടങ്കം പങ്കെടുത്തിരുന്നു. വലിയ ആവേശം തീര്ത്തുകൊണ്ടുള്ള താരവിവാഹത്തില് പ്രേക്ഷകര്ക്ക് വളരെ സുപരിചിതരായ ഒരുപാട് പേര് ആശംസകള് അറിയിച്ചു. ഇപ്പോഴിതാ ഗോപികയ്ക്ക് ആശംസകളുമായി നടന് ബിജേഷ് അവന്നൂരും എത്തിയിരിക്കുകയാണ്. സാന്ത്വനം സീരിയലില് ഒരുമിച്ച് അഭിനയിച്ചപ്പോഴുള്ള സൗഹൃദമായിരുന്നു ഗോപികയും ബിജേഷും. ലൊക്കേഷനില് നിന്നുള്ള സൗഹൃദം സഹോദരതുല്യമായെന്ന് പറയുകയാണ് നടനിപ്പോള്.
‘‘എന്നും അവൾ എനിക്ക് ഒരു അനിയത്തിക്കുട്ടിയായിരുന്നു. ഷൂട്ടിംഗ് സെറ്റിലോ, ഫോണിലൂടെയോ,അങ്ങനെ അധികമൊന്നും ഞങ്ങൾ സംസാരിക്കാറില്ല. പൊതുവെ ഞാൻ എന്നെക്കാൾ വയസ്സിനു താഴെയുള്ള എല്ലാ പെൺകുട്ടികളെയും ‘മോളെ’ എന്നാണ് വിളിച്ചു പോരാറ്.
എന്നാൽ...ഗോപികയെ മോളെ എന്ന് വിളിക്കാറുള്ളപ്പോൾ ഒക്കെ ഉള്ളിൽ എവിടെയോ ശരിക്കും ഒരു അനുജത്തിക്കുട്ടിയോടുള്ള വാത്സല്യം തോന്നിയിരുന്നു. നീണ്ട മൂന്നര വർഷകാലത്തു അടിക്കടി നേരിൽ കാണുന്ന ഒരു കൊച്ചു കുട്ടി ഇന്ന് വിവാഹിതയായി.കാലങ്ങൾ പെട്ടെന്ന് നീങ്ങി പോകുന്നു. വിവാഹ വേദിയിൽ നിന്നും അവൾ പടിയിറങ്ങിയപ്പോൾ ഒരു ചേട്ടന്റെ നൊമ്പരം ഉള്ളിൽ പിടഞ്ഞോ എന്ന് തോന്നിപ്പോയി. ഈശ്വരൻ ഒരുപാട് കാലം ഗോപികക്കും, ഗോവിന്ദ് പദ്മ സൂര്യക്കും ഒന്നിച്ചു സന്തോഷത്തോടെ ജീവിക്കാൻ അനുഗ്രഹാശിസുകൾ നൽകട്ടെ എന്ന് ഹൃദയം നിറഞ്ഞു ആശംസിക്കുന്നു’’ എന്നാണ് ഗോപികയുടെ വീഡിയോയ്ക്കൊപ്പം ബിജേഷ് കുറിക്കുന്നത്.
ഏഷ്യാനെറ്റില് സംപ്രേക്ഷണം ചെയ്തിരുന്ന ഹിറ്റ് സീരിയലായ സാന്ത്വനത്തിലൂടെയാണ് ഗോപിക അനില് ഏറെ ശ്രദ്ധിക്കപ്പെട്ടത്. മുന്പ് സീരിയലില് അഭിനയിച്ചിരുന്നെങ്കിലും സാന്ത്വനത്തിലെ അഞ്ജലി എന്ന പ്രധാനപ്പെട്ട റോളിലൂടെ താരം പ്രേക്ഷക പ്രശംസ നേടിയെടുത്തു. ഗോപികയുടെ വിവാഹം നടക്കുന്ന ദിവസങ്ങളില് തന്നെ സീരിയലും അവസാനിച്ചു. ഗോപികയും ജിപിയും തമ്മിലുള്ള വിവാഹം തീരുമാനിച്ചതോടെ നടി അഭിനയം നിര്ത്തിയേക്കുമെന്ന അഭ്യൂഹങ്ങളും പ്രചരിച്ചു. എന്നാല് അങ്ങനൊന്നും സംഭവിക്കാതെ കാര്യങ്ങള് സന്തോഷത്തോടെ പരിസമാപ്തിയിലേക്ക് എത്തി. ഗോപികയ്ക്ക് പുറമേ സാന്ത്വനം സീരിയലില് വന്ന് പോയ താരങ്ങള് പോലും പ്രശസ്തി നേടിയിരുന്നു. ബിജേഷും സാന്ത്വനത്തിലൂടെയാണ് ശ്രദ്ധേയനാവുന്നത്. മുഴുനീള കഥാപാത്രം അല്ലെങ്കില് പോലും നടന് അവതരിപ്പിച്ചിരുന്ന സേതു എന്ന കഥാപാത്രത്തിന് വലിയ പ്രേക്ഷക പിന്തുണ ലഭിച്ചിരുന്നു. സാന്ത്വനത്തിന് ശേഷം സീരിയലുകളിലും സിനിമകളില് ചെറിയ റോളുകള് ചെയ്തും ബിജേഷ് വെള്ളിത്തിരയില് നിറഞ്ഞു നില്ക്കുന്നു. സാന്ത്വനം കുടുംബമായി വന്ന താരങ്ങളെല്ലാവരും എന്നും ഇതുപോലെ സൗഹൃദത്തോടെ ഇരിക്കട്ടേ എന്നും ആശംസകള് കുറിച്ചിട്ടുണ്ട്.
ആശംസിക്കുന്നത്.
