തിരുവനന്തപുരം: ക്രിസ്മസ്-പുതുവത്സര ബമ്പര് ലോട്ടറി അടിച്ചത് പുതുച്ചേരി സ്വദേശിക്ക്. 33 വയസുള്ള ബിസിനസുകാരനായ ഇദ്ദേഹം ശബരിമല ദര്ശനത്തിനുശേഷം മടങ്ങുമ്പോള് പത്മനാഭസ്വാമിക്ഷേത്രം സന്ദര്ശിച്ചപ്പോഴാണ് അതിനടുത്തുള്ള ലോട്ടറിക്കടയില്നിന്നു ലോട്ടറി വാങ്ങിയത്. ഇന്നലെ 2.45-നു സുഹൃത്തുക്കള്ക്കും ലോട്ടറി ഏജന്റിനുമൊപ്പം ലോട്ടറി ഡയറക്ടറേറ്റിലെത്തി സമ്മാനാര്ഹമായ ലോട്ടറി ടിക്കറ്റ് കൈമാറി.
പേരുവിവരങ്ങള് വെളിപ്പെടുത്തരുതെന്നു അഭ്യര്ഥിച്ചിട്ടുണ്ടെന്ന് ലോട്ടറി ഡയറക്ടറേറ്റ് വ്യക്തമാക്കി. തിരുവനന്തപുരം സ്വദേശിയായ ഓണം ബമ്പര് ലോട്ടറി ജേതാവിനു വീട്ടില് സഹായം അഭ്യര്ഥിച്ചു വന്നവരുടെ തിരക്കുകാരണം വീടും നാടും വിട്ട് പോകേണ്ടി വന്നിരുന്നു. അതിനുശേഷം ബംപര് സമ്മാനങ്ങള് അടിക്കുന്നവര് പേരുവിവരങ്ങള് പരസ്യപ്പെടുത്താറില്ല. വിവരങ്ങള് രഹസ്യമായി ലോട്ടറി ഓഫീസിനു െകെമാറും.
മൂന്ന് ദിവസം മുമ്പാണ് ഭാഗ്യശാലി തന്നെ വിളിച്ചതെന്ന് ലോട്ടറി ഏജന്റ് ഷാജഹാന് പറഞ്ഞു. 'ടിക്കറ്റ് നല്കാനുള്ള സൗകര്യം ചെയ്യണമെന്ന് ആവശ്യപ്പെട്ടു. കൂടുതല് വിവരങ്ങള് പുറത്തുപറയാന് ആഗ്രഹിക്കുന്നില്ല.' എന്നു അദ്ദേഹം പറഞ്ഞു. തിരുവനന്തപുരത്തെ ലക്ഷ്മി ഏജന്സിയില് നിന്നും വിറ്റുപോയ എക്സ് സി 224091 എന്ന ടിക്കറ്റിനാണ് ഇത്തവണ ഒന്നാം സമ്മാനമടിച്ചത്. സമ്മാനത്തുക കൂട്ടുകാരുമായി ആലോചിച്ചു വിനിയോഗിക്കുമെന്നു ഭാഗ്യവാന് അറിയിച്ചു.
ക്രിസ്മസ് പുതുവത്സര ബമ്പര് ലോട്ടറിയുടെ ഒന്നാം സമ്മാനം 20 കോടിരൂപയാണ്. ജേതാവിന്റെ അക്കൗണ്ടിലേക്കെത്തുന്നത് 12.60 കോടിരൂപ. 30% നികുതി ഈടാക്കിയശേഷമാണ് ലോട്ടറി വകുപ്പ് സമ്മാന ജേതാവിന് തുക െകെമാറുന്നത്. ഉയര്ന്ന സമ്മാനങ്ങള് നേടുന്നവര് കേന്ദ്രസര്ക്കാര് നികുതിയും നല്കേണ്ടതുണ്ട്. ക്രിസ്മസ് പുതുവത്സര ബമ്പറിന്റെ ഒന്നാം സമ്മാനം നേടിയ ടിക്കറ്റു വിറ്റ ഏജന്റിന് 2 കോടിരൂപ കമ്മീഷനായി ലഭിക്കും. രണ്ടാം സമ്മാനമായി 20 പേര്ക്ക് ഒരു കോടിവീതം ലഭിക്കും. 45 ലക്ഷം ടിക്കറ്റുകളാണ് വിറ്റത്. പാലക്കാടാണ് കൂടുതല് ടിക്കറ്റുകള് വിറ്റത്.
