ലോകത്തിന്റെ പലകോണിലും നടക്കുന്ന പല വിചിത്ര സംഭവങ്ങളും സമൂഹ മാധ്യമങ്ങളിലൂടെ പുറത്തുവരാറുണ്ട്. ഇവയില് നമ്മുക്ക് കേട്ടുകേള്വിയോ പരിചയമോ ഇല്ലാത്ത കേസുകളും നിയമപേരാട്ടങ്ങളുമൊക്കെ ഉള്പ്പെടുന്നുണ്ട്. ചിലതൊക്കെ കേള്ക്കുമ്പോള് അവിശ്വസനീയം എന്ന് തോന്നുമെങ്കിലും മാറിക്കൊണ്ടിരിക്കുന്ന ലോകത്ത് ഇതൊക്കെ സര്വ്വസാധരണമായെന്ന് ചിന്തിക്കേണ്ടിയിരിക്കുന്നു. ഇപ്പോഴിതാ യുകെയില് നിന്ന് പുറത്തുവരുന്ന ഒരു സംഭവമാണ് ആളുകള്ക്കിടയില് ചര്ച്ചയാകുന്നത്.
സംഭവം എന്താണന്നല്ലേ? വന്ധത്യചികിത്സയുടെ ചിലവ് താങ്ങാന് കഴിയാതെ വന്ന ദമ്പതികള് ചെയ്ത അസാധാരണമായ കാര്യമാണ് ഒടുവില് കേസായത്. കുഞ്ഞുങ്ങളില്ലാത്തതിനെ തുടര്ന്ന് ചികിത്സയെടുക്കാമെന്ന് വച്ചപ്പോള് ഐവിഎഫ് ചികിത്സയുടെ ചിലവ് താങ്ങാനാകുന്നില്ലെന്ന് മനസിലാക്കിയ ഒരാള് തന്റെ പങ്കാളിക്ക് തന്റെ ബീജത്തിനൊപ്പം തന്റെ സ്വന്തം അച്ഛന്റെയും ബീജം കുത്തിവച്ചു എന്നതാണ് സംഭവം. ഒടുവില് കുഞ്ഞ് ജനിച്ച് അഞ്ച് വര്ഷം കഴിഞ്ഞപ്പോഴാണ് സംഭവം കേസ് ആയത്.
ആരാണ് കേസ് കൊടുത്തതെന്നോ, എങ്ങനെയാണ് കേസ് കോടതിവരെ എത്തിയതെന്നോ എന്നുള്ളത് വ്യക്തമല്ല. സ്വകാര്യത മാനിച്ച് ഇവരുടെ പേരോ വിശദാംശങ്ങളോ ഒന്നും റിപ്പോര്ട്ടുകളില് പറയുന്നില്ല. കേസ് കോടതിയില് എത്തിയപ്പോള് കുഞ്ഞിന്റെ അച്ഛന് ആരാണെന്ന് അറിയാനുള്ള ഡിഎന്എ പരിശോധന നടത്തുമോ ഇല്ലയോ എന്നാണ് എല്ലാവരും ഉറ്റുനോക്കിയത്. എന്നാല് ഡിഎന്എ പരിശോധന നടത്തണ്ടെന്നും കുഞ്ഞിന്റെ പിതൃത്വം തങ്ങളെ ബാധിക്കുന്ന കാര്യമല്ലെന്നും കോടതി വ്യക്തമാക്കി.
കുഞ്ഞിന്റെ പിതൃത്വം സംബന്ധിച്ച് തീരുമാനം എടുക്കേണ്ടത് ആ കുടുംബം ആണെന്നും എന്തായാലും ഇക്കാര്യം വളര്ന്നുവരുന്ന കുഞ്ഞിനെ സംബന്ധിച്ച് വലിയ വൈകാരിക പ്രതിസന്ധിയായി വരുമെന്ന കാര്യത്തില് സംശയമില്ലെന്നും കോടതി അറിയിച്ചു. കുടുംബത്തിന് അവരുടെ തീരുമാനപ്രകാരം പിതൃപരിശോധന നടത്തുകയും ആരാണ് പിതാവെന്ന് കണ്ടെത്തുകയും അത് കുഞ്ഞിനെ അറിയിക്കുകയും ചെയ്യാം. അതെല്ലാം കുടുംബമാണ് തീരുമാനിക്കേണ്ടത് എന്നും കോടതി നിരീക്ഷിച്ചു.
