മികച്ച നവാഗത സംവിധായകനുള്ള പുരസ്ക്കാരത്തിൽ നിന്ന് മുന് പ്രധാനമന്ത്രി ഇന്ദിരാ ഗാന്ധിയുടെ പേര് ഒഴിവാക്കി. പ്രശസ്ത നടി നർഗീസ് ദത്തിന്റെ പേരും ദേശീയോദ്ഗ്രഥനത്തിന്റെ ചിത്രത്തിനുള്ള പുരസ്ക്കാരത്തിൽ നിന്ന് ഒഴിവാക്കി. കേന്ദ്ര വാര്ത്താ വിതരണ മന്ത്രാലയം രൂപവത്കരിച്ച സമിതിയുടെ ശുപാര്ശ പ്രകാരമാണ് അവാര്ഡുകളുടെ പേരുകള് മാറ്റികൊണ്ട് ഉത്തരവിറക്കിയത്. ഇതുവരെ ഇന്ദിരാ ഗാന്ധിയുടെ പേരിലാണ് മികച്ച നവാഗത സംവിധായകനുള്ള പുരസ്കാരം നല്കിയിരുന്നത്. ദാദാ സാഹേബ് ഫാൽക്കെ അവാർഡ് ഉൾപ്പടെയുള്ള പുരസ്ക്കാരങ്ങളുടെ സമ്മാന തുക കൂട്ടാനും സമിതി നിർദ്ദേശിച്ചിട്ടുണ്ട്.
ഐക്യകണ്ഠേനയാണ് തീരുമാനം അംഗീകരിച്ചതെന്നാണ് ലഭിക്കുന്ന വിവരം. അതേസമയം ശബ്ദ വിഭാഗത്തില് ഉള്പ്പെടെ സാങ്കേതിക വിഭാഗത്തിലെ ചില മാറ്റങ്ങളാണ് താൻ നിര്ദേശിച്ചിരുന്നതെന്ന് സംവിധായകൻ പ്രിയദര്ശൻ പറഞ്ഞു. 2022ലെ ഏഴുപതാമത് ദേശീയ ചലച്ചിത്ര പുരസ്കാരങ്ങളുടെ ചട്ടങ്ങളിലാണ് ഇതുസംബന്ധിച്ച മാറ്റം വരുത്തിയിരിക്കുന്നത്. ജനുവരി 30 ആയിരുന്നു 2022ലെ അവാര്ഡിനുള്ള നാമനിര്ദേശങ്ങള് സമര്പ്പിക്കാനുള്ള അവസാന തീയതി. ഇന്ദിരാ ഗാന്ധിയുടെ പേര് ഇല്ലാതെയായിരിക്കും മികച്ച നവാഗത സംവിധായകനുള്ള പുരസ്കാരം നല്കുക.
ദേശീയോദ്ഗ്രഥന ചിത്രത്തിനുള്ള നര്ഗീസ് ദത്ത് അവാര്ഡ് ഇനി മുതല് ദേശീയ, സാമൂഹിക, പാരിസ്ഥിതി മൂല്യങ്ങള് പ്രോത്സാഹിപ്പിക്കുന്ന മികച്ച ചിത്രത്തിനുള്ള അവാര്ഡ് എന്ന പേരിലായിരിക്കും നല്കുക.
