പ്രണയം അതിന്റെ ഏറ്റവും മനോഹര നിമിഷങ്ങളിലെത്തുമ്പോഴാണ് കാമുകന്മാര് തങ്ങളുടെ കാമുകിമാരോട് ' വില് യൂ മാരി മീ ' എന്ന ചോദ്യം ചോദിക്കുന്നത്. ഈ ചോദ്യം തന്നെയാണ് ഓരോ പ്രണയിനികളുടെയും ഏറ്റവും വലിയ സ്വപ്നമാണ്. ജീവിതത്തിലെ ഏറ്റവും റൊമാന്റിക്കായ മുഹൂര്ത്തം തന്നെയാകും അത്. കടല്ക്കരയിലും കോഫി ഷോപ്പിലും ആള്ക്കൂട്ടത്തിന് നടുക്കുമൊക്കെ ഇടയില് നിന്ന് പ്രപ്പോസ് ചെയ്യുന്ന നിരവധി ആളുകളുണ്ട്. അടുത്ത കാലത്തായി ഈ പ്രൊപ്പോസല്സ് അതീവ നാടകീയമായിട്ടാണ് നടക്കുന്നത്. കഴിഞ്ഞ ദിവസം ഇത്തരത്തില് കൊളംബിയയില് നിന്ന് പുറത്തുവന്ന ഒരു പ്രൊപ്പോസല് വീഡിയോയാണ് സമൂഹ മാധ്യമങ്ങളില് ശ്രദ്ധ നേടുന്നത്.
വീഡിയോയില് ആളില്ലാത്ത ഒരു ജംഗ്ഷനിലൂടെ ഒരു കാര് വരുന്നത് കാണാം. തൊട്ട് പിന്നാലെ രണ്ട് വശത്ത് നിന്നും രണ്ട് ബൈക്കുകളില് മൂന്നാല് ആളുകള് പാഞ്ഞെത്തുകയും കാര് തടയുകയും ചെയ്യുന്നു. പിന്നാലെ കാറില് നിന്നും ഒരു സ്ത്രീയെയും ഒരു പുരുഷനെയും വലിച്ച് ഇറക്കുന്നു. എത്തിയ സംഘത്തില് ഒരാളുടെ കൈയില് തോക്ക് കാണാം. ഇതിനിടെ യുവാവിനെ ചിലര് ചേര്ന്ന് കാറിന് മുന്നില് മുട്ട് കുത്തി നിര്ത്തുകയും യുവതിയെ അയാളുടെ മുന്നിലേക്ക് തള്ളി നീക്കുകയും ചെയ്യുന്നു.
യുവതി ഭയചകിതയായി നില്ക്കുമ്പോള് മുട്ടു കുത്തി നില്ക്കുന്ന യുവാവ് തന്റെ കൈയില് സൂക്ഷിച്ച മോതിരം യുവതിക്ക് നേരെ നീട്ടി 'വില് യു മാരി മീ' എന്ന് ചോദിക്കുന്നു. അതുവരെ എന്താണ് സംഭവിക്കുന്നതെന്ന് അറിയാതെ ഭയന്നിരുന്ന യുവതി പെട്ടെന്ന് സന്തോഷം കൊണ്ട് ഉച്ചത്തില് ചിരിക്കുന്നു. ഇതിനിടെ തോക്ക് ചൂണ്ടി ഭീഷണി മുഴക്കിയ സംഘവും വലിയ ശബ്ദങ്ങളുണ്ടാക്കി സന്തോഷം പങ്കുവയ്ക്കുന്നു. എന്നാല് വീഡിയോയിലെ ആളുകളില് കണ്ട് സന്തോഷം വീഡിയോ കണ്ട സോഷ്യല് മീഡിയ ഉപയോക്താക്കള്ക്കില്ലായിരുന്നു.
നിമിഷ നേരങ്ങള്ക്കുള്ളില് വൈറലായ വീഡിയോയ്ക്ക് താഴെ നിരവധി ആളുകളാണ് കമന്റുമായി എത്തിയത്. 'ആരോഗ്യത്തിലും രോഗത്തിലും, തട്ടിക്കൊണ്ടുപോകലുകളിലും കവര്ച്ചകളിലും കൂടെ നില്ക്കാന് നിങ്ങള് ഒരാളെ പൂര്ണ്ണഹൃദയത്തോടെ സ്നേഹിക്കണം,' ഒരു കാഴ്ചക്കാരന് തമാശയായി എഴുതി. മറ്റൊരാള് എഴുതിയത് 'അയാള് പെണ്കുട്ടിക്ക് ഹൃദയാഘാതമുണ്ടാക്കി. അവന് ഒരു കാമുകി ഇല്ലാതെ പോകുമായിരുന്നു.' എന്നായിരുന്നു. മറ്റൊരാള് അല്പം കടന്ന് ചിന്തിച്ചു. 'അവര് ഇതൊക്കെ നിസാരമായി കരുതുന്നു. രാജ്യത്തിന്റെ അവസ്ഥയില് ആശങ്കപ്പെടണ്ടണോ അതോ ഇത് വ്യാജമാണെന്ന് കരുതണോ? എനിക്കറിയില്ല.' എന്നായിരുന്നു മറ്റൊരാള് എഴുതിയത്.
