കോഴിക്കോട് : പാലക്കാട് സ്വദേശിനിയായ പതിനാറുവയസ്സ്കാരിയുടെ വയറ്റില് നിന്ന് സര്ജറിയിലൂടെ പുറത്തെടുത്തത് രണ്ട് കിലോ ഭാരമുളള മുടിക്കെട്ട്. വിളര്ച്ചയും വിശപ്പില്ലായ്മയും കാരണം കോഴിക്കോട് മെഡിക്കല് കോളേജ് ആശുപത്രിയില് ചികിത്സക്കായി എത്തിയ പെണ്കുട്ടിയുടെ വയറ്റില് നിന്നാണ് ഭീമന് മുടിക്കെട്ട് ലഭിച്ചത്. കഴിഞ്ഞ വ്യാഴാഴ്ചയായിരുന്നു സംഭവം.
വയറുവേദനയെ തുടര്ന്ന് പെണ്കുട്ടിയും ബന്ധുക്കളും സര്ജറി വിഭാഗത്തിലെ ഡോ. വൈ ഷാജഹാനെ സമീപിക്കുകയായിരുന്നു. പരിശോധനക്ക് ശേഷം സ്കാനിംഗ് എടുക്കാനായി ഡോക്ടര് നിര്ദേശിച്ചുതിനെ തുടര്ന്ന് ഡോക്ടറെയും ബന്ധുക്കളെയും ഞെട്ടിക്കുന്ന റിപ്പോര്ട്ടാണ് സ്കാനിംഗില് ഉണ്ടായിരുന്നത്. 30 സെന്റിമീറ്റര് നീളത്തിലും 15 സെന്റിമീറ്റര് വീതിയിലും ഭീമന് മുടിക്കെട്ട് വയറ്റില് കണ്ടെത്തുകയായിരുന്നു.
ട്രൈക്കോ ബിസയര് എന്ന രോഗാവസ്ഥയാണെന്ന് സംശയം തോന്നിയിരുന്നുവെങ്കിലും ഇത്രത്തോളം തീവ്രതയുണ്ടാവുമെന്ന് കരുതിയിരുന്നില്ലെന്ന് ഡോക്ടര് മാധ്യമങ്ങളോട് പറഞ്ഞു. ആഹാര അംശങ്ങളുമായി ചേര്ന്ന് മുടിക്കെട്ട് ആമാശയ രൂപത്തിന് സമാനമായ രീതിയില് ട്യൂമറായി മാറിയിരുന്നു. ഇതുമൂലമാണ് രോഗിക്ക് വിളര്ച്ചയും ക്ഷീണവും അനുഭവപ്പെട്ടതെന്ന് ഡോക്ടര്മാര് സൂചിപ്പിച്ചു.
മെഡിക്കല് കോളജ് ആശുപത്രിയില് എത്തുന്നതുവരെ ഈ രോഗത്തെക്കുറിച്ച് കുട്ടിക്കോ മാതാപിതാക്കള്ക്കോ ഒരു വിവരവും ഉണ്ടായിരുന്നില്ല. കുട്ടിയുടെ തലയില് പലയിടങ്ങളിലായി മുടി കൊഴിഞ്ഞതിന്റെ ലക്ഷണമുണ്ട്. അതിസങ്കീര്ണമായ ശസ്ത്രക്രിയയിലൂടെയാണ് മുടി പുറത്തെടുത്തത്. സര്ജറി വിഭാഗം പ്രൊഫസര് ഡോ.വൈ.ഷാജഹാന്റെ നേതൃത്വത്തില് ഡോക്ടര്മാരായ വൈശാഖ്, ജെറി,ജിതിന് അഞ്ജലി അബ്ദുല്ലത്തീഫ്, ബ്രദര് ജെറോം എന്നിവരും പങ്കെടുത്തു.
