ഹൃദയം കീഴടക്കുന്ന ഒട്ടനവധി വാര്ത്തകളും വീഡിയോകളും സമൂഹ മാധ്യങ്ങളിലൂടെ ശ്രദ്ധ നേടാറുണ്ട്. ഇവയില് കൂടുതലും യഥാര്ത്ഥ സംഭവങ്ങളുടെ നേര്ക്കാഴള്ചകളായി വരുന്നവയായിരിക്കും. ഇപ്പോഴിതാ ദുബായ് രാജ്യാന്തര വിമാനത്താവളത്തിലുണ്ടായ ഒരു സംഭവമാണ് നെറ്റീസണ്സിന്റെ മനസ്സില് ഇടം പിടിക്കുന്നത്. കാരണം ഒരത്യപൂര്വ്വ നിമിഷത്തിനാണ് എയര്പോര്ട്ട് കഴിഞ്ഞ ഏതാനും ദിവസങ്ങള്ക്ക് മുന്പ് സാക്ഷിയായത്. വേര്പിരിഞ്ഞുപോയ വയോധികരായ ദമ്പതികള് വിമാനം പറന്നയുരന്നതിന് മുന്പേ ഒന്നിച്ച് ചേര്ന്ന വാര്ത്തയാണിത്. ഇതിന് വഴിയൊരുക്കിയത് ടെര്മിനല് സര്വീസ് ഡെലിവറി ഡ്യൂട്ടി ഓഫീസര് മുഹമ്മദ് സൊഹ്റാബി. അദ്ദേഹം തന്നെയാണ് സമൂഹമാധ്യമത്തില് ഇതേക്കുറിച്ചുള്ള ഹൃദയസ്പര്ശിയായ വീഡിയോ പങ്കുവച്ചത്.
തിരക്കുള്ള ദിവസമായിരുന്നു അത്. ഒരു സ്ത്രീ തന്റെ ഭര്ത്താവിനെ കാണാനില്ലെന്ന് പറഞ്ഞ് കരഞ്ഞുകൊണ്ട് മുഹമ്മദ് സൊഹ്റാബിനെ സമീപിക്കുകയായിരുന്നു. സിഡ്നിയില് നിന്ന് ഗ്ലാസ്ഗോയിലേക്ക് വിമാനം കയറിയ ദമ്പതികള് ദുബായ് വഴി പോകുമ്പോഴായിരുന്നു സംഭവം. അവരുടെ വിമാനം പറന്നുയരാന് 45 മിനിറ്റാണ് അപ്പോള് ബാക്കിയുണ്ടായിരുന്നത്. ഭര്ത്താവിന് വേണ്ടി കുറേ തിരഞ്ഞെങ്കിലും സാധിച്ചില്ലെന്നും അവര് അറിയിച്ചു. എല്ലാം കേട്ട് മനസിലാക്കിയ ശേഷം കാണാതായ ആളെ കണ്ടെത്താന് സൊഹ്റാബി നടപടി സ്വീകരിച്ചു. .
'ഞാന് എന്റെ ടീമിനെ പ്രശ്നം അറിയിക്കുകയും വയോധികന്റെ ചിത്രം എല്ലാവര്ക്കും അയച്ചുകൊടുക്കുകയും ചെയ്തു. അദ്ദേഹത്തെ അന്വേഷിക്കാന് ഞാന് അവരോട് ആവശ്യപ്പെട്ടു. ഭാഗ്യവശാല് വിമാനം പുറപ്പെടുന്നതിന് 15 മിനിറ്റ് മുന്പ് അദ്ദേഹത്തെ കണ്ടെത്താന് സാധിച്ചു. അവര്ക്ക് അതേ വിമാനത്തില് തന്നെ പോകാനും കഴിഞ്ഞു. അവര് ശരിക്കും സന്തുഷ്ടരായിരുന്നു' -കഴിഞ്ഞ 33 വര്ഷമായി ദുബായ് രാജ്യാന്തര വിമാനത്താവളത്തില് പ്രവര്ത്തിക്കുന്ന സൊഹ്റാബി പറഞ്ഞു.
